သျှမ်းပြည် ညောင်ရွှေမြို့နယ်တွင် စစ်ကောင်စီတပ်မှ လက်နက်ကြီး ရမ်းသမ်းပစ်ခတ်မှုကြောင့် ကျေးရွာ (၁၀) ရွာခန့်ရှိ ဒေသခံ ၃ ‌ထောင်ကျော် ထွက်ပြေး တိမ်းရှောင်နေရ‌ကြောင်း သတင်းရရှိသည်။

ပြီးခဲ့သည့် ဇန်နဝါရီလ နောက်ဆုံးပတ်မှ စတင်၍ စစ်ကောင်စီတပ်နှင့် တော်လှန်ရေးတပ်ဖွဲ့များသည် ညောင်ရွှေ – ပင်လောင်း – ဖယ်ခုံမြို့နယ် အစပ်တို့တွင် စစ်ရေးတင်းမာမှုများဖြစ်ပွားခဲ့သည်။

တော်လှန်ရေးတပ်ဖွဲ့များတွင် အမှတ် ၁၀၀၉ တပ်ရင်း အင်းလေးပြည်သူ့ကာကွယ်ရေးတပ် ၊ အမှတ် ၁၀၀၆ တပ်ရင်း ဖယ်ခုံမြို့နယ် ပြည်သူ့ကာကွယ်ရေးတပ် (PK PDF-2)၊ ပျားစစ်ကြောင်း၊ရှမ်းပြည်နယ် တောင်ပိုင်း တော်လှန်ရေး တပ်ဖွဲ့ (SSRY) တို့ပါဝင်သည်။

ထိုစစ်ရေးတင်းမာမှုကြောင့် စစ်ကောင်စီတပ်နှင့် ပအိုဝ်းပြည်သူ့စစ် PNO တို့က ကျေးရွာအတွင်းသို့ လက်နက်ကြီးများ ရမ်းသမ်းပစ်ခတ်နေခြင်းကြောင့် ဒေသခံများ ထွက်ပြေးတိမ်းရှောင်ခဲ့ရကြောင်း အင်းလေးအမျိုးသမီးသမဂ္ဂအဖွဲ့ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

“အခုက အင်းရဲ့ အနောက်ဘက်ခြမ်းကိုလည်း လုံးဝ ရှောင်လို့မရဘူး။ မြောက်အင်းဘက်က အသိရှိတဲ့ရွာမှာ ရှောင်နေကြရတယ်။ ကိုယ့်ရွာနဲ့ နီးနေတဲ့ရွာတွေမှာပဲ အများစုက ရှောင်ကြတယ်။ တချို့တော့လည်း ဖယ်ခုံမြို့ဘက်ကို ရှောင်ကြတယ်။ ဘယ်ရွာမှာ ရှောင်နေလဲဆိုတာတော့ အတိအကျ ပြောပြလို့မရဘူးရှင့်”ဟု အင်းလေးအမျိုးသမီး သမဂ္ဂအဖွဲ့ တာဝန်ရှိသူတစ်ဦးက ပြောသည်။

လက်ရှိတွင် စစ်ဘေးရှောင်များသည် နီးစပ်ရာ ဆွေမျိုးများနှင့် ဘုန်းကြီးကျောင်းတို့တွင် ထွက်ပြေး တိမ်းရှောင်နေရသည့်အတွက် နေရာထိုင်ခင်းအပြင်၊ စားသောက်ရန် အခက်အခဲများ ကြုံတွေ့နေရပြီး အကူအညီများလည်း လိုအပ်နေကြောင်း ၎င်းက ဆိုသည်။

“လက်ရှိမှာ အလှူရှင်တွေလည်း မရှိဘူး။ သူတို့မှာ ပါလာတာလေးတွေနဲ့ ရှိတာနဲ့ပဲ ချက်ပြုတ်စားသောက် နေရတယ်။ တချို့ဆို အစကတည်းက တခြားရွာမှာ ရှောင်နေရတာ၊ ဒီလို ထပ်ဖြစ်တော့ အဲ့ရွာကနေတဆင့် ထပ်ပြေးရတယ်။ အလုပ်ကလည်း တိုက်ပွဲနဲ့ နီးကပ်တဲ့ နေရာမှာ ဖြစ်တော့ တချို့ဆို ရိတ်သိမ်းခါနီး စပါးတွေ၊ ပဲတွေ မသိမ်းလိုက် ရတာမျိုးတွေရှိတယ်။ လနဲ့ကြာမယ် ဆိုရင်တော့ ပိုပြီး အခက်အခဲတွေ ရှိလာနိုင်တယ်”ဟု အသက် ၄၀ ဝန်းကျင် ဒေသခံ အမျိုးသမီးတစ်ဦးက ပြောသည်။

ထွက်ပြေးတိမ်းရှောင်နေရသော ဒေသခံများမှာ ဘုရားတောင်၊ လွယ်နွဲ့၊ ရေပူ၊ ညောင်လေးပင်၊ နန်းတုတ်၊ ကုန်းသာ၊ အိမ်မူ၊ တောင်ပို့ကွဲ၊ ဟိုပန် စသည့် ကျေးရွာဒေသခံများဖြစ်ပြီး လူဦးရေ (၃) ‌‌ထောင်ကျော် ထွက်ပြေးတိမ်းရှောင် နေရကြောင်း အင်းလေးအမျိုးသမီးသမဂ္ဂအဖွဲ့ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

ထို့အပြင် စံကားဒေသတွင် လာရောက်တိမ်း‌ရှောင်နေသည့် စစ်ဘေးရှောင် လူဦးရေ (၅၀၀) ခန့် ရောက်ရှိနေပြီး နီးစပ်ရာဆွေမျိုးနှင့် ပြောင်းပွဲရုံတို့တွင် လာရောက်ခိုလှုံ နေထိုင်ကြပြီး စားနပ်ရိက္ခာအတွက် အကူအညီများ လိုအပ်နေကြောင်း စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ဆက်ပြောသည်။

“ကျမတို့ကတော့ ပြေးလာတာ ကြာနေပါပြီ။ အခု နောက်ပိုင်းမှ ပြေးလာတဲ့လူတွေကို စာရင်း ကောက်ထားပေးတာပါ။ အခု လောလောဆယ် (၅၀၀) ဝန်းကျင်လောက်ရှိမယ်။ ဂိုဒေါင်တွေမှာ နေ နေကြတာ။ စားဖို့ သောက်ဖို့ ကတော့ ရေရှည်အတွက်ဆိုရင် စိုးရိမ်ရတယ်။ စားနပ်ရိက္ခာတွေ အတွက်ကလည်း အဆင်မပြေကြဘူး”ဟု ၎င်းစစ်ဘေးရှောင်အမျိုးသမီးက ပြောသည်။

ပြီးခဲ့သည့် ဖေဖော်ဝါရီလ ၁၃ ရက်တွင် စစ်ကောင်စီက ဖယ်ခုံအနောက်ဘက်ကမ်းမှ လက်နက်ကြီးဖြင့် ရမ်းသမ်းပစ်ခတ်မှုကြောင့် ညောင်ရွှေမြို့နယ် တောင်ပို့ကွဲ ကျေးရွာအတွင်း ကျရောက် ပေါက်ကွဲခဲ့ပြီး အသက် ၃၀ အရွယ်ရှိ အမျိုးသားတစ်ဦး ထိခိုက်ဒဏ်ရာရရှိခဲ့ကြောင်း သိရသည်။