သျှမ်းပြည်တောင်ပိုင်း၊ ဆီဆိုင်မြို့နယ် ဘုရားဖြူကျေးရွာတွင် စစ်ကောင်စီနှင့် ပအိုဝ်းပြည်သူ့စစ် (PNO)တို့က စစ်သင်တန်းသားများကို ကျည်တစ်တောင့် ကျပ်(၁၅၀၀)ပေးစေပြီး စစ်ရေးလေ့ကျင့်ပေးနေသည်ဟု ဒေသခံများထံမှ သိရသည်။
အဆိုပါ စစ်ရေးလေ့ကျင့်ရာတွင် နေ့အချိန်နှင့် ညပိုင်းအချိန်တွင် လေ့ကျင့်ရပြီး လေ့ကျင့်ချိန်တွင် သင်တန်းသားများကို ကျည် ဆယ်တောင့်ထက် ပိုမပစ်ခိုင်းကြောင်းနှင့် ပိုပစ်၍ လေ့ကျင့်လျှင့် ကျည်တစ်ထောင့် စာငွေပေးရသည်ဟုစစ်သင်တန်းဆင်း အမျိုးသားတစ်ဦးက သျှမ်းသံတော်ဆင့်ကို ပြောသည်။
“ စစ်သင်တန်းက (၅)ရက်ကျော်တက်ရတယ်။ အခြေခံ သေနတ်ပစ်နည်းတွေသင်ရတယ်။ အချိန်က နည်းတာရယ် ပြီးရင် ညပိုင်းလုံခြုံရေးယူတဲ့အခါ ပိုထိရောက်မှုရှိအောင်လို့ ညဘက်မှာပါ လေ့ကျင့်ရတာ။ သေနတ်ပစ်တဲ့အခါ ကျည် ဆယ်တောင့် ထက်ပိုပစ်မလေ့ကျင့်ရဘူး။ ပိုသွားရင် ကျည်တစ်တောင့်ကို ကျပ်(၁၅၀၀) ပေးရတယ်။” ဟု စစ်သင်တန်းဆင်း တစ်ဦးက ပြောသည်။
ထို့အပြင် စစ်ရေးလေ့ကျင့်မှုတွင် ဘုရားဖြူဒေသခံ အပါဝင် တခြားသော ဆီဆိုင်မြို့နယ် ကျေးရွာများမှ ဒေသခံများပါဝင်ကာ စစ်သင်တန်းကို (၅)ရက်မှ (၇) ရက်အထိ သင်ကြားရပြီး တစ်သုတ်လျှင် သင်တန်းသား (၈၀)ဝန်းကျင်ရှိကြောင်း သိရသည်။
ထိုကဲ့သို့ စစ်ရေးလေ့ကျင့်မှုကြောင့် အနီးနားရှိ ကျေးရွာဒေသခံများက ကြောက်လန့်နေကြရပြီး စစ်သင်တန်းရက်ပိုင်း တက်ရောက်ပြီးသူများကို ရပ်ရွာလုံခြုံရေးနှင့် ထောက်ပို့လုပ်သည့်နေရာတွင် ဝင်ရောက်တာဝန်ယူ ထမ်းဆောင်ခိုင်းကြောင်း ဒေသခံများက ပြောသည်။
ဆက်လက်ပြီး စစ်ကောင်စီနှင့် PNOတို့က ရှေ့တန်းရိက္ခာပို့ရန်အတွက် ဒေသခံကားများကို ချောဆွဲနေသောကြောင့် ဆီဆိုင်မြို့နယ် ကျေးရွာအများစုတွင် ကျေးရွာ ရန်ပုံငွေဖြင့် စစ်တပ်ရိက္ခာပို့ရန် ကားတစ်စီးစီ ဝယ်ထားပေးရကြောင်း ဆီဆိုင် ဒေသခံ အမျိုးသမီးတစ်ဦးက ပြောသည်။
“သူတို့က ကားပဲခေါ်တာ မဟုတ်ဘူး။ လူကိုပါ ကားမောင်းပို့ခိုင်းတော့ ဘယ်သူမှ မလိုက်ချင်ဘူး။ဒါကြောင့် ရွာက စုပြီး စစ်တပ်အတွက် ဟိုက်ဂျက် ကားတစ်စီး ဝယ်ထားပေးရတယ်။ အရင်က ကားတွေယူသွားပြီး ပြန်မပေးဘူး။ ထောက်ပို့ဆိုပြီး ယူသွားတာ ပြန်မရတော့ဘူး။” ဟု ၎င်းအမျိုးသမီးတစ်ဦးက ပြောသည်။
ယခုလက်ရှိဆီဆိုင်မြို့တွင် တိုက်ပွဲ ငြိမ်သက်နေသော်လည်း လေကြောင်းရန်ကို ဒေသခံများ အထူးသတိထားနေကြသည်။
ပြီးခဲ့သည့် ဇန်နဝါရီလ ၁၁ ရက်နေ့ ဟိုပုံးမြို့တွင်လည်း စစ်တပ်၏ လေ့ကျင့်ရေးတပ်အတွင်းမှ လက်နက်များ ပစ်ခတ်လေ့ကျင့်နေသောကြောင့် တပ်နှင့် အနီးတဝိုက်တွင် နေထိုင်သည့် ဒေသခံများ စိုးရိမ်ထိပ်လန့်ခဲ့ရသည်ဟုသိရသည်။
Leave a Comments