သျှမ်းပြည် တောင်ပိုင်း ညောင်ရွှေမြို့နယ်ရှိ ကျေးရွာနှစ်ခုကို စစ်ကောင်စီက လက်နက်ကြီး ပစ်ခတ်မှုကြောင့် ဒေသခံတစ်ဦး ထိခိုက်ဒဏ်ရာရရှိခဲ့ပြီး နေအိမ်းများမီးလောင်ပျက်စီးခဲ့ကြောင်း သတင်းရရှိသည်။
ယမန်နေ့ ( ဖေဖော်ဝါရီလ ၁၃ ရက်) ညနေ ၆ နာရီ ဝန်းကျင်တွင် စစ်ကောင်စီက ဖယ်ခုံအနောက်ဘက်ကမ်းမှ လက်နက်ကြီးဖြင့် ရမ်းသမ်းပစ်ခတ်မှု ကြောင့် ညောင်ရွှေမြို့နယ် တောင်ပို့ကွဲ ကျေးရွာအတွင်းကို ကျရောက် ပေါက်ကွဲခဲ့ပြီး အသက် ၃၀ အရွယ်ရှိ အမျိုးသားတစ်ဦး ထိခိုက်ဒဏ်ရာရရှိခဲ့ကြောင်း သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။
“မနေ့ ထိသွားတဲ့ ဒေသခံကတော့ ညာဘက်လက်မှာ ထိသွားတယ်။လောလောဆယ်တော့အနားကို ချုပ်ထားရတယ်။ဖယ်ခုံအနောက်ကမ်းကနေ အရှေ့ကမ်းကို ပစ်တာပါ။ဘုရားတောင်ကျေးရွာကိုလည်း ပစ်တယ်။အဲ့ရွာ မှာတော့ လူထိခိုက်မှုမရှိခဲ့ဘူး။”ဟု ၎င်းကပြောသည်။
ထိုပြင် စစ်ကောင်စီက ည ၁၁ နာရီ ၂၀ မိနစ်တွင် လက်နက်ကြီးထပ်မံ ပစ်ခတ်မှုကြောင့် တောင်ပို့ကွဲ ကျေးရွာ မှ နေအိမ်တစ်လုံးမီး လောင်ကျွမ်း၍ပျက်စီးခဲ့ကြောင်း သိရသည်။
အလားတူ ယမန်နေ့ (ဖေဖော်ဝါရီလ ၁၃ ရက်) ညောင်ရွှေမြို့နယ် ၊ ရေပူကျေးရွာအုပ်စု ၊ ဘုရားတောင်ကျေးရွာ ကို စစ်ကောင်စီတို့က တိုက်ပွဲဖြစ်ပွားခြင်းမရှိဘဲ လက်နက်ကြီးများကို ရမ်းသမ်းပစ်ခတ်ခဲ့သည့်အတွက် နေအိမ်များ ပျက်စီခဲ့ရကြောင်း ဒေသခံများကပြောသည်။
စစ်ကောင်စီတပ်နှင့် တော်လှန်ရေးတပ်ဖွဲ့များအကြား စစ်ရေးတင်းမာနေလျက်ရှိသော ညောင်ရွှေ-ပင်လောင်း-ဖယ်ခုံအစပ်တွင် စစ်ကောင်စီတပ်နှင့် ပအိုဝ်းပြည်သူ့စစ် PNO တို့က ကျေးရွာထဲသို့ လက်နက်ကြီးဖြင့် နေ့စဉ် ရက်ဆက် ပစ်ခတ်နေသောကြောင့် ကျေးရွာ ၅ ရွာထပ်မနည်း နေရပ်စွန့်ခွာ၍ ထွက်ပြေးတိမ်းရှောင်နေရကြောင်း သိရသည်။
Leave a Comments