သျှမ်းပြည်တောင်ပိုင်း၊ ဆီဆိုင်မြို့နယ် ကျေးရွာအချို့တွင် ပအိုဝ်းပြည်သူ့စစ် (PNO)မှ အရပ်သားများကို မက်လုံးပေးကာ ကင်းစောင့်ခိုင်းနေသည်ဟု ဒေသခံများထံမှ သိရသည်။
ဆီဆိုင်မြို့နယ်ရှိ ကျေးရွာများကို စစ်ကောင်စီမှာ ရပ်ရွာအလိုက် အခြေခံ စစ်သင်တန်းပေးနေပြီး ရပ်ရွာလုံခြုံရေးအတွက်ဟုဆိုကာ တစ်အိမ်လျှင် တစ်ယောက်နှုန်းဖြင့် စစ်သင်တန်း (၅)ရက်မျှ တက်ရောက်ခဲ့ကြရသည်ဟု ဒေသခံ များက ပြောသည်။
ထိုကဲ့သို့ စစ်သင်တန်း တက်ရောက်ပြီးသူများကို PNOက ကျေးရွာတစ်ရွာလျှင် လူဆယ်ဦးကို ကျပ်(၅သိန်း) ဖြင့် ဆယ်ရက် ကင်းစောင့်ခိုင်းသည်ဟု ကိုယ်တိုင်ကင်းစောင့်ခဲ့သူတစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီက ကျေးရွာတွေလိုက်ပြီး စစ်သင်တန်း ပေးတာ။ ရပ်ရွာလုံခြုံရေးအတွက်ဆိုပြီး သင်ခိုင်းတာ။ ကင်းစောင့်ဖို့အတွက် တစ်ရွာကို (၁၀)ယောက်ခေါ်တယ်။ (၁၀)ရက်စောင့်ရတယ်။ တစ်ယောက်ကို (၅)သိန်းရတယ်။ အရင်က (၃သိန်း)ပဲ ရတာ။အခုက သူတို့ ပိုပေးလာတာ။” ဟု အဆိုပါ ကင်းစောင့်ခဲ့သည့် အမျိုးသားတစ်ဦးက ပြောသည်။
လွိုင်ကော်-ဆီဆိုင် သွားလမ်းနှင့် ပုန်းလောင်းဂိတ်နှင့် ဘုရားဖြူလမ်းခွဲ မြို့ရှောင်လမ်း ဂိတ်အပါအဝင် ဆီဆိုင်မြို့ အဝင်အထွက် ဂိတ်တို့တွင် ကင်းစောင့် ခဲ့ရသည်ဟု ၎င်းက ထပ်လောင်းပြောသည်။
ယခုကဲ့သို့ ကင်းစောင့်နေရခြင်းမှာ စားဝတ်နေရေး အဆင်မပြေသည့်အတွက် အခကြေးငွေယူပြီး လူစားထိုး ကင်းစောင့်ပေးနေရပြီး တိုက်ပွဲ မဖြစ်ရန် အတွက် မျှော်လင့်သည်ဟု အသက် (၃၀)အရွယ် အမျိုးသားတစ်ဦးက ပြောသည်။
“ကိုယ်ကင်းစောင့်တဲ့ အလှည့်မှာ ဘာမှ မဖြစ်ဖို့ပဲ မျှော်လင့်ရတာပဲ။ ပိုက်ဆံရလို့သာ လုပ်နေရတာ စိုးရိမ်စိတ်နဲ့ပဲ။ စားဝတ်နေရေးအဆင်မပြေတော့ ဒီလိုပဲ ငွေယူပြီး ကင်းစောင့်ပေးရတာပေါ့။” ဟု အဆိုပါ အမျိုးသားတစ်ဦးက ပြောသည်။
ဆက်လက်ပြီး ဆီဆိုင်မြို့နေ မနှင်းကလည်း “ အကိုဆိုရင် အဲလိုပဲ ငွေကြေးယူပြီး ကင်းစောင့်ပေးနေတာ။ နောင်ထောဝ်ဘက် ဂိတ်မှာစောင့်ရတာ။ သူ့တာဝန်ချိန်ပြည့်ပြီး ပြန်တော့မဲ့ အချိန်မှာ ရှေ့တန်းက PNOစစ်သားတွေက ပိုက်ဆံပေးပြီး လာခေါ်တော့ လိုက်သွားတာ။ အဲဒီမှာပဲ အတိုက်ခိုက်ခံရပြီး သေသွားတာ။အလောင်းတောင်ပြန်မရဘူး။” ဟု ဆိုသည်။
ထို့ပြင် PNOတပ်ဖွဲ့သည် စစ်ကောင်စီနည်းတူ အမျိုးသမီးများစစ်မှုထမ်းရန် အတွက် စာရင်းများ ကောက်ခံမည်ဖြစ်ကြောင်း သတင်းရရှိသည်ဟု ဒေသခံများထံမှ သိရသည်။
လက်ရှိ ဆီဆိုင်မြို့နယ်တွင် စစ်ကောင်စီနှင့် PNOတို့က တိုက်ပွဲဖြစ်ပွားခြင်း မရှိဘဲ လက်နက်ကြီးများဖြင့် ပစ်ခတ်ခြင်း ဗုံးကြဲခြင်းများ ပြုလုပ်နေသောကြောင့် ဒေသခံများ စိုးရိမ်နေကြောင်း သိရသည်။
Leave a Comments