သျှမ်းပြည် ကျောက်မဲ – ရပ်စောက်သွားသည့် လမ်းပိုင်းတွင် စစ်ကောင်စီ စစ်ဆေးရေးဂိတ်များတွင် စစ်ဆေးပြီး ငွေတောင်းခံမှုများ ယခင်ကထက်ပိုကြမ်းနေကြောင်း သတင်းရရှိသည်။

ကျောက်မဲမြို့မှ ရပ်စောက်မြို့ သို့သွားသည့် လမ်းပိုင်းရှိ စစ်ကောင်စီဂိတ်များသည် ပြီးခဲ့သည့် ဇန်နဝါရီလ‌ မှစတင်၍ စစ်ဆေးမှုများတင်းကြပ်နေပြီး ငွေတောင်းခံမှုများကြမ်းနေကြောင်း ကိုယ်တိုင်ကြုံတွေ့ခဲ့သည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီ ဂိတ်ပါပဲ ၂၀ ဂိတ်လောက်ရှိတယ်။ ခရီးသည် တစ်ယောက်ကို ၅ ထောင် တောင်းတာ။တချို့ ဂိတ်တွေက ၁ သောင်း လောက်ပေးရတယ်။ဂိတ်တွေကလည်းအရမ်းများတော့ လုံခြုံရေးအတွက်တောင် တော်တော်စိုးရိမ်ရတယ်”ဟု ကိုယ်တိုင်ကြုံတွေ့ခဲ့သည့် အမျိုးသမီးတစ်ဦးက ပြောသည်။

ထိုစစ်ကောင်စီ ဂိတ်များတွင် နိုင်ငံသားမှတ်ပုံတင်၊ ထောက်ခံစာများအပြင် ဖုန်းများကိုလည်း စစ်ဆေးမှုများ ပြုလုပ်ခဲ့ပြီး ခရီးသည်များအတွက် လုံခြုံရေးများလည်း စိုးရိမ်ရကြောင်းကို ကိုယ်တိုင်ကြုံတွေ့ခဲ့သည့် အမျိုးသမီးတစ်ဦးကဆက်ပြောသည်။

“ကားပေါ်ကနေ ခရီးသည်တွေကို ဆင်းခိုင်းပြီး စစ်တယ်မေးမြန်းတယ်။ဖုန်းတွေကလည်း အရမ်းစစ်တယ် အချိန်ယူပြီး စစ်တယ် ပုံတွေကအစ အကုန်စစ်တယ် ဂိတ်တိုင်းလိုလိုကို စစ်တယ်။ အရှေ့မှာစစ်ခဲ့ပြီးပြီ ပြောလည်းမရဘူး။ ထပ်စစ်တယ်။ပြီးတော့ အသေးစိပ်သူတို့သိချင်တာကို မေးတယ်။”ဟု ကိုယ်တိုင်ကြုံတွေ့ခဲ့သည့် အမျိုးသမီးတစ်ဦးကပြောသည်။

ထိုသို့ စစ်ဆေးမေမြန်းမှုများကြောင့် ခရီးသည်များအတွက် စိတ်အနှောက်အယှက်များဖြစ်စေပြီး၊ဗထူးမြို့ အဝင်ရှိ စစ်ကောင်စီ စစ်ဆေးရေးဂိတ်တွင်လည်း မူးယစ်၊လဝက ရဲနှင့် စစ်သားတို့ကလည်း ထပ်မံတင်ကြပ်စွာ စစ်ဆေးပြီး ငွေများတောင်းခံနေကြောင်း ၎င်းကပြောသည်။

ရပ်စောက်မြို့ရှိ စစ်ကောင်စီတပ်သည် သျှမ်းတောင်မှ သျှမ်းမြောက်သို့ တက်မည့် ကုန်ကားကြီးများကို ငွေကြေးဆောင်နိုင်မှသာ ဖြတ်သန်းခွင့်ပြုကြောင်း သိရသည်။

ပြီးခဲ့သည့် ဇန်နဝါရီလတွင် ဂိတ်ကိုဖြတ်လိုသည့် ကုန်တင်ကားများ၊ ခရီးသည်တင်ယာဉ်များသည် စစ်ကောင်စီတပ်မှ တောင်းသည့် ငွေပမာဏပေးနိုင်မှသာ သွားခွင့်ပြုပြီး စစ်ဆေးရေးလည်း ယခင်ကထက် ပိုတင်းကြပ်နေကြောင် သိရသည်။

ထိုပြင် ဇန်နဝါရီလတွင် ရပ်စောက်မြို့နယ်အတွင်းတွင် စစ်ကောင်စီ နှင့် ဓနုပြည်သူ့ လွတ်မြောက်ရေးတပ် DPLA တို့ တိုက်ပွဲဖြစ်ပွားပြီး စစ်ကောင်စီမှ လက်နက်ကြီး ပစ်ခတ်မှုများရှိခဲ့ကြောင်း သိရသည်။