သျှမ်းပြည်တောင်ပိုင်း၊ ညောင်ရွှေမြို့နယ် တောင်ပို့ကွဲကျေးရွာသို့ စစ်ကောင်စီမှ လက်နက်ကြီး ပစ်ခတ်မှုကြောင့် ဒေသခံ နှစ်ဦးသေဆုံးပြီး၊ နှစ်ဦး ထိခိုက်ဒဏ်ရာ ရသည်ဟု သတင်းရင်းမြစ်များထံမှ သိရသည်။
ယမန်နေ့ (ဖေဖော်ဝါရီလ ၁၂ ရက်) ညနေ (၅)နာရီ ဝန်းကျင်တွင် စစ်ကောင်စီနှင့် ပအိုဝ်းပြည်သူ့စစ် (PNO)တို့သည် ဖယ်ခုံ အနောက်ဘက်ကမ်းမှ လက်နက်ကြီး (၆)လုံးဖြင့် ပစ်ခတ်လာသဖြင့် ညောင်ရွှေမြို့နယ် တောင်ပို့ကွဲကျေးရွာအတွင်းသို့ ကျရောက်ပေါက်ကွဲပြီး ဒေသခံ (၂)ဦးသေဆုံးကာ (၂)ဦး ထိခိုက်ဒဏ်ရာ ရရှိခဲ့ကြောင်း ဒေသခံအမျိုးသးတစ်ဉီးက သျှမ်းသံတော်ဆင့်ကိုပြောသည်။
“မနေ့က လက်နက်ကြီး ပစ်လို့ နှစ်ဦးသေတယ်။ နှစ်ဦးက ဒဏ်ရာပြင်းထန်ရသွားတယ်။ နေအိမ်တွေလည်း ပျက်စီးတယ်။ စစ်ကောင်စီနဲ့ PNOပူးပေါင်းပြီး ကျေးရွာတွေကို လက်နက်ကြီးနဲ့ ထုနေတာ။ အခုတောင်ပို့ကွဲရွာကိုတော့ ပထမဆုံးကျတာပဲ။ ရွာသားတစ်ချို့တော့ ထွက်ပြေးကြတယ်။” ဟု ၎င်းဒေသခံအမျိုးသားက ဆိုသည်။
အဆိုပါ လက်နက်ကြီးကြောင့် အသက် (၁၀)နှစ်အရွယ်ရှိ စိုင်းလျန်၊ အသက်(၄၀) ကျော် အရွယ်ရှိ လုံးစိုင်းလုံ တို့ ထိုနေရာတွင် တင်ပွဲချင်းပြီး သေဆုံးကာ အသက် (၄၀)ကျော်အရွယ်ရှိ ဒေါ်နန်းဖန် နှင့် ဦးကျား တို့သည် ခြေထောက်နှင့် လက်တွင် ပြင်းထန်ဒဏ်ရာ ရရှိခဲ့သည်။
ဖယ်ခုံနှင့် ညောင်ရွှေ နယ်စပ်တွင် စစ်ကောင်စီ၊ PNOနှင့် တော်လှန်ရေး အင်အားစုတို့ တိုက်ပွဲ ဖြစ်ပွားနေပြီး စစ်ကောင်စီဖက်မှ ကျေးရွာများကို လက်နက်ကြီးဖြင့် မကြာခဏ ပစ်ခတ်နေသည်ဟု ၎င်းအမျိုးသားက ပြောသည်။
ထို့ပြင် (ဖေဖော်ဝါရီလ ၁၂ ရက်) နေ့ ညနေ ၅ နာရီတွင်လည်း ပင်လောင်းမြို့နယ်၊ နန်းတုတ်ကျေးရွာကို စစ်ကောင်စီနှင့် PNOတို့က ဘီလူးချောင်း အနောက်ဖက်ကမ်း လွယ်ဖြီးမှ နေ၍ မီးလောင်ဗုံးအပါဝင် လက်နက်ကြီး (၈) လုံးဖြင့် ပစ်ခတ်ခဲ့သောကြောင့် လူထိခိုက်မှု မရှိသော်လည်း နေအိမ် (၂)လုံးပျက်စီးသွားသည်။
ဖေဖော်ဝါရီ ၁၁ရက်တွင်လည်း ပအိုဝ်းပြည်သူ့ စစ်(PNO)သည် ညောင်ရွှေမြို့နယ် သပြေကုန်းကျေးရွာအုပ်စုရှိ လူငယ်များကို စစ်သားစုဆောင်းကာာ စစ်သင်တန်း (၅)ရက်ပေး၍ အင်အား(၈၀၀)ဖြင့် စစ်သင်တန်းဆင်းပွဲကို ပြုလုပ်ခဲ့သည်။
ထိုသင်တန်းဆင်းပြီး ရက်ပိုင်းတွင် သင်တန်းဆင်းပွဲပြုလုပ်သည့် သပြေကုန်းကျေးရွာ နှင့် (၇)မိုင်မျှသာဝေးကာသည့် တောင်ပို့ကွဲကျေးရွာ လက်နက်ကြီးကျ အရပ်သားသေဆုံးသည့်အထိ ဖြစ်ပွားလာရသည်။
PNO သင်တန်းပေးပြီး လက်နက်မဲ့သင်တန်းသား (၈၀၀)ခန့်ကို PNO နှင့် စစ်ကောင်စီတို့က သျှမ်း-ကရင်နီ နယ်စပ်တကြောရှိ ဂိတ်များတွင် စောင့်ဆိုင်းနေရကြောင်းသိရသည်။
“သူတို့ကတော့ သင်တန်းဆင်းပြီးရင် ဂိတ်စောင့်ရုံပဲ ပြောတာ။ တစ်ချို့ကျတော့လည်း ရှေ့တန်းကို ပို့လိုက်တာ။ သင်ထားတာကမှ အခြေခံ ပြေးနည်း (၅)ရက်ဆိုတော့ ဘယ်လိုကာကွယ်ရမယ်ဆိုတာတောင် သိကြမှာ မဟုတ်ဘူး။ သင်တန်းဆင်းပြီးပွဲပြီးတော့ လက်နက်ကြီးနဲ့ ရွာတွေကို ထုတော့တာပဲ။” ဟု အဆိုပါ ဒေသခံတစ်ဦးက ပြောသည်။
ဖေဖော်ဝါရီလ အတွင်း ညောင်ရွှေမြို့နယ်တွင် လက်နက်ကြီးကြောင့် ကလေးတစ်ဦး အပါပဝင် လက်နက်ကြီးကြောင့် အရပ်သား (၅)ဦးသေဆုံးပြီး စစ်ရေးတင်းမာမှုရှိနေသာကြောင့် နန်းတုပ်၊ ဘုရားတောင်၊ ရေပူနှင့် ညောင်လေးပင်စသည့် ကျေးရွာမှ ဒေသခံများ စစ်ဘေးတိမ်းရှောင်နေကြရသည်။
Leave a Comments