သျှမ်းပြည်မြောက်ပိုင်း မူဆယ်မြို့ စွမ်းစော်ရပ်ကွက်ရှိ ဖုန်းဆိုင်တစ်ဆိုင်ကို အမည်မသိလက်နက်ကိုင် ၅ ဦး ဝင်ရောက် ဓားပြတိုက်သွားကြောင်း စုံစမ်းသိရသည်။

ပြီးခဲ့သည့် (ဖေဖော်ဝါရီ ၇ ရက်) ညနေပိုင်း ၉နာရီဝန်းကျင်တွင် မြို့အတွင်းရှိ စွမ်စော်ရပ်ကွက် ဖုန်းဆိုင်တစ်ဆိုင်တွင် အမည်မသိလက်နက်ကိုင် ၅ ဦးသည် သေနတ်ကိုင်ဆောင်ထားပြီး ဆိုင်အတွင်းရှိ ဖုန်းနှင့် ပိုက်ဆံကို ယူဆောင်သွားကြောင်း မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဟုတ်တယ် ၇ ရက်နေ့ ညနေပိုင်းအချိန်မှာ ဖြစ်သွားတာ။ ကျနော်တို့လည်း အတက်နိုင်ဆုံး လိုက်လံစုံစမ်းပေမဲ့ ဘာမမထူးလာဘူး။ ဆိုင်ပိတ်ချိန်က နည်းနည်းနောက်ကျတယ်ပြောရမယ်။ လူ ၅ ယောက် သေနတ်ထောင်ပြီး ဆိုင်အနောက်ပေါက်ကနေ ဝင်လာတာ ဖုန်းနဲ့ ပိုက်ဆံတွေတော့ အကုန်မသွားတယ်။ လူကိုဘာမမလုပ်လို့ တော်သေးတယ်”ဟု ၎င်းက ပြောသည်။

လက်ရှိတွင် နိုင်ငံရေး အခြေနေအရ တရုတ်- မြန်မာ ကျားဖြန့်လုပ်ငန်းနှင့် ငွေလဲလှယ်သူများ၊ ဆိုင်ကြီးဖွင့်ထားသူ အနေဖြင့်လည်း သူခိုး ဓားပြများကိုလည်း သတိထားရမည်ဖြစ်ကြောင်း မူးဆယ်ဒေသခံ များက ပြောဆိုသည်။

ထို့အပြင် မူဆယ်မြို့တွင် မကြာခဏ ဓားပြတိုက်နေသည့် သူများသည် အဖွဲ့လိုက်ရှိကာ အုပ်စုလိုက် လူအပြောင်းလဲ လုပ်နေကြကြောင်း၊ တစ်အုပ်စုတွင် ၁၀ ယောက် သိုမဟုတ် ၅ ယောက်အုပ်စုလိုက် ရှိနေသည်ဟု မူဆယ်ဒေသခံ အသက် ၄၀ နှစ် အရွယ်ရှိ အမျိုးသားတစ်ဦးက ပြောသည်။

“ဒီလဝက်ထဲကို ဓားပြတိုက်တာ အပစ်ခံရတာတွေ မနည်းတော့ဘူး ၅ ခါလောက်ရှိနေပြီ။ တချို့ဆို သတင်းပေးမထွက်တာမျိုးတွေရှိတယ်။ ပြောချင်တာက တချို့ဆိုင်တွေ သတိမရှိကြတာ ညနေ ၅ နာရီဆိုသူများတွေပိတ်ပြီ သူတို့က မပိတ်ပဲ နေနေတော့ ခိုးမဲ့လူတွေအတွက် အခွင့်ကောင်းဖြစ်သွားတယ်”ဟု ၎င်းက ပြောသည်။

ထို့အပြင် ပြီးခဲ့သည့် (ဇန်နဝါရီ ၁၈ ရက်)နေ့ ညနေပိုင်းတွင် မူဆယ်မြို့ ကောင်းမူးတုံရပ်ကွက် မီးသတ်ရုံအနီးရှိ ကုန်စုံဆိုင်ကြီးတစ်ဆိုင်ကိုလည်း ပြည်သူ့စစ်ဟန်ဆောင်ထားသော အမျိုးသား(၃)ဉီးသည် လက်နက်ကိုင်ပြီး ဆိုင်ပိုင်ရှင် အမျိုးသမီး ကို ပြန်ပေးဆွဲသွားခဲ့ကြောင်း သိရသည်။

မြန်မာ-တရုတ် နယ်စပ်ဒေသဖြစ်သည့် မူဆယ်မြို့တွင် စစ်ကောင်စီလက်အောက်ခံ ပြည်သူ့စစ်အဖွဲ့ပေါင်း (၂၀) ကျော်ထက်မနည်း ရှိနေပြီး တရားဥပဒေစိုးမိုးမှု ကင်းမဲ့ကာ တရားမဝင် စီးပွားရေးနှင့် မူးယစ်ဆေးဝါးများ စုံလင်ပေါများခြင်းကြောင့် သေနတ်ပစ်ခတ်မှုများ မကြာခဏ ဖြစ်ပွားနေပြီး အမှုမှန်ပေါ်ပေါက်ခြင်း မရှိကြောင်း ဒေသခံများက ပြောသည်။