သျှမ်းပြည်မြောက်ပိုင်း ဟိုပန်မြို့တွင် “ဝ” ပြည်သွေးစည်းညီညွတ်ရေး တပ်မတော် (UWSA) သည် ရုံးဆောက်ရန် အတွက် ပြည်သူပိုင် လယ်ယာမြေပေါ်ရှိ ရော်ဘာပင်များကို ခုတ်ထွင်ရှင်းလင်းလိုက်ကြောင်း ဒေသခံများထံ စုံစမ်းသိရသည်။
ဟိုပန်မြို့ ရုံးကုန်းရပ်ကွက်အနီးတွင် ရှိသော ပြည်သူများ၏ မြေကွက် စုစုပေါင်း ၁၁ ခုကျော် ( ၂ ဧက နီးပါး) ကို “ဝ” တပ်ဖွဲ့ UWSA က သိမ်းယူရန် ပြင်ဆင်နေခဲ့ခြင်းဖြစ်ကြောင်း ဒေသခံများကပြောသည်။
ဖေဖော်ဝါရီလ ၇ ရက်နေ့မှစတင်ပြီး “ဝ” တပ်ဖွဲ့ UWSA ၏ တပ်သားများက အတင်းအဓမ္မ ဝင်ရောက်ပြီး ထိုလယ်ယာမြေပေါ်ရှိ ရော်ဘာပင်များကို ပိုင်ရှင်များ၏ ဆန္ဒမပါဘဲ ခုတ်ထွင်ရှင်းလင်းခဲ့ကြောင်း ကာယကံရှင်တစ်ဦးက သျှမ်းသံတော်ဆင့်ကို ပြောသည်။
“ဒီမြေက ကျမတို့အဘိုးအဘွားပိုင်မြေ။ ကျမတို့ နေထိုင်လာတာက နှစ်ပေါင်း ၅၀ ကျော်ပြီ။’ ဝ’က သူတို့ရုံးစိုက်ချင်တယ်ဆိုပြီး ကျမတို့ကိုပြောတာ။ ကျမတို့လည်း ညှိနှိုင်းမှုလုပ်တယ်။ သူတို့က ကျမတို့ကို (၁၄၃) တပ်ရင်းထဲက မြေကိုပေးတယ်။ ကျမတို့က အဲ့နေရာကို မကြိုက်ပါဘူး။ ကျမတို့က ညှိနှိုင်းပေးဖို့ တောင်းဆိုတယ်။ ကျမတို့ ညှိနှိုင်းလို့မပြီးသေးတဲ့ခင်မှာဘဲ သူတို့က ဒီလိုလာလုပ်တာ” ဟု ၎င်းကပြောသည်။
လက်ရှိ “ဝ” တပ်ဖွဲ့ UWSA မှ သိမ်းယူရန် ပြင်ဆင်နေသော မြေကွက်များ စုစုပေါင်း ၁၁ မူကျော် ( ၂ ဧကနီးပါး) ရှိပြီး ဒေသခံများ၏ ရော်ဘာခြံအပါအဝင် အိမ်ထောင်စု (၈) စု ပိုင်ဆိုင်သော မြေကွက်များအား ပါဝင်ထားကြောင်း ဆိုသည်။
မြေသိမ်းခံရသည့် အမျိုးသားတစ်ဦးကတော့ အဆိုပါမြေကွက်များအား ခက်ခက်ခဲခဲဖြင့် ဝယ်ယူထားသောကြောင့် ယခုကဲ့သို့ သိမ်းယူလိုက်သည့်အပေါ် လက်မခံနိုင်ကြောင်း ပြောသည်။
“ဒီမြေကွက်ကို ကျနော်တစ်ယောက်ထဲ ပိုင်ဆိုင်တာမဟုတ်ပါဘူး။ ကျနော်တို့ မိသားစုတွေထဲက တစ်ယောက် နည်းနည်းနဲ့ ဒီမြေကွက်လေးကို ရအောင်ရှာထားရတာ။ ယူမယ်ဆိုလို့ရှိရင် ဒီမြေကွက်ကို သင့်တော်တဲ့အနေထားမျိုး ပြန်ပေးနိုင်ရင်တော့ ကျနော်တို့က လက်ခံလို့ရတာပေါ့”ဟု ၎င်းကပြောသည်။
ထို့ပြင် မြေကွက်များအားလုံး သိမ်းယူပြီး လျော်ကြေးအဖြစ် ပြန်ပေးမည်ဆိုသော်လည်း လက်ရှိအခြေအနေတွင် မြေကွက်ပြန်လည် ဝယ်ယူရန်မလွယ်တော့သဖြင့် နှစ်ဦးနှစ်ဖက်ပြေလည်အောင် ညှိနှိုင်းပေးစေလိုကြောင်း ဆိုသည်။
အဆိုပါ လယ်ယာမြေကိစ္စနှင့် ပတ်သက်ပြီး အစိုးရနှင့် လူထုကြား အဆင်မပြေမှုများ ဖြစ်ခဲ့သည့်အပေါ် ဗဟိုနှစ်ချုပ် အစည်းအဝေးအပြီး မြေရှင်တွေကို ထပ်မံခေါ်ယူကာ ညှိနှိုင်းဖြေရှင်းပေးရန် ရှိသည်ဟု UWSA ၏ ပြင်ပဆက်ဆံရေး တာဝန်ခံ ဦးညီရမ်းက သျှမ်းသံတော်ဆင့်ကို ပြောသည်။
” အခုရက်ပိုင်း ဗဟိုနှစ်ချုပ်အစည်းအဝေး လုပ်နေကြတာမို့ ပြီးသွားရင် ထပ်ခေါ်ယူညှိနှိုင်းဖြေရှင်းပေးမယ်လို့ သိရပါတယ်” ဟု ဦးညီရမ်းက ပြောသည်။
“ဝ” တပ်ဖွဲ့ UWSA မှ ရုံးဆောက်လုပ်ရန် ပြင်ဆင်ထားသော ထိုနေရာသည် ဟိုပန်မြို့ ရုံးကုန်းရပ်ကွက်ရှိ ဘောလုံးကွင်း၏ အနောက်ဖက်တွင် တည်ရှိကြောင်း သိရသည်။
Leave a Comments