သျှမ်းပြည် မိုင်းရယ်မြို့နယ် မိုင်းဟဒေသတွင် ကျားဖြန့်လုပ်ကိုင်သူ ဗီယက်နမ်နှင့် တရုတ်နိုင်ငံသားများ အပါအဝင် လူ (၁၀၀) ကျော်ကို စစ်ကောင်စီတပ်မှ ဖမ်းဆီးခဲ့ကြောင်း စုံစမ်းသိရသည်။

ဖေဖော်ဝါရီလ (၅) ရက်မှ (၉) ရက်အတွင်း မိုင်းရယ်မြို့နယ် မိုင်းဟဒေသရှိ မုံးဟ-မုံးဟင်းပြည်သူ့စစ် နယ်မြေတွင် ဖွင့်လှစ်လုပ်ကိုင်နေသည့် အွန်လိုင်းကျားဖြန့် ငွေလိမ်ဂိုဏ်းများကို စစ်ကောင်စီတပ်မှ ဝင်ရောက်ဖမ်းဆီးခဲ့ရာ ဗီယက်နမ်နှင့် တရုတ်နိုင်ငံသား အပါအဝင် (၁၀၀) ကျော် ဖမ်းဆီးရမိခဲ့ကြောင်း ဒေသခံများက ပြောသည်။

“ရှေ့တစ်ခေါက်က ဖမ်းတဲ့ဟာပဲ၊ စုစုပေါင်း (၁၀၀) ကျော် ဖမ်းမိတယ်ပြောတယ်။ အခုထပ်ဖမ်းတာတော့ ဘာသံမှ မကြားရဘူး၊ လက်ကျန်တွေ လိုက်ဖမ်းတဲ့ပုံစံပေါ့။ နောက်ထပ် (၂၁) ယောက် ဖမ်းမိတာ အကုန်လုံး တရုတ်တွေပဲ”ဟု မိုင်းရယ်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဖေဖော်ဝါရီလ (၅) ရက်မှ စတင်ပြီး မိုင်းရယ်မြို့နယ် စစ်ကောင်စီတပ်မှ မိုင်းရယ်နှင့် မိုင်းကောင်ဘက် စစ်ကြောင်းနှစ်ခုခွဲကာ မိုင်းဟဒေသ နောင်ဟန်ကျေးရွာတဝိုက်ရှိ အွန်လိုင်းကျားဖြန့် (၅) နေရာထက်မနည်းကို အင်အားသုံး ဝင်ရောက်ဖမ်းဆီးခဲ့ခြင်းဖြစ်ပြီး ကျားဖြန့်လုံခြုံရေးအဖွဲ့များနှင့်လည်း အပြန်အလှန် ထိတွေ့တိုက်ပွဲ ဖြစ်ပွားခဲ့သည်။

မိုင်းဟဒေသတွင် စစ်ကောင်စီတပ် ဝင်ရောက်ဖမ်းဆီးခဲ့သည့် ကျားဖြန့်ရုံများမှ တရုတ်နိုင်ငံသား အမျိုးသား (၂၇) ဦးနှင့် အမျိုးသမီး (၂) ဦး၊ ဗီယက်နမ်နိုင်ငံသား အမျိုးသမီး (၁၈) ဦး၊ မြန်မာနိုင်ငံသား အမျိုးသား (၅) ဦးနှင့် အမျိုးသမီး (၂၉) ဦး၊ စုစုပေါင်း (၈၁) ဦး ဖမ်းဆီးရမိခဲ့ကြောင်း စစ်ကောင်စီဘက်မှ ဖေဖော်ဝါရီ (၇) ရက်တွင် သတင်းထုတ်ပြန်သည်။

အလားတူ ဖေဖော်ဝါရီ (၉) ရက် ဖမ်းဆီးမှုအတွင်း အွန်လိုင်းကျားဖြန့် လုပ်ကိုင်သည့် တရုတ်နိုင်ငံသား (၂၁) ဦးကို ထပ်မံဖမ်းဆီးမိခဲ့ရာ တစ်ပတ်အတွင်း စုစုပေါင်း (၁၀၂) ဦးကို ဖမ်းဆီးရမိခဲ့ခြင်းဖြစ်သည်။

၎င်းဖမ်းဆီးရမိသူများကို စစ်ကောင်စီဘက်မှ တရားစွဲဆို အရေးယူရန် စစ်ဆေးလျက်ရှိပြီး ဗီယက်နမ်နှင့် တရုတ်နိုင်ငံသားများကို သက်ဆိုင်ရာနိုင်ငံသို့ ပြန်လည်လွှဲပြောင်းပေးနိုင်ရေး ဆောင်ရွက်မည်ဖြစ်ကြောင်း ထုတ်ပြန်ချက်အရ သိရသည်။

ယခုကဲ့သို့ ကျားဖြန့်လုပ်ကိုင်သည့် နေရာများကို စစ်ကောင်စီဘက်က တိုက်ပွဲဖော်ဆောင်ကာ အင်အားသုံး ဖမ်းဆီးခဲ့သော်လည်း မိုင်းရယ်မြို့နယ်ရှိ ပြည်သူ့စစ်ထိန်းချုပ် နယ်မြေအတွင်း ရွှေ့ပြောင်းလုပ်ကိုင်နေသည့် ကျားဖြန့်ရုံ အများအပြား ကျန်ရှိနေသေးကြောင်း ဒေသခံများက ပြောသည်။

သျှမ်းပြည်မြောက်ပိုင်းတွင် စစ်ကောင်စီ ထိန်းချုပ်ထားနိုင်သည့် တန့်ယန်းနှင့် မိုင်းရယ်မြို့နယ်တို့တွင် ‘ဝ’တပ်ဖွဲ့ UWSA ၊ သျှမ်းတပ် SSPP/SSA ၊ ကိုးကန့်တပ် MNDAA တို့လည်း တပ်စွဲထားပြီး အွန်လိုင်းငွေလိမ် ကျားဖြန့်လုပ်ငန်း အများအပြားကို ထိန်းချုပ်နိုင်ခြင်းမရှိဘဲ ဆက်လက်ကြီးထွားလျက်ရှိကြောင်း ဒေသခံများက ပြောသည်။