ထိုင်းနိုင်ငံမှ မြန်မာနိုင်ငံသို့ တင်ပို့နေသော စက်သုံးဆီများ ရပ်ဆိုင်းလိုက်ပြီး‌နောက် သျှမ်းပြည် အရှေ့ပိုင်းတကြော စက်သုံးဆီ စျေးနှုန်း အဆမတန် မြင့်တက်လာကြောင်း စုံစမ်းသိရသည်။

ထိုင်းနိုင်ငံမှ ကျားဖြန့်(အွန်လိုင်းလောင်းကစား)များနှိမ့်နင်းရေးဆိုသည့်ခေါင်းစဉ်ဖြင့် မြန်မာ-ထိုင်းနိုင်ငံ နယ်စပ်သို့ တင်ပို့နေသော လောင်စာဆီ၊ အင်တာနက်လိုင်းနှင့် လျှပ်စစ်မီးများကို ယမန်နေ့ (ဖေဖော်ဝါရီ ၅)ရက် နံနက်ပိုင်းမှစတင်ပြီး ဖြတ်တောက်ခဲ့သည်။

ထို့ကြောင့် သျှမ်းပြည် အရှေ့ပိုင်းဒေသ တကြောတွင် စက်သုံးဆီများကို အလုအယက်ဝယ်ယူမှုကြောင့် စက်သုံးဆီဆိုင်အကြီးများ ပိတ်ထားရသည့်အဆင့်ဖြစ်သွားသည့်အပြင် မြန်မာနိုင်ငံသို့ တင်ပို့မည့် စက်သုံးဆီများလည်း ထိုင်းနိုင်ငံ မယ်ဆိုင်မြို့ဘက်ခြမ်းတွင် သောင်တင်နေကြောင်း တာချီလိတ်မြို့ ဒေသခံများပြောပြချက်အရသိရသည်။

ထိုအဖြစ်အပျက်များကြောင့် လက်ရှိတွင် တာချီလိတ်မြို့အတွင်း စက်သုံးဆီများ ဝယ်ယူရန် ခက်ခဲသွားပြီး၊ စက်သုံးဆီများကို ရေသန့်ဗူးထဲတွင် ထည့်ပြီး တစ်လီတာလျှင် ဘတ် (၁၀၀) မြန်မာငွေကာလပေါက်စျေး ၁၃၅၀၀ ကျပ်ထိရှိကြောင်း တာချီလိတ်မြို့ ဒေသခံ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

အိမ်ရဲ့ လမ်းကြားလမ်းရှေ့မှာတောင် ဝယ်ထာတဲ့ ဆီတွေကို ဈေးပြန်တင်ရောင်းနေ တာရှိတယ်။ အဲ့ကိုကာကိုလာ ဗူးကြီး (၁လီတာရှိ) နဲ့ ပြန်ရောင်းနေတာ အပြည်လည်းမပါဘူး။အဲ့တာတစ်ဗူးကို ၁၀၀ ဘတ်က နေ ၂၀၀ ဘတ်လောက်ပေးရတယ်။ “ဟု ၎င်းအမျိုးသမီး ကပြောသည်။

လက်ရှိ တာချီလိတ်မြို့အတွင်း စက်သုံးဆီဆိုင်အများစု ပိတ်ဆိုင်းထားရပြီး၊ အချို့ စက်သုံးဆီဆိုင်များသည် ဆိုင်ကယ်၊ ကားဖြင့် ကိုယ်တိုင်လာဝယ်လျှင် ထည့်ပေးကြောင်း၊ သို့သော်ကား၊ဆိုင်ကယ်တန်းရှည်သဖြင့် အလွန်ပင် အခက်တွေ့နေရကြောင်းလည်း ၎င်းအမျိုးသမီး ဆိုသည်။

တာချီလိတ်မြို့တွင် ယခင် စက်သုံးဆီ တစ်လီတာလျှင် ဘတ် ၃၀ ဝန်းကျင်တွင်ရှိပြီး လက်ရှိတွင် စက်သုံးဆီတစ်လီတာလျှင် ဘတ် ၁၀၀ နှင့် အထက်ပေးဝယ်နေရကြောင်း ဒေသခံများကပြောသည်။

အလားတူ မိုင်းဆတ်မြို့နယ် နှင့် မိုင်းတုံမြို့နယ်တို့တွင်လည်း စက်သုံးဆီများကို အလုအယက် ဝယ်ယူနေကြ ပြီး ပုံးဖြင့်ရောင်းချမှုကို ပိတ်ပင်လိုက်သည့်အပြင် ယမနေ့ ဖေဖော်ဝါရီလ ၅ ရက်တွင် စက်သုံးဆီရောင်းသည့် အမျိုးသားတစ်ဦးကို ဖမ်းဆီးခံရသည်။

ထိုင်နိုင်ငံမှလာသော စက်သုံးဆီများကို မယ်ဆိုင်မြို့မှ တစ်ဆင့် မြန်မာနိုင်ငံ တာချီလိတ် ၏ မြန်မာ – ထိုင်း ချစ်ကြည်ရေး တံတားမှ သယ်ယူပို့ဆောင်မှုများပြုလုပ်ခဲ့ပြီး၊လက်ရှိတွင် စက်သုံးဆီတင်သွင်းမှုကို ပိတ်ပင်ထားသည့်အတွက် ဆီဘောက်ဆာကားများ မယ်ဆိုင်ဘက်ခြမ်းတွင် ရပ်ထားရကြောင်း သိရသည်။

ကျားဖြန့်ငွေလိမ်ဂိုဏ်းနှိမ်နင်းရေးအတွက် ရည်ရွည်ပြီး ထိုင်းအာဏာပိုင်များမှ ထိုင်း-မြန်မာ နယ်စပ် ၅နေရာတွင် လျှပ်စစ်မီးနှင့် လောင်စာဆီ တင်ပို့မှုကို ရုတ်တရတ်ပိတ်ချလိုက်ခြင်းဖြစ်ပြီး တာချီလိတ်၊ မြဝတီနှင့် ဘုရားသုံးဆူနယ်စပ်တို့ ပါဝင်သည်။