သျှမ်းပြည်မြောက်ပိုင်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နောင်ချိုမြို့တွင် စစ်ကောင်စီမှ ဗုံးကြဲတိုက်ခိုက်မှု အပြင်းအထန်ပြုလုပ်နေပြီး ဒေသခံ ၁ဦး ဒဏ်ရာရရှိနေကြောင်း စုံစမ်းသိရသည်။
ယနေ့ (ဖေဖော်ဝါရီ ၆ ရက်) နံနက် ၁၀ နာရီခွဲဝန်းကျင်တွင် နောင်ချိုမြို့ရှိ သပြေတောင်ဘုရားကုန်းကို စစ်ကောင်စီတပ်က လေယာဉ်နှင့် ဗုံးကြဲတိုက်ခိုက်ခဲ့ရာ ဘိုးဘွားရိပ်သာ အဆောက်အဦး ထိခိုက်ပျက်စီးပြီး အရပ်သား (၁) ဦး ဒဏ်ရာရရှိထားကြောင်း နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီမနက်ပိုင်းမှာပဲ လေယာဉ်နဲ့ လာကြဲသွားတယ်၊ တစ်ဦးထိမှန်တယ် ပြောတယ်။ သပြေတောင်ဘုရားကုန်းဘက်က ဘိုးဘွားရိပ်သာမှာ လာချသွားတယ်။ စစ်တပ်က သူတို့ လာချင်တဲ့အချိန် လာချသွားတယ်။ နောင်ချိုမှာလည်း သေဆုံးတွေ အရမ်းများလာပြီ၊ ဒါကိုလည်း ဘယ်သူမှ တာဝန်ယူပေးတာမျိုး မရှိကြဘူး။ ခုဆို ကြောက်နေရတယ်”ဟု ၎င်းဒေသခံ အမျိုးသားက ပြောသည်။
လက်ရှိ နောင်ချိုမြို့နယ်တွင် TNLA ထိန်းချုပ်ထားသည့် တောင်ခမ်းကျေးရွာရှိ တပ်စခန်းနေရာတွင် စစ်ကောင်စီတပ်နှင့် TNLA တို့အကြား တိုက်ပွဲဆက်လက် ပြင်းထန်နေပြီး စစ်ကောင်စီတပ်မှ လက်နက်ကြီးသုံးပြီး တိုက်ခိုက်မှု ပိုမိုပြုလုပ်နေကြောင်း နောင်ချိုဒေသခံက ဆက်ပြောသည်။
“တိုက်ပွဲကတော့ ဆက်လက်ပြင်းထန်နေတာမျိုးတော့ ရှိနေသေးတယ်။ ၂ ရက်နေ့တုန်းဆို လက်နက်ကြီး ပစ်ခတ်တာတွေ တော်တော်များတယ်။ အခု ရက်ပိုင်းလောက်တော့ အသံတွေ ငြိမ်သွားတာမျိုးတွေရှိတယ်။ တိုက်ပွဲကလည် ကြာနေပြီ၊ စစ်တပ်ကတော့ ပြန်လည် ဆုတ်ခွာတာမျိုး ရှိမှာ မဟုတ်ဘူး”ဟု ၎င်းက ပြောသည်။
ပြီးခဲ့သည့် ဇန်နဝါရီ (၂၆) ရက်ကလည်း TNLA ထိန်းချုပ်ထားသည့် နောင်ချိုမြို့ အုမ္မတီးကျေးရွာကို စစ်ကောင်စီတပ်မှ ရှော့တိုက်ဒုံးဖြင့် နေအိမ် အလုံး ၂၀ ဝန်းကျင်ကို မီးရှို့ဖျက်ဆီးခဲ့ကြောင်း သိရသည်။
စစ်ကောင်စီတပ်သည် TNLA ထိန်းချုပ်ထားသည့် နောင်ချိုမြို့နှင့် ကျောက်မဲမြို့တွင် နေ့စဉ်နှင့်အမျှ ဗုံးကြဲတိုက်ခိုက်မှုများ ထပ်မံပြုလုပ်လာနေပြီး သေဆုံးသူလည်း ပိုမိုများပြားလာနေကြာင်း ဒေသခံပြောပြချက်အရ သိရသည်။
ကိုးကန့်တပ်ဖွဲ့ MNDAA နှင့် စစ်ကောင်စီတို့ ဇန်နဝါရီ (၁၈) ရက်မှ စတင်ပြီး တရားဝင် အပစ်အခတ် ရပ်စဲကြောင်း တရုတ်နိုင်ငံဘက်မှ ထုတ်ဖော်ပြောကြားခဲ့ပြီးနောက် ညီနောင်မဟာမိတ်ဖြစ်သည့် TNLA ထိန်းချုပ်နယ်မြေထဲ စစ်ကောင်စီက လေကြောင်းဖြင့် ပြန်လည်ထိုးစစ်ဆင်ကာ TNLA ကို ဖိအားပေးနေကြောင်း နိုင်ငံရေးလေ့လာသုံးသပ်သူများက ပြောဆိုသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments