သျှမ်းပြည် ညောင်ရွှေမြို့နယ် ဘုရားတောင် လွယ်နွဲ့ကျေးရွာနှင့် စစ်ရှောင်စခန်းကို စစ်ကောင်စီတပ်နှင့် ပြည်သူ့စစ် PNO တို့သည် လက်နက်ကြီးဖြင့် ပစ်ခတ်မှုကြောင့် ပြည်သူ ၂ ဦးသေဆုံးကာ ၇ ဦး ဒဏ်ရာရရှိခဲ့ကြောင်း စုံစမ်းသိရသည်။

ယနေ့ ဖေဖော်ဝါရီလ ၅ ရက် နံနက် ၇ နာရီကျော်အချိန်တွင် စစ်ကောင်စီတပ်နှင့် ပြည်သူ့စစ် PNO တို့သည် အင်းအနောက်ဘက်ခြမ်းရှိ သစ်ပင်ကောက်ရွာမှနေ၍ ရည်ရွယ်ချက်ရှိရှိ လက်နက်ကြီးဖြင့် ပစ်ခတ်လာခြင်းကြောင့် ဘုရားတောင် လွယ်နွဲ့ကျေးရွာသို့ ကျရောက်ပေါက်ကွဲခဲ့ကြောင်း ဒေသခံတစ်ဦးက ပြောသည်။

ပင်လောင်းမြို့နယ် သစ်ပင်ကောက်ရွာသည် ဘုရားတောင် လွယ်နွဲ့ကျေးရွာနှင့် အင်းရေကန်တစ်ခု ခြားထားသည်။

“အခုရွာမှာက စစ်ရှောင်နဲ့ ရွာခံပြည်သူတွေပဲရှိတာပါ။ သူတို့က ရည်ရွယ်ချက်ရှိရှိကို ပစ်တာ” ဟု ဘုရားတောင် လွယ်နွဲ့ကျေးရွာ ဒေသခံတစ်ဦးက ပြောသည်။

ယင်းတိုက်ခိုက်မှုအတွင်း အသက် ၇၄ နှစ်အရွယ် ဦးပြားသည် ပွဲချင်းပြီး သေဆုံးကာ အသက် ၂၇ နှစ် မေသူဆွေနှင့် အသက် ၄၈ နှစ် မမီးပုံ့ တို့မှာ ဒဏ်ရာရရှိခဲ့ကြောင်း ဆိုသည်။

အလားတူ ယနေ့ နံနက်ပိုင်း ၉ နာရီဝန်းကျင်တွင် ဘုရားတောင် စစ်ဘေးရှောင်စခန်းကို စစ်ကောင်စီတပ်နှင့် PNO တို့သည် လက်နက်ကြီးဖြင့် ထပ်မံပစ်ခတ်ခဲ့ခြင်းကြောင့် စစ်ဘေးရှောင်စခန်းတွင် နေထိုင်သော အသက် ၄၄ နှစ် ကိုဖိုးဝလည်း ပွဲချင်းပြီးသေဆုံးခဲ့ရသည်။

ထို့ပြင် အသက် ၅၇ နှစ် ဦးကျော်သည်လည်း ပြင်းထန်စွာ ဒဏ်ရာရရှိပြီး ဒေါ်ငဲသီ၊ ကျော်စွာဝင်း၊ ကိုးသားပု၊ ကိုလွမ်းမို့တို့မှာ ဒဏ်ရာအသီးသီး ရရှိခဲ့သည်။

လက်ရှိ ညောင်ရွှေမြို့နယ် ဘုရားတောင် လွယ်နွဲ့ကျေးရွာအတွင်း နေထိုင်သော စစ်ဘေးရှောင်များနှင့် ဒေသခံပြည်သူများသည် လက်နက်ကြီး ကျပေါက်ကွဲမှုကြောင့် လုံခြုံရေးစိုးရိမ်ပြီး စံကားကျေးရွာနှင့် လုံကန်ကျေးရွာဖက်သို့ တိမ်းရှောင်နေရကြောင်း သိရသည်။

ညောင်ရွှေမြို့နယ်နှင့် ပင်လောင်းမြို့နယ်တွင် စစ်ကောင်စီတပ်နှင့် ပြည်သူ့စစ် PNA တို့ လက်နက်ကြီးမှုကြောင့် ဇန်နဝါရီလ ၁ လအတွင်း အရပ်သား ၃ ဦးသေဆုံးကာ၊ ၁၄ ဦး ထိခိုက်ဒဏ်ရာရရှိခဲ့ကြောင်း သိရသည်။