သျှမ်းပြည်တောင်ပိုင်း ကွန်ဟိန်းမြို့နယ်တွင် စစ်ကောင်စီက အကြောင်းအမျိုးမျိုးပြ၍ ငွေညစ်တောင်းခံ နေကြောင်း သတင်းရရှိသည်။

ကွန်ဟိန်းမြို့‌ပေါ်ကို စစ်ကောင်စီက ပြီးခဲ့သည့် ၂၀၂၄ နှစ် နှစ်လည် လောက်မှ စတက်၍ ပြည်သူ့စစ်မှုထမ်းရန် ငွေကြေး ကောက်ခံသည့်အပြင်၊ စစ်အသုံးစရိတ်ဟုဆိပြီး ခေါင်းစဉ်တပ်ကာ ငွေညစ်‌တောင်းခံမှုများ ပြုလုပ်နေကြောင်း ကွန်ဟိန်းမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“သူတို့က စစ်အသုံးစရိတ်တွေလို့ပြောပြီး ကောက်နေတာ ကျမတို့က ၃ သောင်းထည့်ရတယ်။ လတိုင်းလိုလိုကို ကောက်လာခဲ့တာ။တစ်အိမ်နဲ့တစ်အိမ်ကလည်း မတူပြန်ဘူး။အချို့အိမ်တွေကလည်း ၇ သောင်းလောက် ထည့်ရတယ်။တစ်လတစ်လကို သူတို့အသုံးစရိတ်တွေ စစ်မှုထမ်းကိစ္စတွေကော အဲ့လိုတွေလ တိုင်းထည့် နေရတာ။”ဟု ကွန်ဟိန်းမြို့ ဒေသခံအမျိုးသမီးတစ်ဦးက ပြောသည်။

လက်ရှိ နိုင်ငံရေးမတည်ငြိမ်သည့်အပြင် တဖက်တွင်လည်း ကုန်ပစ္စည်းဈေးနှုန်းများတက်နေပြီး ယခုကဲ့သို့ စစ်ကောင်စီမှ အကြောင်းအမျိုးမျိုးပြ၍ငွေညစ်တောင်းခံနေသည့်အတွက် ဒေသခံများအခက်အခဲကြုံတွေ့ နေရကြောင်း ကွန်ဟိန်းမြို့ ဒေသခံအမျိုးသမီးတစ်ဦးက ဆက်‌ဆိုသည်။

“လတိုင်းပဲ သူတို့လာကောက်ရင်ပေးနေရတာ မတက်နိုင်ဘူး။အလုပ်နဲ့ ဝင်ငွေ တွေက သိပ်မရှိတော့ အိမ်တိုင်းလိုလိုကို ငြီးနေကြရတယ်။တချို့ အိမ်မှာမရှိတာတောင် ထည့်ရတယ်။တစ်လတစ်လကို ၁ သိန်းကျော်လောက်ထည့်နေရတာကို”ဟု ၎င်းကပြောသည်။

အလားတူပြီးခဲ့သည့် ဇန်နဝါရီလ တွင်လည်း စစ်ကောင်စီလက်အောက်ခံ နယ်မြေမှူးမှ သျှမ်းပြည် ပြန်လည်ထူထောင်ရေးကောင်စီ၊သျှမ်းပြည်တပ်မတော် (RCSS / SSA) အတွက်ဟု နာမည်ခံပြီး ကျပ်ငွေ ၃ သောင်းမှ ၅ သောင်းဝန်းကျပ်အထိ ကောက်ခံမှုများရှိခဲ့ကြောင်း ဒေသခံများကပြောသည်။

“စစ်ကောင်စီတွေ ဒီလို စစ်မှုထမ်းဖို့၊ စစ်အသုံးစရိတ်တွေ အတွက်ဆိုပြီး ငွေကောက်နေတဲ့ ကိစ္စတွေနဲ့ ပတ်သတ် ရင်တော့ ကျနော်တို့ RCSS နဲ့ သက်ဆိုင်မှုက လုံးဝမရှိပါဘူးဗျ။ဘာမှ ပတ်သက်မှ လည်းမရှိပါဘူး။ ပြည်သူ့တွေ မပေးမှာကြောက် လို့ကျနော်တို့ရဲ့ နာမည်ကိုသုံးပြီး ကောက်တာလားတော့ မပြောတက်ပါဘူး။”ဟု RCSS ၏ တာဝန်ရှိသူတစ်ဦးက ပြောသည်။

ကွန်ဟိန်းမြို့တွင် တိုက်ပွဲဲဖြစ်ပွားခြင်းမရှိကာ ၎င်းဒေသတွင် စစ်ကောင်စီတပ်၊ သျှမ်းပြည် ပြန်လည်ထူထောင်ရေးကောင်စီ၊ သျှမ်းတပ်မတော် (RCSS / SSA) နှင့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တို့ သွားလာလုပ်ရှားနေကြောင်းသိရသည်။