စစ်ခေါင်းဆောင် မင်းအောင်လှိုင် က စစ်တပ်အာဏာသိမ်းမှု (၇) ကြိမ်မြောက် သက်တမ်းတိုးလိုက်ပြီးနောက် အထွေထွေ ရွေးကောက်ပွဲ ကျင်းပရေး မရေမရာဖြစ်လာသဖြင့် ပါတီဝင်များ စိတ်ပျက်နေကြကြောင်း ကြံ့ခိုင်ရေးပါတီ သတင်းရင်းမြစ်က ယနေ့ (ဖေဖော်ဝါရီလ ၁ ရက်) တွင် ပြောသည်။
ယမန်နေ့ (ဇန်နဝါရီလ ၃၁ ရက်) နံနက်ပိုင်း နေပြည်တော်၌ ကျင်းပသည့် အမျိုးသား ကာကွယ်ရေးနှင့် လုံခြုံရေးကောင်စီ အစည်းအဝေးတွင် ယာယီသမ္မတ ရာထူးရယူထားသည့် စစ်ခေါင်းဆောင် မင်းအောင်လှိုင်က အထွေထွေရွေးကောက်ပွဲ ကျင်းပနိုင်ရေး တည်ငြိမ်အေးချမ်းမှု လိုအပ်ဟု အကြောင်းပြကာ နိုင်ငံတော် အရေးပေါ် အခြေအနေ (၇) ကြိမ်မြောက် သက်တမ်းတိုးခဲ့ခြင်း ဖြစ်သည်။
“၂၀၂၅ နိုဝင်ဘာမှာ ရွေးကောက်ပွဲ လုပ်မယ် ပြင်ဆင်ကြပါ ဆိုပြီး အရင်နှစ်ကတည်းက ညွှန်ကြားထားတာ။ ပါတီတွင်း ကိုယ်စားလှယ်လောင်း စာရင်းတွေလည်း ဌာနချုပ်ကို အကုန်ပို့ထားပြီးပြီ။ ရွေးကောက်ပွဲ ဖြစ်ရင်တော့ သွားလာလှုပ်ရှားရတာ အခုလောက်ကြီး ဖိအားမများတော့ဘူး ဆိုပြီး ကလေးတွေက မျှော်လင့်ထားတာ” ဟု ကြံ့ခိုင်ရေးပါတီ သတင်းရင်းမြစ်က ဆိုသည်။
ပြီးခဲ့သည့်နှစ် ဇူလိုင်လ ၃၁ ရက်နေ့ (၆) ကြိမ်မြောက် စစ်အာဏာသိမ်းမှု သက်တမ်းတိုးပြီးနောက် အထွေထွေ ရွေးကောက်ပွဲကို ၂၀၂၅ ခုနှစ်၊ နိုဝင်ဘာလတွင် ကျင်းပမည်ဖြစ်၍ မြို့နယ်အလိုက် ပါတီကိုယ်စားလှယ်လောင်း စာရင်း တင်ပြရန်၊ မဲဆွယ်စည်းရုံးရေး စီမံချက် တင်ပြရန် နေပြည်တော် ပါတီဌာနချုပ်မှ ညွှန်ကြားသဖြင့် ဆောင်ရွက်ခဲ့ပြီးဖြစ်ကြောင်း ဆိုသည်။
“ကိုယ်စားလှယ်လောင်းက ပါတီဝင်တွေတင် မကဘူး အပြင်က လျှောက်ထားတာတွေလည်း အများကြီးရှိတယ်။ လူသိများတဲ့ လူတွေလည်း ပါတယ်။ စစ်တပ်ဘက်ကတော့ ဘယ်သူတွေလာမလဲ မသိသေးဘူး။ ဥက္ကဌကြီး (ဦးခင်ရီ) ကတော့ မြောင်းမြ မဟုတ်ဘူး၊ နေပြည်တော်ကပဲ ဝင်မယ် ကြားတယ်။ အခုကတော့ ရွေးကောက်ပွဲ ဖြစ်ဖို့တောင် မလွယ်တော့ဘူး ထင်တယ်” ဟု သတင်းရင်းမြစ်က ရှင်းပြသည်။
စစ်တပ် အာဏာသိမ်းပြီးနောက် စစ်တပ်နှင့် ပူးပေါင်း၍ လူထုကို ဒုက္ခပေးသည်ဆိုသည့် စွပ်စွဲချက်ဖြင့် ကြံ့ခိုင်ရေးပါတီဝင် ရာပေါင်းများစွာ သုတ်သင်ခံထားရ သဖြင့် ပါတီဝင်များ စိုးရိမ်စိတ်ဖြင့် နေထိုင်နေရသည့် အခြေအနေ ကြုံတွေ့နေရရာ ရွေးကောက်ပွဲ ကျင်းပနိုင်ပါက ယင်းခြေအနေကို ကျော်လွှားနိုင်မည်ဟု ယူဆကြောင်း ဆိုသည်။
လက်ရှိ စစ်ကောင်စီသည် တိုင်းစစ်ဌာနချုပ် (၂) ခု အပါအဝင် မြို့ပေါင်း ၁၀၀ ဝန်းကျင် လက်လွှတ်ထားရပြီး မြို့များစွာ ဝိုင်းဝန်းပိတ်ဆို့ခံထားရသဖြင့် ရွေးကောက်ပွဲ ကျင်းပမည် ဆိုပါကလည်း အပိုင်းလိုက် ခွဲ၍ ပြုလုပ်ရမည့် အခြေအနေ ဖြစ်သည်။
ယမန်နေ့ စစ်အာဏာသိမ်း သက်တမ်းတိုးပွဲတွင် စစ်ခေါင်းဆောင် မင်းအောင်လှိုင် က နိုင်ငံတဝှမ်း PDF အပါအတင် တော်လှန်ရေးတပ်များ ဝိုင်ဝန်းတိုက်ခိုက်နေသဖြင့် ရွေးကောက်ပွဲ ကျင်းပရေး အခြေအနေ မပေးသေးဟု ဝန်ခံခဲ့သည်။
ရွေးကောက်ပွဲ ကျင်းပမည် ဆိုပါက ဝင်ရောက်ယှဥ်ပြိုင်ရန် စစ်တပ်ပါတီဖြစ်သည့် ကြံ့ခိုင်ရေးပါတီ အပါအဝင် လူထုထောက်ခံမှုမရျိသည့် နိုင်ငံရေးပါတီ ၅၄ ခု ပါဝင်ယှဥ◌်ပြိုင်ရန် မှတ်ပုံတင်ထားကြောင်း စစ်တပ် လက်အောက်ခံ ပြည်ထောင်စု ရွေးကောက်ပွဲ ကော်မရှင်က ထုတ်ပြန်ထားသည်။
Leave a Comments