ထိုင်းနိုင်ငံသို့ ရောက်ရှိနေသည့် တရုတ်ပြည်သူ့လုံခြုံရေး ဒုတိယဝန်ကြီးသည် မြန်မာ-ထိုင်းနယ်စပ်ရှိ တာချီလိတ်-မယ်ဆိုင်တံတားပေါ် ထိုင်းဘက်ခြမ်းမှ ရောက်ရှိလာကာ တာချီလိတ်မြို့ နယ်စပ်အခြေအနေကို ကြည့်ရှုစစ်ဆေးခဲ့ကြောင်း စုံစမ်းသိရသည်။

ယနေ့ (ဖေဖော်ဝါရီ ၁ ရက်) နေ့လယ်ပိုင်းတွင် မြန်မာ-ထိုင်းနယ်စပ် မယ်ဆိုင်မြို့သို့ တရုတ်နိုင်ငံ ပြည်သူ့လုံခြုံရေးဝန်ကြီးဌာန ဒုတိယဝန်ကြီး Mr. Liu Zhongyi သည် ထိုင်းအာဏာပိုင်များနှင့်အတူ တာချီလိတ်-မယ်ဆိုင်ရှိ အမှတ်(၁) ချစ်ကြည်ရေးတံတားပေါ် ထိုင်းဘက်ခြမ်းမှ ရောက်ရှိလာသည်။

နှစ်နိုင်ငံ ချစ်ကြည်ရေးတံတား အလယ်ထိ ရောက်ရှိလာခဲ့သည့် တရုတ်ပြည်သူ့လုံခြုံရေး ဒုဝန်ကြီးသည် အွန်လိုင်းကျားဖြန့်လုပ်ငန်းများ ဆက်လက်ကြီးထွားနေကြောင်း သတင်းထွက်ပေါ်နေသည့် မြန်မာနိုင်ငံဘက်ခြမ်း တာချီလိတ်မြို့ နယ်စပ်အခြေအနေကို (၁၀) မိနစ်ခန့် စစ်ဆေးကြည့်ရှုခဲ့ကြောင်း တာချီလိတ်ဒေသခံများက ပြောသည်။

“၁၁ နာရီကျော်လောက်က ထင်တယ် လူကြီးလာတာ ဟုတ်တယ်။ ထိုင်းဘက်က လူကြီးနဲ့ တရုတ်ဘက်က လူကြီးလို့တော့ ပြောတယ်၊ တံတားပေါ် ခနလေး ကြည့်ပြီးတော့ မယ်ဆိုင်ဘက် ပြန်ဝင်သွားတယ်။ အားလုံးပုံမှန်ပါပဲ၊ နောက်ပိုင်းထူးခြားလာရင် မပြောတတ်ဘူး”ဟု တာချီလိတ်မြို့ခံ ကုန်သည်တစ်ဦးက သျှမ်းသံတော်ဆင့်ကို ပြောသည်။

ထိုင်းနိုင်ငံသို့ ရောက်ရှိနေသည့် တရုတ်ပြည်သူ့လုံခြုံရေး ဒုဝန်ကြီးသည် မြန်မာ-ထိုင်းနယ်စပ်ရှိ မဲဆောက်မြို့သို့ ဇန်နဝါရီလ (၂၉) ရက်တွင် ပထမဆုံး သွားရောက်ခဲ့ကာ မြန်မာဘက်ခြမ်း ကရင်ပြည်နယ် မြဝတီမြို့နယ်ရှိ အွန်လိုင်းကျားဖြန့် လုပ်ငန်းများဖြင့် နာမည်ဆိုး ထွက်နေသော နေရာများကို ဦးစွာ ကွင်းဆင်းစစ်ဆေး ကြည့်ရှုခဲ့ကြောင်း ထိုင်းသတင်းဌာနများတွင် ဖော်ပြသည်။

ယခုအခါ မြန်မာ-ထိုင်းနယ်စပ် မယ်ဆိုင်မြို့အထိ ရောက်ရှိလာကာ မြဝတီမြို့နည်းတူ အွန်လိုင်းကျားဖြန့် လုပ်ငန်းများ ဆက်လက်ကြီးထွားနေသည့် သျှမ်းပြည်အရှေ့ပိုင်း တာချီလိတ်မြို့ နယ်စပ်အခြေအနေကို တရုတ်ပြည်သူ့လုံခြုံရေး ဒုဝန်ကြီးက လာရောက်စစ်ဆေးနေခြင်း ဖြစ်သည်။

မြန်မာ-တရုတ်နယ်စပ် သျှမ်းပြည်မြောက်ပိုင်းရှိ ကျားဖြန့်လုပ်ငန်းများသည် “၁၀၂၇ စစ်ဆင်ရေး”ကြောင့် မြန်မာ-ထိုင်းနယ်စပ်သို့ အလုံးအရင်း ရွှေ့ပြောင်းရောက်ရှိလာခဲ့ပြီး တာချီလိတ်မြို့တွင် နယ်မြေခံ အာဏာပိုင်များ၏ ခွင့်ပြုချက်ဖြင့် ဆက်လက်ကြီးထွားနေသည်။

ရွှေတြိဂံဒေသဟု တင်စားခေါ်ဝေါ်ကြသည့် မြန်မာ-ထိုင်း-လာအို သုံးနိုင်ငံ ထိစပ်နေသည့် တာချီလိတ်မြို့သည် ကျားဖြန့်လုပ်ငန်းများ ခိုလှုံရာ အပန်းဖြေမြို့ဟု ခေါ်ဆိုရလောက်အောင် ဟိုတယ်ကြီးများတွင် ကျားဖြန့်လုပ်ကိုင်သည့် တရုတ်နိုင်ငံသားများ အုပ်စုလိုက် စည်ကားနေကြောင်း ဒေသခံများက ပြောဆိုသည်။

ပြီးခဲ့သည့် ဇန်နဝါရီလ (၇) ရက်တွင် မြဝတီဘက်ရှိ အွန်လိုင်းငွေလိမ်ဂိုဏ်းထဲ လူကုန်ကူးခံခဲ့ရသည့် တရုတ်မင်းသားတစ်ဦးကို ထိုင်းအာဏာပိုင်များက မဲဆောက်မြို့မှတဆင့် ကယ်ထုတ်နိုင်ခဲ့ပြီးနောက် ထိုင်း-မြန်မာ နယ်စပ်တလျှောက် အခြေစိုက်ပြီး အွန်လိုင်းကျားဖြန့် ငွေလိမ်လုပ်ကိုင်နေသူများကို တရုတ်နှင့် ထိုင်းအာဏာပိုင်များ ပူးပေါင်းကာ တားဆီးနှိမ်နင်းသွားမည်ဖြစ်ကြောင်း ထုတ်ပြန်ထားသည်။

လက်ရှိတွင် မြန်မာ အပါအဝင် အာဆီယံနိုင်ငံများတွင် ကျားဖြန့်နှိမ်နှင်းရေးအတွက် “စင်ရော်စစ်ဆင်ရေး” ဒုတိယပိုင်းကို ဖော်ဆောင်ပြီး ကွင်းဆက်ရာဇဝတ်မှုများကို တိုက်ဖျက်မည်ဖြစ်ကြောင်း တရုတ်နိုင်ငံဘက်မှ ဆိုသည်။