သျှမ်းပြည်မြို့တော် တောင်ကြီးတွင် အရပ်ဝတ်စုံဖြင့် အမျိုးသားတစ်ဉီးသည် လက်နက်ကိုင်ဆောင်ပြီး ပြည်သူတစ်ဉီးကို ခြိမ်းခြောက်ရိုက်နှက်သွားခဲ့ကြောင်း မြို့ခံများက သျှမ်းသံတော်ဆင့်ကို ပြောသည်။
ယမန်နေ့ (ဇန်နဝါရီလ ၂၉ ရက်) နေ့လည်ပိုင်းတွင် တောင်ကြီးမြို့ မင်းကျောင်းဘုန်းကြီးကျောင်းအနီး ကားမောင်းလာသော လူငယ် ၂ ဦးအား အရပ်ဝတ်လက်နက်ကိုင်တစ်ဦးမှ ၎င်း၏ဆိုင်ကယ်အားကျော်တက်သည်ဟုဆိုကာ ကားရပ်ခိုင်းပြီး သေနတ်ဖြင့်ရိုက်နှက်မှုဖြစ်ပွားခဲ့ကြောင်း မြို့ခံများထံမှ သိရသည်။
“ဆိုင်ကယ်ကျော်တက်လို့ဆိုပြီးတော့ ကားကိုအတင်းရပ်ခိုင်းပါတယ်၊ ကားမှန်ကို သေနတ်(အတို)နဲ့ ရိုက်ခွဲပြီး ကာပေါ်ကဆင်းခိုင်းပြီး မျက်နှာကို သေနတ်နဲ့ အကြိမ်ကြိမ်ရိုက်ပါတယ်” ဟု ဖြစ်စဉ်အားသိရှိသူပြည်သူတစ်ဦးမှ လူမှုကွန်ယက်စာမျက်နှာပေါ်တွင် ဖော်ပြထားသည်။
ထို့အပြင် ၎င်းအရပ်ဝတ်လက်နက်ကိုင်မှ သေနတ်အားမိုးပေါ်ထောင်ပစ်ဖောက်ခဲ့ပြီး ပအိုဝ်းစကားဖြင့် ဆဲဆိုသွားကြောင်းလည်း သိရသည်။
“ကျည်ခွံတွေကိုပြန်ကောက်သွားပေမယ့် တစ်ထောင့်ကျန်ခဲ့ပါတယ်၊ အဲ့ကျည်ခွံကိုတော့ ရဲကသိမ်းသွားပါတယ်” ဟု ၎င်းမှဆက်ပြောထားသည်။
အထက်ပါ လက်နက်ကိုင်ခြိမ်းခြောက်မှုနှင့် ပတ်သတ်၍ သျှမ်းသံတော်ဆင့်မှ အသေးစိတ်သိရှိနိုင်ရန် ဆက်လက်စုံစမ်းနေဆဲဖြစ်သည်။
ထိုသို့လက်နက်ကိုင် ခြိမ်းခြောက်မှုအား စစ်ကောင်စီလက်အောက်ခံရဲဌာနသို့ တိုင်ကြားထားသော်လည်း ဖြေရှင်းပေးမည်ဟုသာပြောကြားထားပြီး အရေးယူဆောင်ရွက်ခြင်းမရှိသေးကြောင်းလည်းသိရသည်။
တောင်ကြီးမြို့သည် အရှေ့ပိုင်းတိုင်းစစ်ဌာနချုပ် ရုံးစိုက်ရာမြို့ဖြစ်သည့်အပြင် မြို့တွင်းတွင်လည်း ပအိုဝ်းပြည်သူ့စစ် (PNO) တပ်ဖွဲ့များမှာ ယခင်ကထက်ပို၍ ပေါ်ပေါ်ထင်ထင်သွားလာလုပ်ရှားနေလျက်ရှိသည်။
လက်ရှိတွင် တောင်ကြီးမြို့ပေါ်သည် စစ်ရေးအရတည်ငြိမ်နေသော်လည်း စစ်မှုထမ်းနောက်ဆက်တွဲပြဿနာများအဖြစ် အမျိုးသမီးများကိုပါစစ်မှုထမ်းကောက်ခံရန် စစ်ကောင်စီလက်အောက်ခံ အုပ်ချုပ်ရေးမှူးများမှ အသည်းအသန်ကြိုးစားလာနေပြီး စစ်မှုထမ်းအဆင့်မီသည့် လူငယ်အမျိုးသမီးများမှာလည်း စိုးရိမ်ပူပန်မှုများမြင့်တက်လျက်ရှိနေသည်။
ထို့အပြင် အတည်မပြုနိုင်သေးသော သတင်းများအရ တောင်ကြီးမြို့မြောက်ဘက် ဘန်ကွဲရွာတွင်လည်း (ဇန်နဝါရီလ ၂၇ ရက်)က ဒရုန်းဖြင့် ဗုံးကြဲသည့်သတင်းများထွက်ပေါ်ခဲ့ပြီး ဒေသခံများ စိုးရိမ်ထိတ်လန့်မှုများရှိနေကြောင်း သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments