သျှမ်းပြည်တောင်ပိုင်း၊ ရွာငံမြို့နယ် မြောက်ဖက် ကျေးရွာများတွင် စစ်တပ်မှ ကျေးရွာအလိုက် တပ်စွဲကာ သေနတ်ဖောက်ခြိမ်းခြောက်နေသည်ဟု ဒေသခံများထံမှသိရသည်။
ရွာငံမြောက်ဘက် ကျေးရွာများတွင် အင်အား(၆၀) ခန့်ရှိသည့် စစ်ကောင်စီတပ်များက တပ်စွဲနေထိုင်နေပြီး အနီးနားတောတောင်ဘက်တွင်ပြီးခဲ့သည့် ဇန်နဝါရီလ တတိယပတ်မှ စပြီး စစ်ကြောင်းထိုးနေသည်ဟု ဒေသခံများထံမှ သိရသည်။
ထိုသို့ စစ်ကြောင်းထိုးရာတွင် ဒေသခံများကို သေနတ်ဖောက်ခြိမ်းခြောက်မှုကြောင့် တောင်ယာမသွားရဲသည့် အပြင် အိမ်ထဲအိမ်ပြင်ပါ မထွက်ရဲကြတော့ကြောင်း ဒေသခံ အမျိုးသားတစ်ဦးက ပြောသည်။
“ခဏခဏ စစ်ကြောင်းလာထိုးတာ။ ရွာက ဘုန်းကြီးကျောင်းမှာလည်း လာတည်းတယ်။ ညဆို ရင်တော့ စစ်ကားနဲ့ကင်းလှည့်တယ်။နေ့ဆို ဒီနားက တောထဲကို စစ်ကြောင်းထိုးတယ်။ အင်အားက (၆၀)လောက်ရှိတယ်။ သေနတ်သံဖောက်သံတွေလည်း ခဏခဏ ကြားရတယ်။ ရင်တမမနဲ့ ကြောက်နေရတယ်။” ဟု အဆိုပါ ဒေသခံ အမျိုးသားက သျှမ်းသံတော်ဆင့်ကို ပြောသည်။
ထို့အပြင် အမျိုးသမီးများပါ စစ်မှုထမ်းရမည်ဆိုသောကြောင့် ဒေသခံများ စိုးရိမ်နေကြကြောင်း ၎င်းအမျိုးသားက ထပ်လောင်းပြောသည်။
ဆက်လက်ပြီး စစ်ကောင်စီတပ်သားများက ကျေးရွာအဝင်ထွက် တင်းကြပ်နေပြီး မှတ်ပုံတင်ကို စစ်တပ်ဂိတ်တွင် ပေးပြီးမှ ရွာပြင်ထွက်ခွင့်ရသည်ဟု အသက်(၃၀)အရွယ် အမျိုးသားတစ်ဦးက ပြောသည်။
“ခုနောက်ပိုင်း ပိုဆိုးလာတယ်။ ရွာထဲလဲ စစ်တပ်ရှိတယ်။ရွာပြင်လဲရှိတယ်။ ရွာပြင်ထွက်ရင် စစ်သားတွေနားမှာ မှတ်ပုံတင်ထားခဲ့ရတယ်။ဘယ်သွားမယ် ဘယ်နရက်ကြာမယ်ဆိုတာကိုပါ လက်မှတ်ထိုးထားခဲ့ရတယ်။” ဟု အဆိုပါ အမျိုးသားက ဆက်လက်ပြောသည်။
ယခုလက်ရှိရွာငံတွင် သေနတ်သံများ မကြာခဏ ကြားလာရပြီး စစ်ပွဲထပ်ဖြစ်မည်ကို စိုးရိမ်လျှက် ရှိနေကြသည်။
ထို့အပြင် ခရီးသွားရာသီဖြစ်သောကြောင့် ရွာငံ အဝင်အထွက် စစ်တပ်ဂိတ်များက ခရီးသွားများကို ငွေညှစ်တောင်းနေသည်ဟု သိရှိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments