သျှမ်းပြည် မြောက်ပိုင်း ကျောက်မဲမြို့ကို စစ်ကောင်စီတပ်ဖွဲ့သည် ယခုလ ( ဇန်နဝါရီ) အတွင်း တတိယအကြိမ်မြောက် လေကြောင်းဗုံးကြဲတိုက်ခိုက်မှုပြုလုပ်နေကြောင်း သတင်းရရှိသည်။
ယနေ့ (ဇန်နဝါရီလ ၂၇) ရက် နေ့လည် ၂ နာရီဝန်းကျင် ကျောက်မဲမြို့အတွင်းရှိ မြို့တော်ခန်းမ အနီးတဝိုက်ကို စစ်ကောင်စီကမှ ဂျက်ဖိုက်တာဖြင့် ထပ်မံဗုံးကြဲတိုက်ခိုက်ခဲ့ကြောင်း ကျောက်မဲမြို့ ဒေသခံအမျိုးသမီးတစ်ဦးက သျှမ်သံတော်ဆင့်ကို ပြောသည်။
“မြို့တော်ခန်းမနား တဝိုက်ကြဲချသွားတာ။ ထိခိုက်မှုကတော့ ရှိမှာပဲ အတိအကျတော့ မသိရသေးဘူး။အဲ့နားမှာ လူလည်း စည်တယ်။ ညဈေးလည်းအဲ့နားမှာရှိတယ်။ ရုံးတွေလည်း အဲ့မှာရှိတယ်။”ဟု ကျောက်မဲမြို့ ဒေသခံအမျိုးသမီးတစ်ဦးက ပြောသည်။
ထိုစစ်ကောင်စီမှ မြို့တော်ခန်းမအနီးကို လေကြောင်းဗုံးကြဲခိုက်ခိုက်မှုနှင့် ပတ်သက်၍ ထိခိုက်ဒဏ်ရာရရှိမှုကို သျှမ်းသံတော်ဆင့်မှ အသေးစိတ် ဆက်လက်စုံစမ်းနေသည်။
အလားတူ (ဇန်နဝါရီလ ၂၅ ရက်) နေ့လယ် ၁ နာရီခွဲခန့်တွင် တအာင်း(ပလောင်) အမျိုးသားလွတ်မြောက်ရေး တပ်မတော် TNLA ထိန်းချုပ်ထားသည့် ကျောက်မဲမြို့ပေါ် စစ်ကောင်စီတပ်မှ ဂျက်ဖိုက်တာဖြင့် ဗုံးနှစ်လုံး ကြဲချတိုက်ခိုက်ခဲ့ရာ ပြည်သူ့ဆေးရုံရှိ သားဖွားဆောင်နှင့် ရဲစခန်းအနီးသို့ ကျရောက်ပေါက်ကွဲကြောင်းသိရသည်။
ပြီးခဲ့သည့် ဇန်နဝါရီလ ၁၃ ရက် ညပိုင်းတွင်လည်း ကျောက်မဲမြို့နယ်၌ တိုက်ပွဲဖြစ်ပွားခြင်း မရှိဘဲ ပန်ပေါင်းဘက်ရှိ တိုးဂိတ်အနီးသို့ စစ်ကောင်စီဘက်မှ လေကြောင်းဗုံးကြဲတိုက်ခိုက်ခဲ့သည်။
Leave a Comments