သျှမ်းပြည် ဆီဆိုင်မြို့နယ်အတွင်း စစ်ကောင်စီ၊ ပအိုဝ်းပြည်သူ့စစ် (PNO) နှင့် တော်လှန်ရေးအင်အားစု တို့ စစ်ရေးဆက်လက်တင်းမာနေကြောင်း စုံစမ်းသိရသည်။

ဆီဆိုင်မြို့နယ် အရှေ့တောင်ဘက် နှင့် တောင်ဘက်ခြမ်းတွင် စစ်‌ကောင်စီ၊ပအိုဝ်းပြည်သူ့စစ် (PNO) နှင့် တော်လှန်ရေးအင်အားစုတို့ စစ်ရေးဆက်လက်တင်းမာနေပြီး လက်နက်ကြီး ပစ်ခတ်မှုများ နေ့စဉ်နီးပါး ပြုလုပ်နေကြောင်း ဆီဆိုင်မြို့ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ဆီဆိုင်မြို့အရှေ့တောင်ဘက်နဲ့တောင်ဖက်ကရွာတွေမှာထိတွေ့မှုရှိနေကြဆဲဘဲ စစ်ကောင်စီက လေကြောင်း ပစ်ကူတာနဲ့ လက်နက်ကြီး ပစ်ကူတာတွေရှိနေတယ်။ လက်ရှိမှာ‌တော့ အရှေ့ဘက်ခြမ်းကတော့ ငြိမ်နေတယ်။ လက်နက်ကြီးပစ်တဲ့ အသံလည်း မနေ့မနက်ထိတော့ ကြားရတယ်။”ဟု ဆီဆိုင်မြို့ ဒေသခံအမျိုးသားတစ်ဦးက ပြောသည်။

ထို စစ်‌ကောင်စီ၊ပအိုဝ်းပြည်သူ့စစ် (PNO) နှင့် တော်လှန်ရေးအင်အားတို့ စစ်ရေးဆက်လက် တင်းမာသည့် နေရာသည် ဆီဆိုင်မြို့နှင့် ၇မိုင် နှင့် ၁၀ မိုင်ခန့်သာကွာဝေးပြီး၊ ဆီဆိုင်မြို့ ဒေသခံများအတွက် စိုးရိမ်ရကြောင်း ဆီဆိုင်မြို့ဒေသခံအမျိုးသားတစ်ဦးက ဆက်ဆိုသည်။

“မြို့ထဲမှာတော့ ဒေသခံတွေက ၉၀ရာခိုင်နှုန်း လောက်ရောက်နေပြီလို့ပြောလို့ရပါတယ်။မြို့ထဲမှာတော့ ပုံမှန်အတိုင်းရှိ နေကြတယ်ဆိုပေမယ့် ပြန်ပြေးကြရမှာကိုတော့အားလုံးက စိုးရိမ်မှုတွေ ရှိနေကြတယ်။ နည်းနည်းအလှမ်းဝေးတယ်”၎င်းက ဆက်ပြောသည်။

ဆီဆိုင်မြို့အရှေ့ဘက်ကို စစ်ကောင်စီနှင့် PNO တို့သည် အဆိပ်ပါသော လက်နက်ကြီးများကို အသုံးပြု ပစ်ခတ်တိုက်ခိုက်လာကြောင်း PNLA မှ ပြီးခဲ့သည့် ဇန်နဝါရီလ ၂၅ ရက်နေ့တွင် ထုတ်ပြန်ခဲ့သည်။

စစ်ကောင်စီ၏ လေကြောင်း၊လက်နက်ကြီး တိုက်ခိုက်မှုများကြောင့် ဆီဆိုင်မြို့နယ် အရှေ့ဘက်ခြမ်း ထီစုံကျေးရွာသည် နေအိမ် ၆၀ ကျော် မီးလောင်ပျက်စီးခဲ့ရသည်။

အလားတူယနေ့ ပြီးခဲ့သည့် ၂၀၂၄ (ဒီဇင်ဘာလ ၁၃ ရက်)တွင် မိုးဗြဲမြို့တွင် စစ်ကောင်စီ၏ ဒရုန်းဗုံးများတွင် အဆိပ်ငွေ့ပြားများကို ထည့်ပြီး အသုံးပြုတိုက်ခိုက်နေကြောင်း ကရင်နီအမျိုးသား ကားကွယ်ရေးတပ် (KNDF) မှ ထုတ်ပြန်ခဲ့သည်။