ကချင်ပြည်နယ်၊ ဗန်းမော်မြို့တွင် တိုက်ပွဲများ ပြင်းထန်နေပြီး ယမန်နေ့ (ဇန်နတါရီ ၂၄ ရက်) နံနက်ပိုင်းမှ ညပိုင်း အထိ စစ်ကောင်စီ လေတပ်မှ အပြင်းအထန် ဗုံးကြဲခဲ့သည် စစ်ရေးသတင်းရင်းမြစ်က ပြောသည်။
ပြီးခဲ့သည့် ဇန်နဝါရီလ ၂၃ ရက် နံနက်ပိုင်းမှစ၍ တိုက်ပွဲများ ပြင်းထန်နေရာ စစ်ကောင်စီ လေကြောင်းမှ ဆက်တိုက် ဗုံးကြဲခဲ့သော်လည်း စစ်ကောင်စီ သံချပ်ကာတပ်နှင့် ဝန်တင်တပ်ရင်း (လားတပ်) တို့ကို KIA ပူးပေါင်တပ် တိုက်ခိုက် သိမ်းပိုက်နိုင်ခဲ့သည်ဟု စစ်ရေးသတင်းရင်းမြစ်က ယနေ့ (ဇန်နဝါရီလ ၂၅ ရက်) တွင် အသိပေးသည်။
“အမှတ် (၇၀၀၆) သံချပ်ကာတပ်ရင်းရှိ သံချပ်ကာ ၄ စီး သိမ်းပိုက်။ ဝန်တင်တပ်ရင်း (လားတပ်) အပြီး သိမ်းပိုက်ရရှိ” ဟု စစ်ရေးသတင်းရင်းမြစ်က ဆိုသည်။
ယမန်နေ့ တနေကုန် လေကြောင်း ဗုံးကြဲ တိုက်ခိုက်ရာ စကစ (၂၁) ၀န်းကျင်ရှိ နောင်ခို၊ မင်းလှ၊ ရွှေကျီးနား တကြောနှင့် ၂ မိုင်၊ ဟင်းခြံ၊ ပင်စင်ကုန်း တကြောအား အဓိက တိုက်ခိုက်ခဲ့ကြောင်း ဒေသတွင်း အခြေအနေများ တင်ပြနေသည့် BAMAW SCOTH TEAM ကဆိုသည်။
တိုက်ပွဲများ ပြင်းထန်ခဲ့မှုကြောင့် စစ်ကောင်စီ စကခ (၂၁) တပ်တွင်း မီးလောင်ကျွမ်းနေသည် ဆိုသည့် ရုပ်သံနှင့် (၃၃၆) အမြောက်တပ် သိမ်းပိုက်နိုင်ရန် နီးစပ်နေပြီ ဆိုသည်များ လူမှုကွန်ရက်တွင် ပြန့်နှံ့နေသော်လည်း သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပေ။
“မနေ့က လိုင်ဇာကိုလည်း ဒရုန်းနဲ့ တိုက်တာရှိတယ် ဆိုတော့ သူတို့ (စစ်ကောင်စီတပ်) အခြေအနေ မကောင်းရင် လုပ်နေကြ ပုံစံပဲလေ”ဟု နောက်ထပ် စစ်ရေးသတင်းရင်းမြစ်က ရှင်းပြသည်။
လက်ရှိ အခြေအနေအရ စစ်ရေးအရ ပိတ်မိနေသည့် စစ်ကောင်စီတပ်များ ခွာစစ်ဆင်ရန် အတွက် အကြိုပြင်ဆင်မှု အနေဖြင့် လမ်းကြောင်းရှင်း ဗုံးကြဲနေခြင်း ဖြစ်နိုင်ကြောင်း ၄င်းကသုံးသပ်ပြီး စစ်ရေးအခြေအနေ အသေးစိတ်ကိုမူ ပြောဆိုခြင်း မရှိပေ။
လေတပ်သည် ပြီးခဲ့သည့် ဇန်နဝါရီ ၂၀ ရက်နေ့က ဗန်းမော်မြို့ကို ဗုံးအလုံး ၄၀ ခန့် ဗုံးကြဲ တိုက်ခိုက်ခဲ့ပြီး ဇန်ဝါရီ ၂၁ ရက်နေ့က ဗုံး ၄ လုံးကြဲချ တိုက်ခိုက်ခဲ့သေးသည်။
ဗန်းမော်နှင့် မံစီမြို့ကို KIA ပူးပေါင်းတပ် ပြီးခဲ့သည့် ဒီဇင်ဘာလ ၄ ရက်နေ့ကစ၍ တပြိုင်ထဲ တိုက်ခိုက်ခဲ့ရာ ဇန်နဝါရီလ ၈ ရက် နေ့တွင် မံစီမြို့ကို အပြီးသတ် သိမ်းပိုက်ထိန်းချုပ်လိုက်တာ ဖြစ်ပါတယ်။
Leave a Comments