ထိုင်း-မြန်မာနယ်စပ် တာချီလိတ်မြို့တွင် ဆိုင်ကယ် တက္ကစီမောင်းနေသည့် လူငယ်တစ်ဉီး အသတ်ခံရပြီနောက်တွင် စားဝတ်နေရးအတွက် ရုန်းကန်လုပ်ကိုင်နေသည့် ဆိုင်ကယ်သမားများလည်း စိုးရိမ်စိတ်ဖြင့် လုပ်စားနေရကြောင်း စုံစမ်းသိရသည်။ 

ပြီးခဲ့သည့် (ဇန်နဝါရီ ၁၆ ရက်)တွင် အသက် (၂၃)နှစ်ရှိသည့် ဆိုင်ကယ် တက္ကစီသမားတစ်ဉီးသည် ခရီးသည်ကို မြို့အပြင်ထိ လိုက်ပို့ပေးရာကနေ အသတ်ခံလိုက်ရပြီး ဆိုင်ကယ်ခိုးယူသွားကြောင်း တာချီလိတ်မြို့က ကယ်ရီသမားတစ်ဦးက သျှမ်းသံတော်ဆင့်ကို ပြောသည်။

တာချီလိတ်မြို့အတွင်း ပစ်ခတ်မှုများ၊ ခိုးယူ လုယက်မှု၊ ပြန်ပေးဆွဲမှုများ နေ့စဉ်ဖြစ်ပွားနေ့သည့်အတွက် မြို့အတွင်းလုံခြုံမှုများ ကင်းမဲ့နေပြီး၊ လက်ရှိ ဆိုင်ကယ်တက္ကစီသမားများသည်လည်း မြို့နှင့်ဝေးသည့် နေရာတွင် ခရီးသည်များကို မပို့ရဲကြောင်း ၎င်းက ဆက်ပြောသည်။

“အသက် ၂၃ နှစ်ပဲရှိသေးတာ မြို့နဲ့ နည်းနည်းဝေးတယ်။ သူအသတ်ခံရတဲ့နေရာက ဆိုင်ကယ်ပါယူသွားတာ။ တာချီလိတ်မှာက လောင်းကစားရုံတွေ ငါးဂိမ်းတွေ အရမ်းများလာတယ်။ ပြီးတော့ ဆေးသမားတွေလည်း ပိုများ သူတို့ ပိုက်ဆံလိုလို့ လိမ်ခေါ်ရာကနေ အဲကောင်လေး အသတ်ခံလိုက်ရတယ်။ အခုဆိုရင် ကယ်ရီသမားတွေလည်း ကြောက်နေရတယ် မြို့နဲ့ဝေးရင် သွားမပို့ရဲကြတော့ဘူး”ဟု ၎င်းက‌ ပြောသည်။

ကယ်ရီသမားအသတ်ခံရပြီးနောက် မြို့တွင်းရှိ လောင်းကစားရုံနှင့် ဂိမ်းခုံများကို တာချီလိတ်ရဲတပ်ဖွဲ့များက ဝင်ရောက်စစ်ဆေးမှုများ ပြုလုပ်နေပြီး ထိုစစ်ဆေးမှုအတွင်း အမျိုးသားလူငယ်တစ်ဦးကို လက်ထိပ်ခတ် ခေါ်ဆောင်သွားကြောင့် မျက်မြင်တွေ့ရှိသူ အမျိုးသမီးက ပြောသည်။

ပြီးခဲ့သည့် ၂၀၂၄ ခုနှစ်တွင်လည်း ကယ်ရီသမားတစ်ဦး အသတ်ခံရပြီး ယခင်နှစ်လည်း ထပ်မံအသတ်ခံနေရကြောင်း၊ မည်သည့် အဖွဲ့အစည်းမှ တာဝန်ယူစစ်ဆေးမှု မပြုလုပ်ပေးကြောင်း ၎င်းက ဆက်ပြောသည်။

“မနှစ်ကလည်း ဖြစ်ဖူးသေးတယ်။ ကယ်ရီသမားအသတ်ခံရတာ ခုလည်း ထပ်ဖြစ်တ​ယ်။ ဘယ်သူမှလည်း တာဝန်ယူစစ်ဆေးမှုတွေ မလုပ်ပေးပါဘူး။ ရဲတွေလည်း လောင်းကစားရုံတွေ ဂိမ်းဆိုင်တွေဆို ရှောင်တခင် ဝင်စစ်တာမျိုးတော့ ရှိလာတယ် ဒီကစ္စဖြစ်ပြီးနောက်ပေါ့။ အလောင်းသွားသင်္ဂြိုဟ်တဲ့နေ့ဆို လူစီတယ်။ ကယ်ရီသမား မိသားစုတွေ အများဆုံးပါတယ်”ဟု ၎င်းက ပြောသည်။

ထို့အပြင် ပြီးခဲ့သည့် ( ဒီဇင်ဘာလ ၁၃ ရက် ) တာချီလိတ်မြို့ မယ်ခေါင်ရပ်ကွက်၊ အမှတ် ၂ ကမ္ဘောဇဘဏ်အရှေ့တွင် ငွေလဲလှယ်သည့် လုပ်ငန်းကို လုပ်ကိုင်သော အသက် ၇၈ကျော် အမျိုးသားတစ်ဦးကို အမည်မသိ လက်နက်ကိုင်အမျိုးသား ၃ ဦးက ပြန်ပေးဆွဲသွားပြီးနောက် (ဒီဇင်ဘာ ၁၈ ရက်)တွင် နေအိမ်တစ်ခုတွင် ရဲ့တပ်ဖွဲ့တို့က ဝင်ဖမ်းစဉ် အပြန်အလှန်ပစ်ခတ်မှု ဖြစ်ပွားခဲ့ပြီး ပြန်ပေးဆွဲသူ ၆ ဦး သေဆုံးသွားကြောင်း သိရသည်။

စစ်တပ်မှ အာဏာသိမ်းပြီး နောက်ပိုင်း တာချီလိတ်မြို့တွင် အနယ်နယ်အရပ်ရပ်ရှိ လူမျိုးစုံ ရောက်ရှိလာပြီး၊ အလောင်းကစားဝိုင်းများ၊အွန်လိုင်းငွေလိမ်ဂိုဏ်းများ၊လက်နက်ကိုင်များလည်း ပေါများ နေသည့်အတွက် ဓားပြတိုက်၊ ခိုးဆိုးလုယက် ဒုစရိုက်များလည်း နေ့စဉ်နှင့် အမျှပေါများလာပြီး မြို့တွင်းလုံခြုံရေးမရှိကြောင်း တာချီလိတ်မြို့ဒေသခံများကပြောသည်။ 

အလုပ်သင် သတင်းထောက် နန်းဆိုင်ခမ်း ရေးသားသည်။