ကချင်ပြည်၊ ဗန်းမော်မြို့ စစ်ကောင်စီနှင့် ကချင်လွတ်လပ်ရေး တပ်မတော်( KIA) ပူးပေါင်းတပ်များ တိုက်ပွဲ ဆက်လက် ဖြစ်ပွားနေရာ စစ်ကောင်စီက စစ်လေယာဉ်◌နှင့် ဒရုန်းများဖြင့် ဗုံးကြဲပြီး လက်နက်ကြီးပစ်၍ ခုခံတိုက်ခိုက်နေဆဲ ဖြစ်သည်ဟု သတင်းရင်းမြစ်များက ယနေ့ (ဇန်နဝါရီလ ၂၀ ရက်) တွင် ပြောသည်။

ယမန်နေ့ (ဇန်နဝါရီ ၂၀ ရက်) က ဗန်းမော်မြို့ကို စစ်ကောင်စီ လေယာဉ်ဖြင့် ဗုံး ၃၆ လုံး ကြဲချ တိုက်ခိုက်ခဲ့ပြီး ယနေ့ (ဇန်နဝါရီလ ၂၁ ရက်) ညနေပိုင်းတွင် ဗုံး ၄ လုံး ကြဲချခဲ့ကြောင်း ဒရုန်းများဖြင့်လည်း ဗုံးကြဲကြောင်း ဒေသတွင်း စစ်ရေးအခြေအနေများကို ဖော်ပြနေသည့် Banmaw Scout Team က အတည်ပြု ထုတ်ပြန်သည်။

အဆိုပါ လေကြောင်းမှ ကြဲချသည့်ဗုံးများ ရွှေကျီးနား မျစ်ချဉ်ခေါက်ဆွဲဆိုင် တကြောနှင့် နမ့်ဖားလမ်းခွဲ (ဘီလူးမချောင်) တဝိုက်နှင့် ပင်စင်ကုန်းရပ်ကွက် ၀န်းကျင် တို့တွင် ကျရောက် ပေါက်ကွဲကြောင်း ဆိုသည်။

“လေယာဉ်ကြဲတာ Jet Fighter လို့ ပြောရမယ်ထင်တယ်။ တခါကြဲရင် ၂ ခါစီ ကြဲတာ။မနေ့ကတော့ တောက်လျှောက်ကိုကြဲနေတာ။ ဒရုန်းတွေနဲ့လည်း ကြဲတယ်” ဟု ဗန်းမော်ြမို့ခံ တစ်ဉီး၏ ပြောဆိုချက်ကို ဖော်ပြသည်။

ယမန်နေ့ (ဇန်နဝါရီ ၂၀ ရက်) နံနက်ပိုင်းကလည်း ကရင်ကုန်း၊ ပင်စင်ကုန်းနှင့် ရွှေကျီးနားရပ်ကွက် ၀န်းကျင် တိုက်ပွဲများ ဖြစ်ပွားခဲ့ပြီး လက်နက်ကြီး၊ လက်နက်ငယ် ပစ်ခတ်မှုများကြောင့် နေအိမ်များ မီးလောင် ပျက်စီးမှုရှိခဲ့ကြောင်း သိရသည်။

KIA ပူးပေါင်းတပ်က ဗန်းမော်မြို့ နေရာအများစုကို ထိန်းချုပ်ထားသော်လည်း စစ်ကောင်စီ အကြွင်းအကျန်များကို ရှင်းလင်းရာက မြို့တွင်း တိုက်ပွဲတချို့ ဆက်လက် ဖြစ်ပေါ်ခဲ့ရာ ယနေ့တွင် မြို့တွင်း တိုက်ပွဲ နည်းပါးသွားပြီး စကခ (၂၁) ကို ပိတ်ဆို့ တိုက်ခိုက်နေကြောင်း စစ်ရေးသတင်းရင်းမြစ်က ပြောဆိုသည်။

သို့သော် စစ်ရေးအခြေအနေများကိုမူ ပြောဆိုခြင်း မရှိသေးပေ။

ယမန်နေ့ (ဇန်နဝါရီလ ၁၉ ရက်) ညပိုင်းကလည်း စစ်ကောင်စီ လေကြောင်းမှ ၄ ကြိမ် ဗုံးကြဲရာ ဗန်းမော်မြို့ ရွှေကျီးနား ရပ်ကွက် ၀န်းကျင် ကျရောက် ပေါက်ကွဲခဲ့သည်။

စစ်ကောင့် ပျက်စီးနေသည့် ဗန်းမော်မြို့ ကမ်းနားလမ်း ရပ်ကွက်ရှိ နေအိမ်များ မီးအကြီးအကျယ် လောင်ကျွမ်း ပျက်စီးခဲ့သည် ဆိုသည့် သတင်းများနှင့် ပတ်သက်၍ ယင်းသတင်းများ မှန်ကန်ကြောင်း Banmaw Scout Team က အတည်ပြုထားသည်။

တလခွဲကျော် ကြာမြင့်လာသည့် ဗန်းမော် တိုက်ပွဲ အတွင်း ဗုံးကြဲမှု၊ လက်နက်ကြီး ပစ်ခတ်မှုနှင့် မီးရှို့မှုများကြောင့် လက်ရှိ မြို့ အကြီးအကျယ် ပျက်စီးနေပြီ ဖြစ်သည်။

ပြီးခဲ့သည့် ၂၀၂၄ ခုနှစ်၊ ဒီဇင်ဘာ ၄ရက်က စတင်ခဲ့သည့် ထိုးစစ် အတွင်း KIA ဦးဆောင်သည့် တော်လှန်ရေးတပ်များက ဗန်းမော်မြို့နှင့် မံစီမြို့ တို့ကို တပြိုင်နက် ပိတ်ဆို့ တိုက်ခိုက်ခဲ့ရာ မံစီမြို့ကို သိမ်းပိုက်နိုင်ခဲ့ပြီး ဗန်းမော်မြို့ကိုမူ ဆက်လက် တိုက်ခိုက်နေဆဲ ဖြစ်သည်။