သျှမ်းပြည်တောင်ပိုင်း၊ပင်းလောင်းမြို့နယ် လွယ်ပြား စစ်ကောင်စီ စစ်ဆေးရေးဂိတ်တွင် စစ်အသုံးစရိတ်ကို အကြောင်းပြပြီး ငွေညှစ်တောင်းနေသည်ဟု သတင်းရင်းမြစ်များထံမှ စုံစမ်းသိရှိရသည်။

ပြီးခဲ့သည့် (၂၀၂၄ခုနှစ်) ဒီဇင်ဘာလ မှစ၍ ပင်လောင်းမြို့နယ် လွယ်ပြားဂိတ်ကို ဖြတ်သန်းကြသည့် ကုန်တင်ကား နှင့် အိမ်စီးကားများကို ကျပ်( ငါးသောင်း) အထိ ကောက်ခံနေပြီး မပေးလျှင် ဂိတ်ပေးမဖြတ်ကြောင်း ကိုယ်တွေ့ကြုံသည့် ခရီးသွား အမျိုးသားတစ်ဦးက ပြောသည်။

ထို့အပြင် ပင်လောင်းဒေသခံ၊ NON- CDM နှင့် PNO တပ်ဖွဲ့ဝင်များကိုမှု ငွေကောက်ခံခြင်းမရှိဘဲ အခြားသော ဒေသမှ ဖြတ်သန်းသွားလာကြသည့် ပြည်သူများကိုသာလျှင် စစ်ဆေးမှုများ ပြုလုပ်ပြီး ငွေကောက်နေခြင်း ဖြစ်သည်ဟု အဆိုပါ ခရီးသွားတစ်ဦးက သျှမ်းသံတော်ဆင့်ကို ပြောသည်။

“သူတို့က စစ်အသုံးစရိတ်အတွက်ဆိုပြီး တောင်းတာပဲ။ တခါတလေဆိုရင်လည်း ဂိတ်စောင့်တဲ့သူ မူးနေရင် အရမ်းအစစ်ခံရတယ်။ သူတို့က လမ်းကို ပိတ်ချထားပြီး တောင်းတာ။ ကျနော်ဆို ၅သောင်း ပေးခဲ့ရတယ်။မပေးမချင်း ပေးမဖြတ်ဘူး။” ဟု ခရီးသွား အမျိုးသားတစ်ဦးက ပြောသည်။

ထိုကဲ့သို့ ငွေကောက်ခံနေသည့်အထဲတွင် နေအိမ်စီးကား ဆိုလျှင် ကျပ်(၃၀၀၀၀)၊ ခရီးသည်တင်ကားဆိုလျှင့် ကျပ်(၂၀၀၀၀) နှင့် ကုန်တင်ကားဆိုလျှင် ကျပ်(၅၀၀၀၀) ပေးရသည်ဟု ၎င်းအမျိုးသားက ထပ်လောင်းပြောသည်။

စစ်ကောင်စီဂိတ်နှင့် PNOဂိတ်များက ခေါင်းစဉ်အမျိုးမျိုးဖြင့် တောင်းရမ်းနေကြပြီး၊ ခရီးသွားများအနေဖြင့် ဆိုင်ကယ်နှင့် သွားလျှင် ပိုအဆင်ပြေကြောင်း ပင်လောင်းဒေသခံ တစ်ဦးက အကြုံပြုပြောသည်။

“အဲဒီဂိတ်တွေက တောင်းနေကြပဲ။ မဖြစ်မနေခရီးသွားမယ်ဆိုရင်တောင် ဆိုင်ကယ်နဲ့ပဲ သွားသင့်တယ်။ အိမ်စီးကားဆိုရင်တော့ ပိုရစ်တာပေါ့။”ဟု အဆိုပါ ပင်လောင်းဒေသခံ တစ်ဦးက သျှမ်းသံတော်ဆင့်ကို ပြောသည်။

လွယ်ပြားဂိတ်သည် အောင်ပန်းနှင့် ပင်လောင်းသွားလမ်းတွင်ရှိပြီး စစ်ကောင်စီနှင့် ပအိုဝ်းပြည်သူ့စစ်(PNO) များက အလှည့်ကျ စောင့်ကျပ်နေသည်ဟု သိရသည်။

ထိုသို့ငွေညစ်တောင်းခံရသူ အများဆုံးမှာ အနီးနားက ကလော ၊အောင်ပန်းအပြင် တောင်ကြီး ၊ညောင်ရွှေ၊ ရွာငံ မိုးဗြဲ နှင့် ဖယ်ခုံ ကဒသေခံများဖြစ်ကြောင်း သတင်းရင်းမြစ်များထံမှ သိရသည်။

ယခုလက်ရှိပင်လောင်းမြို့နယ်တွင် စစ်ကောင်စီ၊ PNOတပ်များက အင်အားအလုံးရင်းဖြင့် နေရာယူထားပြီး မိုးဗြဲ၊ဖယ်ခုံဖက်သို့ မကြာခဏ စစ်ကောင်စီ အင်အားဖြည့်တင်းနေကြသည်ဟု ဒေသခံများထံမှ သိရသည်။

အလုပ်သင် သတင်းထောက် နန်းလရောင် ရေးသားသည်။