သျှမ်းပြည်တောင်ပိုင်း၊ ရွာငံမြို့နယ်ရှိ စစ်ရှောင်များအတွက် အမျိုးသမီးလစဉ်သုံးနှင့် စားနပ်ရိက္ခာများ အရေးပေါ်လိုအပ်နေကြောင်း စစ်ရှောင်ကူညီသူများထံမှ သိရသည်။
ပြီးခဲ့သည့် (၂၀၂၄ ခုနှစ် ဒီဇင်ဘာလ ၂၂ ရက်နေ့မှ ၂၃ ရက်) နေ့ ရွာငံမြို့နယ် ၊ရနဲ ကျေးရွာအုပ်စု မင်းပလောင်ကျေးရွာတွင် စစ်ကောင်စီနှင့် ဓနုပြည်နယ်အမျိုးသားကာကွယ်ရေးတပ်တော် (DSNDA) တိုက်ပွဲ ဖြစ်ပွားခဲ့ပြီး မင်းပလောင်ကျေးရွာကို စစ်ကောင်စီမှ မီးရှို့ဖျက်ဆီးခဲ့သည်။
ထိုကဲ့သို့ မီးရှို့ဖျက်ဆီးခဲ့ပြီးနောက် မင်းပလောင်ကျေးရွာမှ ဒေသခံများ ရွာလုံးကျွတ် နီးစပ်ရာ ကျေးရွာဘုန်းကြီးကျောင်းနှင့် တောတောင်တို့တွင် ထွက်ပြေးတိမ်းရှောင်နေကြရကာ အမျိုးသမီး လစဉ်သုံးနှင့် စားနပ်ရိက္ခာများ အရေးပေါ် လိုအပ်နေသည်ဟု စစ်ရှောင်ကူညီနေသူတစ်ဦးက ပြောသည်။
“တစ်ရွာလုံးမီးရှို့သွားတာဆိုတော့ ဘာမှမကျန်တော့ဘူး။ စပါးတွေပါရှို့သွားတဲ့အတွက် စားနပ်ရိက္ခာအပါအဝင် အမိုးအကာ တွေပိုလိုတယ်။အမျိုးသမီး လစဉ်သုံးတွေလည်း လိုအပ်တယ်။ ကျနော်တို့လည်း တတ်နိုင်သလောက် အလှူခံပေမဲ့ လူဉီးရေ (၈၀၀) ဆိုတော့မလုံလောက်ဘူး။” ဟု အဆိုပါ စစ်ရှောင်ကူညီနေသူ အမျိုးသားတစ်ဉီးက သျှမ်းသံတော်ဆင့်ကို ပြောသည်။
ယခုလက်ရှိစစ်ရှောင်များသည် အလှူရှင် အနည်းစု လာရောက်လှူထားသည့် ရိက္ခာခြောက်အနည်းငယ်ကို ခွဲဝေစားသောက်ကာ ဝမ်းရေးဖြေရှင်းနေကြရသည်ဟု ၎င်း စစ်ရှောင်ကူညီနေသူက ထပ်လောင်းပြောသည်။
ထို့အပြင် စစ်ကောင်စီများက စစ်ရှောင်ရှိသည့် နေရာကိုအချိန်မရွေးလာရောက် စီးနင်းနိုင်သောကြောင့် စိုးရိမ်စိတ်ဖြင့် နေနေကြရသည်ဟု စစ်ရှောင်နေသူ တစ်ဦးက ပြောသည်။
“အချိန်မရွေး စစ်ကောင်စီက ပြန်ဝင်လာနိုင်တော့ ယောကျာ်းလေးတွေ၊ လူကြီးတွေ အတွက် ပိုပြီး စိုးရိမ်မိတယ်။ စစ်ရှောင်နေရတာတောင် စိတ်မလုံခြုံဘူး။ အပြည့်ဝ ကာကွယ်ပေးမဲ့ အဖွဲ့အစည်းလည်း မရှိတော့ အခြေအနေက ပိုဆိုးမှာပဲ စိုးရိမ်တယ်။” ဟု စစ်ရှောင်အမျိုးသမီးတစ်ဦးက ပြောသည်။
ယခုလက်ရှိ ရွာငံတွင် စစ်ရေးအရ ငြိမ်သက်နေပြီး ပွင့်လင်းရာသီဖြစ်သဖြင့် စစ်ကောင်စီနှင့် ဓနုလက်နက်ကိုင်များ စစ်ရေးဖော်ဆောင်လာမည်ကိုပါ ဒေသခံများ စိုးရိမ်လျှက်ရှိကြသည်။
ရွာငံမြို့နယ်တွင် စစ်တပ်မှ PDFများနှင့် ဆက်စပ်သည့် နေအိမ်များကို မီးရှို့ခြင်းများ ပြုလုပ်ခဲ့သော်လည်း ယခုကဲ့သို့ ရွာလုံးကျွတ်မီးရှို့ခံရမှုဖြစ်စဉ်သည် ပထမဆုံး ဖြစ်ရပ်တစ်ခုဖြစ် သည်ဟု သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments