သျှမ်းပြည် ကလောမြို့နယ်တွင် မြေပြိုမှုဒဏ်ကြောင့် ရွှံ့နွံလွှမ်းခဲ့သော ရွာများ ပြန်လည် မထူထောင် နိုင်သေးကြောင်း စုံစမ်းသိရသည်။

ပြီးခဲ့သည့် ၂၀၂၄ စက်တင်ဘာလ ဒုတိယပတ်တွင် မိုးသည်ထန်ရွာသွန်းပြီး တောင်ကျရေကြောင့် ကလောမြို့နယ် လွန်းထိုး ကျေးရွာ၊‌ ညောင်ကုန်းကျေးရွာ နှင့် မိုင်းတောင်း ရွာ(၁) ၊ ရွာ (၂)တို့သည် ရွှံ့နွံများ ဖုံးလွှမ်းသွားခဲ့သည်။

လက်ရှိ ထိုကျေးရွာများသည် ၃ လကျော်ကြာခဲ့သော်လည်း ပြန်လည် ထူထောင်ရေးများပြုလုပ်သဖြင့် နလံပြန်ထူရန် အခက်အခဲများရှိနေပြီး လာရောက်ကူညီပေးသည့်အဖွဲ့အစည်းများမရှိကြောင်း ကလောမြို့ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။

“ပြန်လည်ထူထောင်ရေးတော့လုပ်နေပါတယ်။ ဒါမဲ့ ၃ လလောက် လုပ်လာတာအရင်လိုတော့ ပြန်မဖြစ်သေးဘူး။ အခု‌နောက်ပိုင်းတော့ လမ်းသွားလာဖို့တော့ အရင်ထပ်နည်းနည်းတော့ အဆင်ပြေပါတယ်။ တာဝန်ယူပြီး ကူညီပေး တဲ့ အဖွဲ့အစည်းဆိုတာမျိုးတော့မရှိဘူး။ဌာနဆိုင်ရာတွေတာဝန်ယူဖြေရှင်းပေးတာမျိုးမတွေ့ရတော့ ပြီးမြောက် ဖို့ကတော့ အလှမ်းဝေးတာပေါ့”ဟု ကလောမြို့ ဒေသခံအမျိုးသားတစ်ဦးက ပြောသည်။

လက်ရှိမှာ အိမ်ခြေ ရာနှင့်ချီ ပြန်လည်တည်ဆောက်ရန် ခက်ခဲသဖြင့် ကျေးရွာအနီးတဝှိက်ရှိ ကွင်းပြင်တွင် မိုးကာတဲထိုးပြီး နေထိုင်နေကြကြောင်း သိရသည်။

နိုင်ငံတဝှမ်း စံချိန်တင် ရေဘေးကြုံတွေ့နေရစဉ် ပင်လယ်ရေမျက်နှာပြင် အထက် ပေ ၄၀၀၀ ကျော် အမြင့်တွင် တည်ရှိသော ကလောမြို့တွင်လည်း ရေကြီးမှု ကြုံတွေ့နေရရာ ဆယ်စုနှစ်များစွာ အတွင်း အဆိုးဆုံး အခြေအနေ ဖြစ်သည်။

စစ်တပ်အာဏာသိမ်းပြီးနောက်ပိုင်း မြန်မာနိုင်ငံတွင် သစ်တောပြုန်းတီးမှုအများဆုံး နေရာက သျှမ်းပြည်နယ် ဖြစ်သည်ဟု ပတ်ဝန်း ကျင်ပျက်စီးမှုနှင့် သစ်တောပြုန်းတီးမှုကို စောင့်ကြည့်လေ့လာနေသည့် ကမ္ဘာ့သစ်တော စောင့်ကြည့်ရေးအဖွဲ့ (Global Forest Watch) အဖွဲ့ က ထုတ်ပြန်ထားသည်။