ကချင်ပြည်နယ်၊ ဗန်းမော်မြို့တွင် ယနေ့ တိုက်ပွဲများ ဆက်လက် ပြင်းထန်နေပြီး ဗန်းမော် လေဆိပ်ကို KIA ပူးပေါင်းတပ် အပြည့်အဝ ထိန်းချုပ်ထားပြီးဟု စစ်ရေးသတင်းရင်းမြစ်က ယနေ့ (ဇန်နဝါရီလ ၉ ရက်) တွင် ပြောသည်။

ယနေ့ ဗန်းမော်မြို့တွင်းရှိ စစ်ကောင်စီ လက်ကျန်များအား လက်နက်ကြီး၊ ဒရုန်းများဖြင့် ပစ်ခတ် တိုက်ခိုက်နေရာ တိုက်ပွဲ ပြင်းထန်နေပြီး စစ်ကောင်စီဘက်ကလည်း လက်နက်ကြီးဖြင့် ပစ်ခတ်နေကြောင်း ဆိုသည်။

ဗန်းမော် လေဆိပ်နှင့် ပတ်သက်၍ “မိမိဘက် (KIA) မှ လုံး၀ထိန်းချုပ် ထားပါတယ်။ မြို့တွင်း ကြိုကြားမှာ စစ်ကောင်စီရှိတဲ့ နေရာတွေကို အမြောက်၊ ဒရုန်းတွေ နဲ့တိုက်နေတယ်” ဟု ၎င်းကရှင်းပြသည်။

ယနေ့ စစ်ကောင်စီတပ် စကခ (၂၁) မှ ခုခံနေဆဲ ဖြစ်ပြီး တပ်တွင်းမှ လက်နက်ကြီး အများအပြား ပစ်ခတ်နေသည်ဟု ဆိုသည်။

“အဲ (စကခ ၂၁) ကနေ အမြောက်ကျည်ထွက်နေတယ်။ ဒါကို တန်ပြန်ပစ်ခတ်နေတယ်။ မနေ့က (၂၁) ကနေ အပြင်ထွက်လာလို့တိုက်ပွဲဖြစ်ခဲ့သေးတယ်” ဟု ၎င်းကထပ်မံ ရှင်းပြသည်။

တခြား သတင်းရင်းမြစ်ကမူ စကခ (၂၁) ရှိ စစ်ကောင်စီတပ်များ လက်နက်ချရန် KIA ဘက်က ရာဇသံ ပေးပို့ထားသော်လည်း လက်နက်မချသေးဟု ပြောသည်။

ဗန်းမော် တိုက်ပွဲ ထိခိုက် ကျဆုံးမှုနှင့် စစ်စခန်း သိမ်းပိုက်နိုင်မှု အခြေအနေများကိုမူ ဆက်လက် စုံစမ်းနေဆဲ ဖြစ်သည်။

KIA ပူးပေါင်းတပ်သည် ဗန်းမော် နည်းပညာတက္ကသိုလ်၊ ဆေးရုံ၊ ထွေအုပ်၊ ရဲစခန်း စသည့် အရေးကြီး နေရာများကို သိမ်းပိုက်ထားပြီး ယခု လေဆိပ်ကို ထိမ်းချုပ်နိုင်ခြင်း ဖြစ်သည်။

တရုတ် နယ်စပ်နှင့် မိုင် ၄၀ သာ ကွာဝေးပြီး လူဦးရေ ၁၄၀,၀၀၀ ကျော် နေထိုင်သည့် ဗန်းမော်မြို့ကို KIA ပူးပေါင်းတပ်က ကုန်းလမ်းနှင့် ရေလမ်း ဖြတ်တောက် တိုက်ခိုက်နေရာ မြို့ခံ ပြည်သူ ၁၅၀ ဝန်းကျင် သေဆုံးပြီး သောင်းနှင့်ချီသည့် ပြည်သူများ ပိတ်မိနေသည်ဟု ဒေသတွင်း အခြေအနေများ ဖော်ပြနေသည့် Banmaw Scout Team က ထုတ်ပြန်ထားသည်။

ပြီးခဲ့သည့် ၂၀၂၄ ခုနှစ်၊ ဒီဇင်ဘာ ၄ရက်က စတင်ခဲ့သည့် ထိုးစစ် အတွင်း KIA ဦးဆောင်သည့် တော်လှန်ရေးတပ်များက ဗန်းမော်မြို့ စကခ(၂၁) နှင့် ခလရ (၄၇) အပါအဝင် ခြေလျင်တပ်ရင်း ၄ ရင်း၊ အမြောက်တပ်၊ တင့်ကားတပ်အပြင် ဆက်သွယ်ရေးတပ်၊ ဆေးတပ်၊ အင်ဂျင်နီယာတပ်၊ စစ်မြေပြင် စစ်လက်နက် ပစ္စည်းတပ်၊ ထောက်ပံ့ရေးတပ်စသည့် တပ်များကို တိုက်ခိုက်နေခြင်း ဖြစ်သည်။

ယမန်နေ့ကမူ ဗန်းမော်နှင့် ဆက်စပ်ဒေသ မံစီမြို့ရှိ ခမရ (၃၁၉)၊ ခမရ (၆၀၁) နှင့် အမှတ် (၅၂၃) အမြောက်တပ် တပ်ရင်းဌာနချုပ် တို့ကို သိမ်းပိုက်ခဲ့ကြောင်း KIA ပြောရေးဆိုခွင့်ရှိသူက အတည်ပြု ပြောဆိုထားသည်။