ထိုင်းနှင့် တရုတ် နယ်စပ် တကြော မြန်မာနိုင်ငံဘက်ခြမ်းရှိ မြို့များတွင် ဖွင့်လှစ်ထားသော ကေတီဗွီ (KTV )များ ၌ မူးယစ်ဆေးဝါး ရောင်းချမှု ပိုမိုမြင့်တက်သည်ဟု စုံစမ်းသိရသည်။

မြန်မာသျှမ်းပြည် အရှေ့ပိုင်း တာချီလိတ်၊ မိုင်းဆတ်၊ ကျိုင်းတုံ၊နားကောင်းမူးမြို့များတွင် စစ်အာဏာသိမ်းပြီးနောက် KTV ဖွင့်လှစ်မှုများပြားပြီး ထိုထဲတွင် မူးယစ်ဆေးဝါးများ ထည့်သွင်း ရောင်းချလာကြောင်း တာချီလိတ်ဒေသခံတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီနှင့် လက်အောက်ခံ ပြည်သူစစ် ပူပေါင်းပြီး KTV တွင် မူးယစ်ဆေးကို စိတ်တိုင်းကျ ရောင်းချခွင့်ရနေပြီး၊ ၎င်းနေရာတွင် စိတ်ကြွဆေးဝါးများကို အလွယ်တကူသုံးစွဲနိုင်ကြသည်ဟု ၎င်းက ဆက်ပြောသည်။

ထို KTV ထဲတွင် Ketamine Hydrochloride (K) မူးယစ်ဆေးဝါးသည် အဖြူရောင်အမှုန့် ဖြစ်ပြီး နှာခေါင်းရှူရှိုက်ရသည့် စိတ်ကြွမူးယစ်ဆေးတစ်မျိုး၊ Happy Water ဆိုသည် ကော်ဖီအမှုန့်ပုံစံ ကော်ဖီ အနံ့ နှင့် သစ်သီးအနံ့ အရသာ အမျိုးမျိုးရှိပြီး ကော့တေးခွက် ပမဏကို ကျွဲရိုင်းအချိုရည်ဖြင့်ရောကာ သောက်သုံးကြသည့် မူးယစ်ဆေးတမျိုး ကို ထည့်သွင်းရောင်းချနေသည်။

“အခုက KTV ကို ပိုဖွင့်လာတယ် အရင်နှစ်ထက်ပိုများပြီး လူငယ်တွေ အရမ်းသွားကြတယ်။ ဘာလို့ဆို အဲ့မှာက မူးယစ်ဆေးတွေ စိတ်တိုင်းကျသုံးလိုရတယ်။ သျှမ်းရှေ့တကြောမှာ တခြားနယ်က အလုပ်လာလုပ်တဲ့သူတွေ များတော့ ပိုဆိုးတာပေါ့။ အရင်နှစ်ကတောင် ခဲအရမ်းသုံးလို့ သေသွားတဲ့သူရှိတယ် ဒါကို ဘယ်သူမှ အရေးယူဆောင်ရွက်မှုမရှိကြဘူး၊ လူငယ်တွေကို အရမ်းပျက်စီးစေတယ်”ဟု ၎င်း ပြောသည်။

သျှမ်းရှေ့တကြောတွင် ကျားဖြန့်လုပ်ငန်း၊ အွန်လိုင်းဂိမ်းလုပ်ကိုင်သူများနှင့် KTV အများပြားပိုတွေ့ရသည်။

ထိုKTVအခန်းဈေးနှုန်းများသည် ထိုင်းဘတ် ၃ထောင်၊ ၈ ထောင် နှင့် ၁သောင်းခွဲအထိ ဈေးနှုန်း အစားစားရှိကြောင်း ၊ အမျိုးသမီးကို အပျော်အပါးခေါ်နိုင်လျှင် တစ်ဦး ဘတ် ငါးရာ (မြန်မာကျပ်ငွေ ၅သောင်း) မှ ဘတ်တစ်ထောင် (မြန်မာကျပ်ငွေ တစ်သိန်း) ခေါ်ယူနိုင်းကြောင်း ၎င်းက ပြောသည်။

အလားတူ မြန်မာ-တရုတ်နယ်စပ်ဒေသရှိ မူဆယ်မြို့နှင့် နမ့်ခမ်းမြို့တွင်လည်း KTV ဖွင့်လှစ်မှုနှုန်း မြင့်တက်လာပြီး မူးယစ်ဆေးဝါးများကိုလည်း စိတ်ကြိုက်သုံးစွဲသည်။

ထိုနေရာသို့ အများဆုံးသွားသူများသည် ကျားဖြန့်လုပ်ကိုင်သူ၊ အွန်လိုင်းဂိမ်းလုပ်ကိုင်သူများသာ သွားနိုင်ကြောင်း မူဆယ်ဒေသခံ တစ်ဦးက ပြောသည်။

အဆိုပါ စိတ်ကြွမူးယစ်ဆေးဝါးသည် KTV ဆိုင်၊ ကလပ် (Club)၊ ဘား (Bar) ဆိုင်များတွင် အများဆုံးတွေ့ရပြီး (K)၊ (E) နှင့် Happy water ဟုနာမည် အမျိုးမျိုးပေးကာ လူငယ်များကြားထဲ၌ အချင်းချင်း ရေပန်းစားပြောဆိုနေကြပြီး သုံးစွဲနေကြသည်။

“မူဆယ်မှာက တရုတ်နဲ့နီးတော့ တရုတ်လူမျိုးတွေပိုလာတယ်။ ကျားဖြန့်လုပ်ကိုင်သူများတော့ သူတို့လည်း တော်တော်လာတာတွေ့ရတယ်။ ဘာလိုဆို ဝင်ငွေပိုကောင်းတဲ့သူက ပိုလာတာပေါ့။ အခုလူငယ်တွေ မထိန်းနိုင်တော့ဘူး အရမ်းကို လွပ်လပ်ကြပြီး လုပ်ချင်တာပဲ လုပ်ကြတော့တယ်။ တိုင်းရင်းသား နက်လက်ကိုင်များတော့ ပိုဆိုးလာတယ်”ဟု ၎င်းက ပြောသည်။

ပြီးခဲ့သည့် ၂၀၂၃ ခုနှစ် (စက်တင်ဘာလ ၁၇)ရက်နေ့ မူဆယ်မြို့ရှိ KTV တစ်ခုတွင် အသက် ၂၀ ကျော် အမျိုးသမီးတစ်ဦးသည် (ရွှေ) ဟု နာမည်ရသည့် စိတ်ကြွမူးယစ်ဆေးဝါးကို သုံးစွဲကာ မိနစ်ပိုင်းအကြာ သတိမေ့လစ်သွားပြီး သေဆုံးမှုဖြစ်ပွားခဲ့သည်။

စစ်တပ်က အာဏာသိမ်းပြီးနောက်ပိုင်း နယ်စပ်တလျောက်ရှိ မူဆယ်မြို့အပြင် တာချီလိတ်မြို့စသည့် မြို့ကြီးတွင် နေရာအနှံ့ဝယ်ယူ၍ ရနေပြီး အဆိုပါ စိတ်ကြွ မူးယစ်ဆေးဝါးကြောင့် လူသေဆုံးမှုများလည်း ရှိနေကြောင်း ဒေသခံများပြောပြချက်အရသိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။