သျှမ်းပြည်တောင်ပိုင်း၊ ဖယ်ခုံမြို့နယ် အတွင်းသို့ ယခုနှစ်သစ်စပိုင်းတွင် စစ်ကောင်စီမှ လေကြောင်းဖြင့် ဗုံးကြဲမှုပြင်းထန်စွာ ပြုလုပ်ဆောင် လာသည်ဟု စုံစမ်းသိရှိရသည်။
သျှမ်း- ကယား(ကရင်နီ) နယ်စပ်ဖြစ်သည့် ဖယ်ခုံမြို့နယ် ပီကင်းကျေးရွာနှင့် ဆောင်ပလန် ကျေးရွာကြားကို ပြီးခဲ့သည့် (ဇန်နဝါရီလ ၃ ရက်) နေ့ ညနေပိုင်းအချိန်တွင် စစ်ကောင်စီမှ လေကြောင်းဖြင့် ဗုံးကြဲတိုက်ခိုက်ခဲ့ပြီး ထိခိုက်သေဆုံးမှု မရှိကြောင်း ဒေသခံ အမျိုးသာားတစ်ဦးက ပြောသည်။
“ ပီကင်း နဲ့ ဆောင်ပလန် ကျေးရွာကြား မှာ ကြဲတာ။ ရွာပြင်ဖက်ပေါ့လေ ကြဲခံရတာက။ လူတော့ ထိခိုက်မှု မရှိဘူး။ နေအိမ်တစ်လုံးတော့ ပျက်စီးသွားတယ်။” ဟု ၎င်းအမျိုးသားက သျှမ်းသံတော်ဆင့်ကို ပြောသည်။
အလားတူ ပြီးခဲ့သည့် (ဇန်နဝါရီလ ၁ရက်)ညနေပိုင်းတွင် ကရင်နီပြည် ဒီးမော့ဆို အနောက်ဘက်ခြမ်းရှိ ကျေးရွာများကို လေကြောင်းဖြင့် ဗုံးကြဲတိုက်ခိုက်ခဲ့ပြီး အဆောက်အဦးများ ထိခိုက်ပျက်စီးခဲ့ကြောင်း သတင်းရင်းမြစ်များထံမှ သိရသည်။
ထို့အပြင် စစ်ကောင်စီတပ်သည် အရပ်သားကို ပစ်မှတ်ထား တိုက်ခိုက်နေခြင်းကြောင့် ဒေသခံများအနေဖြင့် လေကြောင်း အန္တာရယ် အကာကွယ်များကို လုပ်ဆောင်ထားသင့်ကြောင်း ဖယ်ခုံ စစ်ရှောင် လူငယ် အမျိုးသားတစ်ဦးက အကြံပြုပြောထားသည်။
“ စစ်တပ်ကတော့ သူတို့က အထိနာနေတာဆိုတော့ ပြည်သူတွေကို ပစ်မှတ်ထားလာတာ။ခုဆို ဒီဖယ်ခုံဘက်ကို လေကြောင်းတိုက်ခိုက်မှုတွေ မကြာခဏဆိုသလို လုပ်လာတာ။ပြည်သူတွေအနေနဲ့ လေကြောင်းအန္တရာယ် ကာကွယ်နည်းတွေ များများ လေ့လာပြီး အသုံးပြုဖို့လိုအပ်တယ်။ကိုယ်တိုင် အသက်ရှင်ဖို့ ကာကွယ်နိုင်မှပဲရတော့မယ်။” ဟု ၎င်းအမျိုးသားက အကြံပြုပြောသည်။
လက်ရှိ ဖယ်ခုံ၊ မိုးဗြဲဘက်တွင် စစ်ကောင်စီနှင့် တော်လှန်ရေးအင်အားစုများက နေ့စဉ်နီးပါး တိုက်ပွဲဖြစ်ပွားနေလျက်ရှိပြီး နှစ်သစ်အစတွင် စစ်ကောင်စီဖက်မှ အပြင်းထန် ထိုးစစ်ဆင်နေသည်ဟု အဆိုပါ စစ်ရှောင် လူငယ်တစ်ဦးက ထပ်ဆင့်ပြောသည်။
လွန်ခဲ့သည့် (၂၀၂၄) ခုနှစ် ဒီဇင်ဘာလ( ၂၇ ရက်) နေ့တွင်လည်း စစ်ကောင်စီဖက်မှ ပီကင်းကျေးရွာအနီးတွင် လေကြောင်းဖြင့် ဗုံးကြဲတိုက်ခိုက်ခဲ့သောကြောင့် စစ်ရှောင်နှစ်ဦး ထိခိုက်ဒဏ်ရာ ရရှိခဲ့သည်။
အလုပ်သင် သတင်းထောက် နန်းလရောင် ရေးသားသည်။
Leave a Comments