စစ်ကောင်စီ နှင့် ကိုးကန့်တပ်ဖွဲ့ MNDAA တို့၏ ငြိမ်းချမ်းရေးဆွေးနွေးမှုသည် အောင်မြင်နိုင်မည်မဟုတ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က ပြောသည်။

ပြီးခဲ့သည့် ဒီဇင်ဘာ ၁၅ ရက်တွင် စစ်ကောင်စီ နှင့် ကိုးကန့်တပ်ဖွဲ့ MNDAA တို့သည် တရုတ်၏ ကြားဝင်စေ့စပ်ညှိနှိုင်းပေးမှုကြောင့် တရုတ်နိုင်ငံ ကူမင်းမြို့တွင် တွေ့ဆုံဆွေးနွေးခဲ့ပြီ အဖြေမပေါ်ပဲ အောင်မြင်မှုမရရှိခဲ့ကြောင်း သိရသည်။

ထိုဆွေးနွေးမှုထဲတွင် စစ်ကောင်စီက ကိုးကန့်တပ်ဖွဲ့ကို လားရှိုးမြို့မှ တပ်ဆုတ်ခွာပေးရန် ၊ ဖမ်းဆီးထားသည့် စစ်သုံ့ပန်တပ်မှူးများ နှင့် တပ်ဖွဲ့များကို ပြန်လွှတ်ပေးရန် ၊ လားရှိုး-ကွမ်လုံ- ချင်းရွှေဟော် နယ်စပ်ဂိတ်တွေကို ပြန်ဖွင့်ပေးရန်အတွက်တောင်းဆိုခဲ့ကြောင်းသိရသည်။

အလားတူ ကိုးကန့်တပ်ဖွဲ့ကလည်း လားရှိုးမြို့ကနေတပ်ဆုတ်နိုင်မည်မဟုတ်ကြောင်း နှင့် လားရှိုးမြို့ကို အထူးဒေသ(၁) သတ်မှတ်ပေးရန် နှင့် ကိုယ်ပိုင်အုပ်ချုပ်ခွင့်နယ်မြေပေးဖို့ စစ်ကောင်စီထံ တောင်းဆိုညှိနှိုင်း ခဲ့ကြောင်း သိရသည်။

အဆိုပါ တောင်းဆိုညှိနှိုင်းမှုများကြောင့် စစ်ကောင်စီ နှင့် ကိုးကန့်တပ်ဖွဲ့တို့ ဆွေးနွေးမှုဟာအောင်မြင်နိုင်မည် မဟုတ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က ပြောသည်။

“ သူတို့က သွေးချွေးတွေပေးပြီးတော့ တန်ဖိုးပေးပြီးတော့ တိုက်ယူထားတဲ့ဟာကို နောက်ဆုတ်ပေး ပါလို့ ပြောလို့ကတော့ ‌အဲတာတော်တော်ဆိုးရွာတဲ့ကလေးအကွက်တွေပါပဲ။ အဲဒီလိုလုပ်လို့ကမရပါဘူး။ ပြီးတော့ ဒဏ်ရာဒဏ်ကြေးပေးမှပဲရမှာပါ။ အဲဒီကိစ္စတွေမှလည်း ဆွေးနွေးပွဲ မအောင်မြင်ရခြင်းရဲ့ အကြောင်းရင်း တစ်ရပ်ပေါ့ဗျာ။ငြိမ်းချမ်းရေးဆွေးနွေးမယ်လို့သာပြောတာ။ နိုင်ငံရေးအရပြသာနာဖြေရှင်းမယ်လို့ပြောတာ။ တကယ်ဖြေရှင်းနိုင်မဲ့ အကြောင်းတရားတွေမပြောပဲနဲ့ သူရဲ့ စစ်နယ်မြေတွေ ပြန်ပြီးတော့ ရရှိဖို့ကြိုးပမ်းနေတာဖြစ်တဲ့အတွက်ကြောင့် ဘယ်တော့မှ ဒီဆွေးနွေးပွဲတွေက အောင်မြင်မှာမဟုတ်ဘူးလို့ ကျနော်တို့ကတော့ သဘောထားပါတယ်” ဟု ဦးသန်းစိုးနိုင်က သျှမ်းသံတော်ဆင့်ကို ပြောသည်။

ထိုအပြင် ဆွေးနွေးမှုမအောင်မြင်တိုင်း စစ်ကောင်စီက လေကြောင်းဖြငါ့ အကြမ်းဖက်တိုက်ခိုက်နေသည်ကို တရုတ်က ဝင်ပြောဆို တားမြစ်ခြင်းမရှိဘဲ စစ်ကောင်စီဘက် တစ်ဖက်သကါ လိုက်လျောမှုများကြောင့်လည်း ဆွေးနွေးမှုသည် အောင်မြင်နိုင်မည်မဟုတ်ကြောင်း ဦးသန်းစိုးနိုင်က ထပ်လောင်းပြောသည်။

အလားတူတရုတ်က ကိုးကန့်တပ်ဖွဲ့ MNDAA ကို လားရှိုးမြို့မှ တပ်ဆုတ်ပေးရန်အတွက် ဖိအားပေးနေမှုများရှိ နေကြောင်းသိရသည်။

စစ်ကောင်စီ နှင့် ကိုးကန့်တပ်ဖွဲ့ MNDAA တို့သည် ဒီဇင်ဘာ ၁၅ ရက်တွင် တွေ့ဆုံမှု မအောင်မြင်ပြီးနောက်ပိုင်း ဇန်နဝါရီ ၁ ရက် နှစ်သစ်တွင်လည်း MNDAA ထိန်းချုပ်ထားသည့် သိန္နီမြို့ကို စစ်ကောင်စီက လေကြောင်းနှင့် ဗုံးကြဲတိုက်ခိုက်ခဲ့သည်။

ထိုသို့ဆွေးနွေးမှုမအောင်မြင်တိုင်း စစ်ကောင်စီက လေကြောင်းဖြင့် တိုက်ခိုက်ခဲ့သည့်အတွက်ကြောင့် ပြည်သူများက စိုးရိမ်စိတ်ဖြင့်နေထိုင်နေရကြောင်း လားရှိုးမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ အဲနေ့က သိန္နီကိုသွားကြဲပြီမှပြန်သွားတဲ့အချိန်မှာ လားရှိုးပေါ်ကနေ သူနိမ့်နိမ့်လေးပြန်ပြီး သူဖြတ်သွားတာလေ။ ည ၁၁ နာရီ၁၂ ဝန်းကျင်လောက်ပေါ့ ။ အဲမှာဆို အိပ်လို့တောင်မရတော့ဘူး။ ကြောက်လို့လေ ။ လေယာဉ်သံကြားတာနဲ့ ကြက်သီးတွေထ၊ လူက ကတုန်ကရင်တွေဖြစ်ပြီးငိုချင်နေပြီ အဲလေယာဉ်သံလာပြီဆိုတာနဲ့ အဲလိုဖြစ်နေတာ။ လေယာဉ်လာမှာတော့ကြောက်နေရတာပေါ့။ စိတ်ချလက်ချတော့ မနေရဲသေးဘူး” လို့ လားရှိုးမြို့ ဒေသခံအမျိုးသမီးက ပြောသည်။

အလားတူ စစ်ကောင်စီ နှင့် ကိုးကန့်တပ်ဖွဲ့ MNDAA တို့သည် ယခု ဇန်နဝါရီလအတွင်း ထပ်မံ တွေ့ဆုံဆွေးနွေးသွားမည်ဖြစ်ကြောင်းသိရသည်။