သျှမ်းပြည် တောင်ကြီးတွင် ဆိုင်ကယ်မှ ကုန်တင်ကားအားကျော်တက်ရာ ချိတ်မိပြီး ကားကြိတ်မှုဖြစ်ပွားခဲ့ကာ ဆိုင်ကယ်မောင်းသည့် အမျိုးသမီးတစ်ဦး နေရာတွင် ပွဲချင်းပြီးသေဆုံးကြောင်း စုံစမ်းသိရှိရသည်။

ယမန်နေ့ (ဒီဇင်ဘာ ၂၆ရက်) ညနေ ၆ နာရီခန့်အချိန်တွင် တောင်ကြီးမြို့အနောက်မြို့ပတ်လမ်း ရိုးမဘဏ်အနီးတွင် ဆိုင်ကယ်တစ်စီးမှ ကုန်တင်ကားအားကျော်တက်ရာ ချိတ်မိပြီး ကားနှစ်စီးကြားအတွင်းသို့ ညှပ်မိကာ ဆိုင်ကယ်မောင်းနှင်သည့် အမျိုးသမီးတစ်ဦး နေရာတွင်ပွဲချင်းပြီး သေဆုံးသွားကြောင်း မျက်မြင်တွေ့ရှိသူတစ်ဦးက သျှမ်းသံတော်ဆင့်သို့ပြောသည်။

“ဆိုင်ကယ်မောင်းလာတဲ့သူက လမ်းပေါ်ထွက်လာပြီး တွဲကားကိုကျော်ဖို့လုပ်တဲ့အချိန်မှာ အောက်ကနေတက်လာတဲ့ကားနဲ့ချိတ်မိပြီး ကားနှစ်စီးကြားရောက်တဲ့ တဖက်က တက်လာတဲ့ကားနဲ့ထိမိပြီး ကားဘီးကြားထဲညှပ်သွားတာ” ဟု မျက်မြင်တွေ့ရှိသူမှ သျှမ်းသံတော်ဆင့်သို့ပြောသည်။

တောင်ကြီးမြို့ပေါ်အနောက်မြို့ပတ်လမ်းသည် ကုန်တင်ကားများ အဓိကသွားလာရာလမ်းတစ်ခုဖြစ်ပြီး ညနေပိုင်းများတွင် ကားကြီးများ အသွားအလာများပြားသည့် လမ်းတစ်ခုဖြစ်သည်။

ကုန်တင်ကားများအသွားအလာများမှုကြောင့် လမ်းလည်း ပျက်စီးနေပြီး ကားမှောက်မှုများလည်း မကြာခဏဖြစ်ပွားနေကြောင်း မြို့ခံများထံမှ သိရသည်။

စစ်ကောင်စီလက်အောက်ခံ တောင်ကြီးမြို့နယ် စည်ပင်သာယာရေးဌာနမှ မြို့နယ်သာယာလှပရေးခေါင်းစဉ်ဖြင့် လမ်းမဘေးရှိနေအိမ်ခြံဝန်းများကို ထုံးသုတ်ခိုင်းကာ လမ်းဘေးဈေးသည်များကို အတင်းဖယ်ရှားနေသော်လည်း ပျက်စီးနေသော လမ်းအား လာရောက်ပြင်ဆင်ခြင်းမရှိသေးကြောင်း မြို့ခံများကပြောသည်။

အလုပ်သင် သတင်းထောက် ယူဂျင်း ရေးသားသည်။