သျှမ်းပြည်တောင်ပိုင်း၊ တောင်ကြီးမြို့တွင် လိုင်စင်မဲ့ ကားများကို ဖမ်းပြီး သျှမ်းမြောက်ဘက် သို့ ပို့ဆောင်နေကြောင်း မြို့ခံ များထံမှ သိရသည်။

ဒီဇင်ဘာလ ဒုတိယပတ်မှ စပြီး ယာဉ်ထိန်းရဲနှင့် စစ်ကောင်စီ ပူးပေါင်းကာလိုင်စင်မဲ့ ကားများကိုဖမ်းဆီးနေပြီး ဖမ်းမိထားသည့် ကားများကို ပြည်လည်ရွေးထုတ်၍ မရတော့ကြောင်း မြို့ခံ များကပြောသည်။

ထိုကဲ့သို့ ဖမ်းဆီးခံ ရသည့်ကားများသည် စစ်ရှောင်ကားများနှင့် ကျေးရွာများမှ တောင်ကြီးသို့ ဆေးလာကုနေသည့် လိုင်စင်မဲ့ကား အများစုဖြစ်ကြောင်း ကိုယ်တွေ့ကြုံတွေ့ရသူ တစ်ဦးက သျှမ်းသံတော်ဆင့်ကို ပြောသည်။

“နှစ်ကုန်တော့မယ်ဆိုတော့ သူတို့ ပိုက်ဆံရှာပြီပေါ့။ကျနော်တောင် အရစ်ခံလိုက်ရသေးတယ်။ရွာသားတွေဆို ဆေးခန်းလာပြတာ သူတို့ကားတွေကို ဖမ်းပြီး သျှမ်းမြောက်ပို့လိုက်တယ်။ ပြန်လိုက်ယူလည်း မရတော့ဘူး။ ကျနော်တို့ ဒီနား လူကြီးတွေနဲ့ ပြန်လိုက်သေးတယ်။ မရတော့ဘူး။ စစ်ရှောင်တွေ ကားတွေဆိုလည်း တော်တော် အဖမ်းခံထားရတယ်။” ဟု အဆိုပါ ကိုယ်တွေ့ ကြုံတွေ့ရသူ အမျိုးသားက ပြောသည်။

ထို့အပြင် သျှမ်းမြောက်ပို့ရန်အတွက် ကားများကို ချောဆွဲဖမ်းမည်ဟု ယာဉ်ထိန်းရဲမှ ပြောနေကြောင်း ၎င်းအမျိုးသားက ဆက်လက်ပြောသည်။

လိုင်စင်မဲ့ ကားများကိုဖမ်းဆီးပြီး ကားပိုင်ရှင်များကို ဖမ်းဆီးမှုမရှိကြောင်းနှင့် လိုင်စင်မဲ့ အိမ်စီးကားဆိုလျှင် ကျပ်ငွေ(၄ သိန်းမှ ၅သိန်း)အထိ တောင်းခံပြီး ပြန်လွှတ်ပေးသည်ဟု အသက် (၃၀ )ဝန်းကျင် အမျိုးသားတစ်ဦးက ပြောသည်။

“သူတို့ဖမ်းတာက လူတွေ ပစ္စည်းတွေ အများတင်လို့ရတဲ့ ကားတွေ ကိုဖမ်းတယ်။ သဲကားတို့ ကုန်ကားတို့ ဒီ ဆေးခန်းလာပြတဲ့ လူအများဆန့်တဲ့ ကားတို့ကို ဖမ်းတယ်။ ရိုးရိုးအိမ်စီးကားဆိုရင်တော့ ငွေပဲတောင်းတာ။ အများအားဖြင့် ကားတွေ ပြန်မရကြဘူး။ ပြန်ရတဲ့ ကားဆိုလည်း စုတ်ပြတ်သတ်နေတာ။” ဟု အဆိုပါ အမျိုးသားက ထပ်လောင်းပြောသည်။

ပြီးခဲ့သည့် ဒီဇင်ဘာလ (၂၁ရက်) တွင်လည်း တန်ဆောင်တိုင် ကွင်းထဲ၌ လာရောက် အနားယူ ရပ်ထားသည့် ကားများကို ဝင်ရောက်ဖမ်းဆီး သွားသည်ဟု လည်း ၎င်း အသက်( ၃၀ )ဝန်းကျင် အမျိုးသားက ဆက်ပြောသည်။

ယခုရက်ပိုင်းအတွင်း တောင်ကြီးကို လာရောက်မည့် သူများကို လိုင်စင်ရှိမှသာ လာရောက်စေလိုကြောင်းနှင့် ကားတစ်စီးတန်ဖိုး ကျပ်သိန်း(၅၀၀) ထက်မနည်းရှိသည့်အတွက် ဂရုစိုက်သွားလာစေလိုကြောင်း ထိုအမျိုးသားက အကြံပြုပြောကြားထားသည်။

ပြီးခဲ့သည့် ဒီဇင်ဘာလ (၂၃ ရက်)နေ့ ည( ၇) နာရီမှ( ၁၁) နာရီအချိန်ထိ ဆိုင်ကယ်များကို ယာဉ်ထိန်းရဲနှင့် ရဲများက ဖမ်းဆီးနေပြီး လိုင်စင်ရှိသည့် ဆိုင်ကယ်များကို ဒဏ်ငွေဆောင်ခိုင်းကာ လိုင်စင်မဲ့ ဆိုင်ကယ်များကို သိမ်းသွားကြောင်း တောင်ကြီးမြို့ခံများထံမှ သိရသည်။

အလုပ်သင် သတင်းထောက် နန်းလရောင် ရေးသားသည်။