ကချင်လွတ်လပ်ရေး တပ်မတော်(KIA) ပူးပေါင်းတပ်များ ထိုးစစ်ဆင် တိုက်ခိုက်နေသည့် ဗန်းမော်နှင့် မံစီဒေသ စစ်မျက်နှာသို့ မူဆယ်မြို့ရှိ စစ်ကောင်စီတပ်သားများ အင်အားဖြည့်နေကြောင်း သတင်းရရှိသည်။

အဆိုပါ မူဆယ်မြို့ စစ်ကောင်စီတပ်သားများထဲတွင် တရုတ်ဘက်ပြေးသွားသည့် တပ်များဖြင့် အင်အားဖြည့်တင်း ခုခံနေသည်ဟု စစ်ရေးသတင်းရင်းမြစ်က ယနေ့ (ဒီဇင်ဘာလ ၂၄ ရက်) တွင် ပြောသည်။

ဗန်းမော်မြို့တွင်း တိုက်ပွဲများ ဆက်လက် ပြင်းထန်နေပြီး ပြီးခဲ့သည့် နိုဝင်ဘာလ ၂၀ ရက်နေ့ အချင်အထူးဒေသ(၁) ကန်ပိုက်တည် ဗျူဟာကို KIA ပူးပေါင်းတပ် သိမ်းပိုက်စဥ်က တရုတ်ဘက် ထွက်ပြေးသွားပြီး မူဆယ်မြို့သို့ ရောက်ရှိနေသည့် စစ်ကောင်စီတပ်များနှင့် တပ်မ(၉၉) လက်အောက်ခံတပ်များ ပူးပေါင်း၍ အင်အား ဖြည့်တင်းနေကြောင်း ဆိုသည်။

“၂၂ ရက်နဲ့ ၂၃ ရက်နေ့က MI-17 နဲ့ ၅ ခေါက်ပို့တယ်။ ရဟတ်ယာဥ် တခေါက်ကို လူ ၇၀ အထိ တင်နိုင်တယ်။ ခဲယမ်းများရင်တော့ လူလျော့မှာပေါ့။ အဓိက မူဆယ်ကို တာဝန်ယူထားတဲ့ တပ်မ (၉၉) လက်အောက်ခံတပ်တွေနဲ့ ကန်ပိုက်တည်ဘက်ကနေ ပြေးလာတဲ့ တပ်တွေ ပြန်စုဖွဲ့ပြီး မူဆယ်ကနေ ဗန်းမော် ပို့တာပါ။ လက်ရှိ မူဆယ်မှာ လားရှိုး ရမခ ကျတုန်းက တပ်ပျက်ထားတဲ့ကောင်တွေ ရောက်နေတယ်လို့လည်း သိရပါတယ်” ဟု စစ်ရေးသတင်းရင်းမြစ်က ရှင်းပြသည်။

ပြီးခဲ့သည့် နိုဝင်ဘာလက KIA ပူးပေါင်းတပ် ကန်ပိုက်တည်နှင့် ပန်ဝါဒေသ သိမ်းပိုက်စဥ် စစ်ကောင်စီတပ် အင်အား ၃၀၀ ကျော် တရုတ်ဘက် ထွက်ပြေးခဲ့ရာ ယင်းတပ်များအား တရုတ်က မူဆယ် စစ်ကောင်စီသို့ ပို့ဆောင် လွှဲပြောင်းပေးခဲ့သည်။

လက်ရှိ ဗန်းမော် စစ်မျက်နှာတွင် တိုက်ပွဲများ ပြင်းထန်နေပြီး မံစီရှိ တပ်ရင်း ၃ ခုကို KIA ပူးပေါင်းတပ်က တပြိုင်နက် တိုက်ခိုက်နေကြောင်း တိုက်ပွဲ အတွင်း မံစီ ဗျူဟာမှူး ဗိုလ်မှူးကြီး ငြိမ်းချမ်းအောင် သေဆုံးသွားပြီဟု သတင်းများထွက်ပေါ်နေသော်လည်း အတည်မပြုနိုင်သေးကြောင်း နောက်ထပ် စစ်ရေးသတင်းရင်းမြစ်က ဆိုသည်။

“ဗန်းမော် မြို့တွင်းတိုက်ပွဲမှာက နေ့စဥ် အလောင်းလက်နက် ရနေတယ်။ မံစီ ဗျူဟာမှူး ကျတယ်လို့ သတင်းထွက်တယ်။ KIA က ပိတ်ထားတော့ ကုန်းလမ်း ရေလမ်းက စစ်ကူပို့မရဘူး၊ ရဟတ်ယာဥ်နဲ့ ပို့နေတာရှိတယ်။ တိုက်ပွဲကတော့ နေ့တိုင်းပဲ” ဟု ၄င်းကရှင်းပြသည်။

ပြီးခဲ့သည့် ဒီဇင်ဘာ ၄ရက်က စတင်ခဲ့သည့် ဗန်းမော်နှင့် မံစီ KIA ပူးပေါင်းတပ် ထိုးစစ် အတွင်း လက်နက်ကြီး ပစ်ခတ်မှုနှင့် စစ်ကောင်စီ လေကြောင်း တိုက်ခိုက်မှုများကြောင့် အရပ်သား ပြည်သူ အနည်းဆုံး ၅၀ ကျော် သေဆုံးပြီး အများအပြား ဒဏ်ရာရရှိခဲ့သည်ဟု လူမှုကူညီရေးအသင်းများက ပြောဆိုထားသည်။

ဗန်းမော်မြို့သည် ကချင်ပြည်နယ်၏ ဒုတိယ မြို့တော်ဖြစ်ပြီး စစ်ကောင်စီတပ် စကခ(၂၁) အပါအဝင် တပ်ရင်းတပ်ဖွဲ့ ပေါင်းစုံ ၁၇ ခုထက်မနည်း တည်ရှိပြီး မံစီမြို့တွင် ခမရ (၃၁၉)၊ ခမရ (၆၀၁) နှင့် အမှတ် (၅၂၃) အမြောက်တပ် တပ်ရင်းဌာနချုပ်တို့ တည်ရှိရာ KIA ပူးပေါင်းတပ်က တပြိုင်နက် တိုက်ခိုက်နေခြင်း ဖြစ်သည်။