သျှမ်းပြည်တောင်ပိုင်း၊တောင်ကြီးမြို့တွင် အိမ်ငှားခ ဈေးအဆမတန် မြင့်တက်နေကြောင်း အိမ်ငှားနေသူများထံမှ သိရှိရသည်။
ယခင် (၂၀၂၃) ခုနှစ်တွင် တစ်ထပ်အိမ် တစ်လုံးကိုကျပ်( ၂ သိန်းခွဲ) သာရှိပြီး ယခုကာလတွင် ကျပ်(၆သိန်း) အထိ ဈေးမြင့်တက်လာကာ အလုပ်ကိုင် ဝင်ငွေ အဆင်ပြေမှ သာ ရေရှည်ရပ်တည် နိုင်မည်ဖြစ်ကြောင်း အိမ်ငှားများကပြောသည်။
ထို့အပြင် ယခုကဲ့သို့ အိမ်ငှားခ ဈေးမြင့်တက်နေရခြင်းသည် လားရှိုးဘက်မှ လာသည့်စစ်ရှောင်များက ငွေများများဖြင့် ငှားရမ်းနိုင်သောကြောင့် အိမ်ရှင်များမှ ဈေးတင်လိုက်သည်ဟု အိမ်ငှားဝန်ဆောင်မှု လုပ်ကိုင်သည့် မငယ်က ပြောသည်။
“လွိုင်ကော်တို့ ဖယ်ခုံတို့စစ်ရှောင်လာတုန်းက သိပ်ပြီး ဈေးမတက်သေးဘူး။ ကျပ်(၂သိန်းခွဲ)ပဲ ရှိသေးတာ။ သျှမ်းမြောက် လားရှိုးဘက် စစ်ရှောင်တွေရောက်လာတော့ ဈေးတွေ တက်သွားတာ။ သူတို့က ပေးနိုင်တယ်လေ။ အဲတော့ အိမ်ရှင်တွေလည်း ဟိုအိမ်က ကျပ်(၁၀ သိန်း) ရတယ်။ ဒီအိမ်က ဘယ်လောက်ရ တယ်နဲ့ အိမ်ရှင်တွေက ဈေးလိုက်မြင့်လိုက်တာ။”ဟု အိမ်ငှားဝန်ဆောင်မှုလုပ်ကိုင်နေသည့် မငယ်က သျှမ်းသံတော်ဆင့်ကို ပြောသည်။
ထိုကဲ့သို့ ဈေးတင်လိုက်ခြင်းကြောင့် တစ်ထပ်အိမ် ရိုးရိုးတစ်လုံးလျှင် ကျပ်(၆သိန်း) ၊ နှစ်ထပ်အိမ် ရေပူ၊ရေအေး ရသည့် အိမ်တွင် ကျပ်(၈သိန်း) အထိ ဈေးရှိနေပြီး အဆောင် အခန်းတစ်ခန်းလျှင့် ကျပ်( ၁သိန်းခွဲ)အထိ ငှားပေးနေကြောင်း ၎င်းက ထပ်လောင်း ပြောသည်။
အိမ်ငှားခ ဈေးအဆမတန် မြင့်တက်လာခြင်းကြောင့် ငွေကြေးခက်ခဲသည့် စစ်ရှောင်များအနေဖြင့် ဝင်ငွေတိုးလာဖြင်းမရှိဘဲ အိမ်ငှားခသာ တိုးလာကြောင်း စစ်ရှောင် အမျိုးသားတစ်ဦးက ပြောသည်။
“ဒီမှာ စစ်ရှောင်လာတာ ၃နှစ်ရှိတော့မယ်။ ဒီတစ်ခါ အိမ်လခ အမြင့်ဆုံးပဲ။ ဝင်ငွေနဲ့ ထွက်ငွေနဲ့က မမျှဘူး။ ဒီလိုသာ ဆက်ပြီး ဈေးတက်နေမယ်ဆိုရင် အိမ်လည်း မငှားနိုင်လောက်တော့ဘူး။ ကိုယ်ရတဲ့ ဝင်ငွေက စားဖို့တောင်အနိုင်နိုင်နဲ့။ ဝင်ငွေက တိုးမလာဘူး။ အိမ်ငှားခတွေပဲ တိုးလာတာ။”ဟု ဖယ်ခုံမှ စစ်ရှောင်လာသည့် အမျိုးသား တစ်ဦးက ပြောသည်။
ယခုကဲ့သို့ အိမ်ငှားခကို ဈေးအဆမတန် တက်နေမည့်အစား အိမ်ရှင်နှင့် အိမ်ငှား ဈေးညှိနိူင်းသင့်ကြောင်းနှင့် ယခုလိုကာလများတွင် စစ်ရှောင်များကို ကူညီပေးစေလိုကြောင်း အဆိုပါ စစ်ရှောင်အမျိုးသားက အိမ်ရှင်များကို အကြံပြုပြောကြားထားသည်။
ယခုလက်ရှိ တောင်ကြီးမြို့တွင် လူဦးရေများပြားလာပြီး ကုန်ဈေးနူန်းအဆမတန် မြင့်တက်နေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments