သျှမ်းပြည်မြောက်ပိုင်း မူဆယ်မြို့တွင် ဆရာဝန် အမျိုးသမီးတစ်ဦးသည် ဆံပင်ဆိုင်တွင် ခေါင်းလျှော်နေစဉ် အမည်မသိအမျိုးသားတစ်ဉီးက ကားဓားပြတိုက်ယူသွားကြောင်း စုံစမ်းသိရသည်။

ယမန်နေ့ (ဒီဇင်ဘာလ ၂၁ ရက်) နေ့ မနက်ပိုင်း ၁၀နာရီခွဲ ဝန်းကျင်အချိန်တွင် ဆရာဝန် အမျိုးသမီးတစ်ဦးသည် မူဆယ်မြို့ ဟိုမွန်ရပ်ကွက်ရှိ နှင်းနှင်းဆံပင်ညှပ်ဆိုင်တွင် ခေါင်လျှော်နေစဉ် အမည်မသိအမျိုးသားတစ်ဦးက ကားရွေ့ပေးရန် ကားသော့ လာတောင်းရာတွင် ၎င်းဆရာဝန်၏ခါးကို သေနတ်ဖြင့်ချိန်ပြီးဓားပြတိုက်သွားကြောင်း ဖြစ်စဉ်ကို သိသည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။

“မနေ့က ၁၀ နာရီခွဲဝန်းကျင်မှာ အဲရပ်ကွက်က ဆံပင်ဆိုင်ကို ခေါင်းသွားလျှော်နေတဲ့ချိန် အပြင်က အမျိုးသားတစ်ယောက်က ကားရွေ့ပေးဖို့ဆိုပြီး အဲဆရာမရှိတဲ့နားကို သွားပြီး သေနတ်နဲ့ ခါးကို ချိန်တယ်။ အဲ့ဒါနဲ့ ကားသော့နဲ့ ပိုက်ဆံအိတ်ကို ယူသွားတာပဲ” ဟု ၎င်းက ပြောသည်။

ဓားပြတိုက်ခံရသည့်ကားသည် လိုင်စင်တပ်ဆင်ထားသည့် ကားဖြစ်သည်။

လက်ရှိတွင် နိုင်ငံရေး အခြေနေအရ တရုတ်- မြန်မာ ကျားဖြန့်လုပ်ငန်းနှင့် ငွေလဲလှယ်သူများ၊ ဆိုင်ကြီးဖွင့်ထားသူ အနေဖြင့်လည်း သူခိုး ဓားပြများကိုလည်း သတိထားရမည်ဖြစ်ပြီး မူးဆယ်ဒေသခံ များက ပြောဆိုသည်။

ထို့အပြင် မူးဆယ်မြို့တွင် မကြာခဏ ဓားပြတိုက်နေသည့် သူများသည် အဖွဲ့လိုက်ရှိကာ အုပ်စုလိုက် လူအပြောင်းလဲ လုပ်နေကြကြောင်း၊ တစ်အုပ်စုတွင် ၁၀ ယောက် သို့မဟုတ် ၅ ယောက် အုပ်စုလိုက် ရှိနေတယ်ဟု အသက် ၄၀နှစ်အရွယ်ရှိ အမျိုးသားတစ်ဉီးကပြောသည်။

“မူဆယ်မှာက ပိုဆိုးလာနေတယ် လူအုပ်စုလိုက်ရှိတယ် သူတို့က ၁၀ ယောက်အဖွဲ့နဲ့ ၅ ယောက်ဖွဲ့ရှိတယ်။ တခါခိုးရင် လူပြောင်းလိုက်တယ်။ ပိုပြီး သတိထားရတယ် ခုက ကားရွေ့မယ်ပြောပြီး‌တောင် ယူသွားသေးတယ်ဆိုတော့ သူတို့ အတွက် လက်နတ်ရှိရင် အရမ်းလွယ်ကူလာတယ်။ ဘယ်သူမှလည်း အရေးယူဆောင်ရွက်မှု မလုပ်ပေးဘူး”ဟု ၎င်းက ပြောသည်။

မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များသည် ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိသည်။

မူဆယ်မြို့သည် တရုတ်နယ်စပ်မြို့ဖြစ်ပြီး လက်ရှိအချိန်ထိ တိုက်ပွဲမဖြစ်ပွားသေးသည့် ဒေသတစ်ခု ဖြစ်နေသေးကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။