သျှမ်းပြည် တောင်ကြီးမြို့ ပန်းလှိုင်ဆေးရုံတွင် လူနာစောင့်နေသည့် ကချင်လူငယ် အမျိုးသမီးတစ်ဦးကို KIA ဆေးရဲမေဟုဆိုကာ စစ်ကောင်စီမှ အရပ်ဝတ်များဖြင့် ဝင်ရောက်ဖမ်းဆီးခဲ့ကြောင်း စုံစမ်းသိရသည်။

ဒီဇင်ဘာလ (၁၆) ရက် ည ၁၀ နာရီခန့်တွင် တောင်ကြီးမြို့ သစ်တောရပ်ကွက်ရှိ ပန်းလှိုင်ဆေးရုံ၌ လူနာစောင့်နေသည့် ကချင်လူငယ် အမျိုးသမီးတစ်ဦးကို TikTok ဗွီဒီယိုမှတဆင့် ခြေရာခံပြီး KIA ဆေးရဲမေဟုဆိုကာ စစ်ကောင်စီလက်အောက်ခံ ရဲနှင့် ပြည်သူ့စစ် (၁၀) ဦးမှ အရပ်ဝတ်များဖြင့် ဝင်ရောက်ဖမ်းဆီးခဲ့ကြောင်း ဖြစ်စဉ်သိရှိသူ တောင်ကြီးဒေသခံများက ပြောသည်။

“ည ၁၀ နာရီလောက် လာဖမ်းသွားတာ၊ Tik Tok ဗွီဒီယိုကနေ လာတယ်ပြောတယ်။ အပြင်ဝတ်တွေနဲ့ ၁၀ ယောက်လောက် လာတယ်၊ ရဲလား ပြည်သူ့စစ်လား မပြောတတ်ဘူး။ အခန်းထဲ ဝင်စစ်ပြီး ဖုန်းနဲ့ လက်ပ်တော့တွေ ယူသွားတယ်။ ဗွီဒီယိုထဲက ကောင်မလေး သိလားတဲ့ အဲ့လိုမေးပြီး အခန်းလိုက်စစ်ပြီးတော့ ဖမ်းသွားတယ်”ဟု ဆေးရုံတွင် မျက်မြင်တွေ့ရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကနဦးတွင် ပန်းလှိုင်ဆေးရုံမှ လူနာစောင့်အမျိုးသမီး နှစ်ဦးကို စစ်ကောင်စီလက်အောက်ခံ အရပ်ဝတ် ရဲနှင့် ပြည်သူ့စစ်များမှ တောင်ကြီးမြို့မရဲစခန်းသို့ ဖမ်းဆီးခေါ်ဆောင်သွားပြီး မြို့ခံ အမျိုးသမီးဖြစ်သူကို ပြန်လွှတ်ပေးခဲ့သော်လည်း KIA ဆေးရဲမေဟု ဆိုသည့် အမျိုးသမီးကို ဆက်လက် ဖမ်းဆီးခံထားကြောင်း ဒေသခံများထံမှ သိရသည်။

“KIA က ဆေးရဲမေတစ်ဦး တောင်ကြီးမှာ မိထားတယ်လို့ သိရတယ်၊ ပန်းလှိုင်မှာ မိတာ။ သူ့အသိ လူနာလာစောင့်ရင်း ပါသွားတာ။ သျှမ်းမြောက် ကွတ်ခိုင်ဘက်က KIA ဆေးရဲမေ၊ ဖုန်းထဲမှာ စစ်ယူနီဖောင်းနဲ့ ပုံတွေလည်း များတယ်လို့ ပြောတယ်။ Tik Tok ကနေ လိုက်တာတဲ့၊ သူက ဆေးရုံနေရာ ပုံတင်လိုက်တာနဲ့ ဟိုလူတွေ ရောက်လာတာ”ဟု ဖြစ်စဉ်သိရှိသူ လူငယ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

တောင်ကြီးမြို့တွင် ယခုဖမ်းဆီးမှုနှင့် ပတ်သက်ပြီး စစ်ကောင်စီအားပေး တယ်လီဂရမ်ဝါဒဖြန့် ချန်နယ်များတွင်လည်း ပန်းလှိုင်ဆေးရုံ၌ KIA တပ်မဟာ (၆)မှ တပ်ဖွဲ့ဝင်တစ်ဦးကို စစ်ကောင်စီ တပ်ဖွဲ့ဝင်များမှ ဖမ်းဆီးခေါ်ဆောင်သွားခဲ့ကြောင်း ကျယ်ကျယ်ပြန့်ပြန့် ဖြန့်ချိနေကြသည်။

တောင်ကြီးမြို့ ပန်းလှိုင်ဆေးရုံတွင် စစ်ကောင်စီလက်အောက်ခံ ရဲနှင့် ပြည်သူ့စစ်များမှ အရပ်ဝတ်ဖြင့် ဝင်ရောက်ဖမ်းဆီးမှုပြီးနောက် ပုံမှန်လည်ပတ်နေပြီး လူနာလည်း ဆေးရုံဆင်းသွားပြီဖြစ်ကြောင်း တောင်ကြီးဒေသခံ ၎င်းအမျိုးသမီးက ဆက်ပြောသည်။

“ကိုယ့်လုံခြုံရေးက နံပါတ်တစ် အဓိကပေါ့၊ စစ်ဝတ်စုံဝတ်ပြီး ရိုက်ထားတဲ့ ဓာတ်ပုံ ဗွီဒီယိုတို့၊ ကင်မရာ လွယ်ပြီး ရိုက်ထားတာမျိုးတို့ အဲ့လိုပုံတွေကို ဖုန်းထဲ ဒါမှမဟုတ် ကိုယ့်ရဲ့ ဖေ့စ်ဘုတ်၊ Tik Tok အကောင့်ထဲ ဖြစ်နိုင်ရင် မထားပါနဲ့။ ကိုယ်က ရိုက်ထားလို့ ဖျက်မယ်ဆိုရင်လည်း Recycle ထဲအထိ ဘာသက်သေမှ မကျန်အောင် သွားဖျက်သင့်တယ်”ဟု သျှမ်းသံတော်ဆင့်မှ အိုင်တီပညာရှင်တစ်ဦးက အကြံပြုသည်။

အလားတူ တောင်ကြီးမြို့တွင် နိုဝင်ဘာလမှ စတင်၍ ယခင်ကထက် စစ်ဆေးတင်းကြပ်မှု များပြားလာပြီးနောက် ညအချိန် အပြင်ထွက်သည့် လူငယ်အမျိုးသားများကို စစ်ကောင်စီမှ အဓိက ဖမ်းဆီးမှု ပြုလုပ်နေကြောင်း ဒေသခံများထံမှ သိရသည်။

ထို့အပြင် စစ်ကောင်စီက ဖမ်းဆီးထားသူများအား ငွေကျပ်သိန်းဆယ်ချီ တောင်းခံပြီးမှ ပြန်လွှတ်ပေးကြောင်း မြို့ခံများက ပြောဆိုသည်။

တောင်ကြီးမြို့ပေါ် စစ်ကောင်စီထံ ဖမ်းဆီးခံရသူ အများစုသည် လက်လုပ်လက်စား အခြေခံလူတန်းစားများ ဖြစ်နေသည့်အတွက် ဖမ်းဆီးခံရပြီးနောက်ပိုင်း သတင်းအစအန ပျောက်ကွယ်သွားကာ စစ်သင်တန်းနေရာ သို့မဟုတ် ရှေ့တန်းသို့ ပို့ဆောင်ခံရခြင်းကို လူမသိ သူမသိ ကျူးလွန်ခံနေရသည့် အခြေအနေများစွာ ရှိနေကြောင်း ဒေသခံများထံမှ သိရသည်။