သျှမ်း-ကရင်နီ တကြော ဖြစ်သည့် လွိုင်ကော်မြို့၊ မိုးဗြဲမြို့နှင့် ဖယ်ခုံမြို့ ဘက်ကို စစ်ကောင်စီတပ်နှင့် ပအိုဝ်းပြည်သူ့စစ် PNO တို့ ပြန်လည်ထိန်းချုပ်နိုင်ရန် စစ်အင်အားအလုံးအရင်းဖြင့် စစ်ကြောင်းထိုး နေကြောင်း စုံစမ်းသိရသည်။

ယမန်နေ့ (ဒီဇင်ဘာလ ၁၈ ရက်)နေ့ လွိုင်ကော်မြို့အနီးရှိ ကျောက်ကြီးရွာနှင့် လယ်ထွဲကျေးရွာဘက်တွင် စစ်ကောင်စီ၊ PNO ပူးပေါင်းတပ်ဖွဲ့ နှင့် တော်လှန်ရေး အင်အားစုတပ်ဖွဲ့တို့ ထိတွေ့ တိုက်ပွဲများ ပြန်လည် ဖြစ်ပွားနေသည်ဟု စစ်ရှောင်လာသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ တိုက်ပွဲများ ပြင်းထန်နေသော်လည်း စစ်ကောင်စီတပ်သည် လွိုင်ကော်မြို့၊ မိုးဗြဲမြို့နှင့် ဖယ်ခုံမြို့တို့ဘက်တွင် နေရာအပြည့် ပြန်လည် ထိန်းချုပ်နိုင်ရန် ပြည်သူစစ် (PNO) ပူးပေါင်းတပ်နှင့် စစ်အင်အား နေ့စဉ် ထပ်မံ ဖြည့်တင်းနေကြောင်း ၎င်းက ဆက်ပြောသည်။

“လွိုင်ကော်မြို့နဲ့ဆို အသံကြားရတယ်၊ အသံတော်တော်ကျယ်တယ်။ စစ်တပ်က လွိုင်ကော်မြို့အနီးက ရှိတဲ့ ရွာတွေပါ မချန်ဘူး သူအကုန်လုံးကို ပြန်လည် ထိန်းချုပ်ချင်နေတာ။ တခုခုဆိုရင် ကျနော်ဆို့ ပြည်သူကပဲ ခံရတယ်။ လွိုင်ကော်မြို့မှာတောင် လူတွေ စည်နေပြီး ဈေးတွေလည်း ပြန်ဖွင့်ကြတယ်၊ လျှပ်စစ်မီးလည်း မနေ့က စပြီး ပြန်ရနေတယ်” ဟု ၎င်းက ပြောသည်။

လက်ရှိ လွိုင်ကော်မြို့တွင် ယမန်နေ့ (ဒီဇင်ဘာလ ၁၈ ရက်)နေ့က စပြီး လျှပ်စစ်မီး ပြန်လာပြီး ဒေသခံလည်း ပြန်လည်လာရောက်နေထိုင်ကြကြောင်း သိရည်။

ထို့အပြင် မိုးဗြဲမြို့နှင့် ဖယ်ခုံမြို့တွင်လည်း တိုက်ပွဲဖြစ်ပွားမရှိဘဲ စစ်ရှောင်ပြည်သူ၏ နေအိမ်များကို စစ်ကောင်စီတပ်က နေ့စဉ် လက်နက်ကြီးဖြင့် အဆက်မပြတ် ပစ်ခတ်ခြင်ကြောင်း နေအိမ်အဆောက်အအုံနှင့် စစ်ရှောင်ဒေသခံများလည်း ထိခိုက်ဒဏ်ရာ ရရှိသည်ဟု ဖယ်ခုံ ဒေသခံ အမျိုးသားတစ်ဦးက ပြောသည်။

ပြီးခဲ့သည့် (ဒီဇင်ဘာလ ၁၇ ရက်)တွင်လည်း ဖယ်ခုံမြို့ရှိ လွယ်ပန်းစုံကျေးရွာတွင် စစ်ကောင်စီတပ်မှ လက်နက်ကြီး ၈ ကြိမ် ပစ်ခတ်တိုက်ခိုက်ခြင်းကြောင်း ကျေးရွာဒေသခံ ၅ ဦးထက်မနည်း ထိခိုက် ဒဏ်ရာရရှိခဲ့ပြီး ၎င်းထဲတွင်မှ ၃ ဦးသည် ပြင်းထန်ဒဏ်ရာ ရရှိနေကြောင်း ၎င်းက ဆက်ပြောသည်။

“အခုဆိုရင် မိုးဗြဲနဲ့ ဖယ်ခုံဘက်မှာဆို စစ်တပ်က လက်နက်ကြီးနဲ့ ပစ်ဝင်လာတာ ပြည်သူတွေလည်း မသိတော့ ရှောင်ဖို့ အချိန်က မရှိလိုက်ရတာကြောင့် ၅ ယောက်တောင်မကဘူး ထိသွားတယ်။ အဲထဲမှာမှ ၃ ယောက်က ပြင်းထန်နေတယ်။ ဆေးရုံတင်ထားလိုက်ရတယ်။ စစ်တပ်က ပြန်လည် ထိန်းချုပ်ဖို့ ကြိုးစားနေတယ်ဆိုပေမဲ့ ကျနော်တို့ ပြည်သူတွေကို လက်နက်ကြီးနဲ့ အနိုင်ယူတာမျိုး မဖြစ်စေချင်ဘူး”ဟု ၎င်းက ပြောသည်။

စစ်ကောင်စီ၏ လက်နက် ပစ်ခတ်မှုကြောင်း ပြောင်းခြံနှင် လယ်ယာခြံများသို့ မည်သူမှ မသွားရဲကြောင်း၊ အနီးတဝိုက်ရှိ ဂိတ်တွေလည်း PNO တပ်ဖွဲ့သည် တစ်ဦးလျှင် ပိုက်ဆံ ၆ သိန်းပေးမှသာ ဖြတ်သန်းခွင့်ပြုကြောင်း၊ ဖြတ်သန်းသွားလာစဉ်တွင်လည်း မည်သည့် ပစ္စည်းကိုမှ သယ်ယူခွင့် မပြုကြောင်း ဖယ်ခုံမြို့ရှိ အသက် ၂၆အရွယ် ရှိ အမျိုးသားတစ်ဦးက ပြောသည်။

“အခုလို့ လက်နက် ပစ်တော့ ဘယ်သူမှ ပြောင်းခြံတို့ လယ်တို့ မသွားရဲတော့ဘူး။ ရွာအနီးရှိ ဂိတ်တွေဆို ပစ္စည်းမပြောနဲ့ လူတယောက်ဖြတ်ရင် ပိုက်ဆံ ၆သိန်းပေးမှ ပေးဖြတ်တာ အဲ့ဒါတောင် လမ်းလျှောက်သွားရတာ ကားတွေ မပေးဖြတ်ဘူး။ PNOပြည်သူစစ်တွေလည်း ပိုက်ဆံအရမ်းကောက်တယ်”ဟု ၎င်းက ပြောသည်။

လက်ရှိ မိုးဗြဲမြို့ကို ပြည်လည်ထိန်းချုပ်နိုင်ရန် စစ်ကောင်စီမှ စစ်အင်အား အလုံးအရင်းဖြင့် စစ်ကြောင်းထိုးနေပြီး စစ်ကောင်စီနှင့် ကရင်နီတော်လှန်ရေးတပ်ပေါင်းစုံများနှင့် တိုက်ပွဲ ဆက်လက်ပြင်းထန်နေကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။