သျှမ်းတောင်၊ ရပ်စောက်မြို့နယ်၊ ကျောက်ဂူဒေသတွင် ယမန်နေ့ (ဒီဇင်ဘာ ၁၈ ရက်) နံနက်ပိုင်းမှ စတင်၍ တိုက်ပွဲ ပြင်းထန်ခဲ့ရာ စစ်ကောင်စီ လေကြောင်း ဗုံးကြဲမှုကြောင့် ပြည်သူ ထိခိုက် သေဆုံးမှုရှိပြီး ကျောက်ဂူရွာအဝင် တံတား ပျက်စီးသွားကြောင်း ဒေသခံများက ပြောသည်။
စစ်ကောင်စီ၏ စစ်သင်တန်းကျောင်းများရှိရာ ရပ်စောက်မြို့အနီး၊ ကျောက်ဂူရွာတွင် ဓနုပြည်သူ့လွတ်မြောက်ရေး တပ်တော် (DPLA) နှင့် စစ်ကောင်စီတပ် ယမန်နေ့ (ဒီဇင်ဘာ ၁၈)ရက် တိုက်ပွဲ အတွင်း ရွာတွင်းရှိ နေအိမ်များ ထိခိုက် ပျက်စီးမှုရှိပြီး ဒေသခံများ ထွက်ပြေးနေရကြောင်း ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ရွာထိပ်တံတားမှာ ဓနုတပ် ဂိတ်လာဖွင့်တာကနေ စဖြစ်တာ။ အခု ညပိုင်းတော့ ငြိမ်နေတယ်။ လက်နက်ကြီးတွေကျတော့ တရွာလုံး ထွက်ပြေးရတာပေါ့။ ဗုံးကြဲလို့ အမျိုးသမီးငယ် တဦးသေတယ်။ ဖုန်းလိုင်းက ရတချက်မရတချက်။ ရွာထိပ်က တံတား ကားကြီးြဖတ်လို့မရတော့ဘူး” ဟု ဒေသခံ တဦးက ယမန်နေ့ ညနက်ပိုင်းတွင် ပြောသည်။
စစ်ကောင်စီ အမြောက်တပ် အမတ (၃၄၉) နှင့် ခြေလျင်တပ်ရင်း ခလရ (၂၉၂) တည်ရှိရာ ကျောက်ဂူဒေသ ယမန်နေ့ နေ့လယ်ပိုင်း တိုက်ပွဲ ပြင်းထန်စဥ် စစ်ကောင်စီ လေကြောင်းမှ ၃ ကြိမ် ဗုံးကြဲ တိုက်ခိုက်ခဲ့သည်ဟု ဆိုသည်။
တိုက်ပွဲဖြစ်စဥ်နှင့် တကွ ထိခိုက် ပျက်စီးမှု အသေးစိတ် အခြေအနေများကို ထပ်မံ စုံစမ်းနေဆဲ ဖြစ်သည်။
ပျက်စီးသွားသည့် ကျောက်ဂူရွာထိပ် တံတားသည်သျှမ်းတောင်-သျှမ်းမြောက် လမ်းမဖြစ်သည့် ရပ်စောက်-အင်တော-ကျောက်ဂူ-နောင်ချို-နမ့်လန်-လားရှိုး-ကျောက်မဲ တို့ကို ဆက်သွယ်ထားသည့် လမ်းပိုင်းမှ တံတား ဖြစ်သည်။
ပြီးခဲ့သည့် နိုဝင်ဘာလ ၃၀ ရက်နေ့မှ ဒီဇင်ဘာလ ၉ ရက်နေ့ အထိ တိုက်ပွဲများအတွင်း စစ်ကောင်စီတပ်သား ၅၀ ကျော် သေဆုံးခဲ့ကာ အများအပြား ဒဏ်ရာ ရရှိခဲ့ကြောင်း ဒီဇင်ဘာလ ၇ ရက်ညတွင်လည်း စစ်ကောင်စီ ဒရုန်းဖြင့် ဓာတုဗုံးကြဲ တိုက်ခိုက်ခဲ့ကြောင်း ဓနုတပ်- DPLA က ထုတ်ပြန်ထားသည်။
Leave a Comments