သျှမ်းပြည် လားရှိုးမြို့ပေါ် ရပ်ကွက်တိုင်းတွင် ကိုးကန့်တပ်ဖွဲ့ MNDAA က လုံခြုံရေးအဖွဲ့များ ဖွဲ့စည်းထားပေးပြီး ဖမ်းဆီးရမိသည့် ခိုးဆိုးလုနှိုက်နှင့် စစ်ကောင်စီသတင်းပေးများကို ပြစ်ဒဏ်ချမှတ်နေကြောင်း စုံစမ်းသိရသည်။

ဒီဇင်ဘာလ ပထမပတ်မှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ပေါ် ရပ်ကွက်တိုင်းတွင် ဒေသခံများ ပါဝင်သည့် လုံခြုံရေးအဖွဲ့များ ဖွဲ့စည်းထားပြီး ဖမ်းဆီးရမိသည့် ခိုးဆိုးလုနှိုက်နှင့် စစ်ကောင်စီသတင်းပေးများကို MNDAA စစ်ရေးကော်မတီက ပြစ်ဒဏ်ချမှတ်နေကြောင်း လားရှိုးဒေသခံများက ပြောသည်။

“လူတွေက ရပ်ကွက်ထဲက လူတွေပဲ ပြန်ဖွဲ့ထားတာ၊ အထက်က လူတွေကို ကျနော်တို့လည်း မမြင်ဖူးဘူး။ အလုပ်လုပ်ကြတာတော့ အရင်ကလိုပဲလေ၊ ဒါပေမယ့် ထိရောက်တယ်။ သူခိုးဘိန်းစား ဖမ်းဆို အကုန် တကယ်ဖမ်းတယ်၊ တကယ် အရေးယူတယ်။ လောလောဆယ်ပဲ အဆင်ပြေနေတာလား၊ နောက်ဆို တူတူဖြစ်လာမလား အတိအကျ မပြောရဲဘူး”ဟု အသက် (၄၀) ကျော် အရွယ်ရှိ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောဆိုသည်။

လားရှိုးမြို့ပေါ် ရပ်ကွက်များတွင် MNDAA မှ ဖွဲ့စည်းပေးထားသည့် လုံခြုံရေးအဖွဲ့များမှ သူခိုးဓားပြ ပပျောက်ရေးနှင့် ပြည်သူလုံခြုံရေးအတွက် နေ့ညမပြတ် ကင်းလှည့်ပေးနေကြောင်း ဒေသခံများထံမှ သိရသည်။

ရပ်ကွက်အတွင်း ဖမ်းဆီးရမိသည့် ခိုးဆိုးလုနှိုက်နှင့် စစ်ကောင်စီသတင်းပေးများကို MNDAA စစ်ရေးကော်မတီသို့ လွှဲပြောင်းပေးပြီး ၎င်းတို့မှ စစ်ဆေးကာ ပြစ်ဒဏ်ချမှတ်ကြောင်း လားရှိုးမြို့ ရပ်ကွက်လုံခြုံရေးအဖွဲ့မှ တာဝန်ရှိသူတစ်ဦးက သျှမ်းသံတော်ဆင့်ကို ဖြေကြားသည်။

“ခိုးဆိုးလုနှိုက်နဲ့ စစ်ကောင်စီသတင်းပေး ဘာညာဆိုရင် စစ်ဦးစီးချုပ်နဲ့ သတင်းပေးပြီးမှ ထိုက်သင့်တဲ့ ပြစ်ဒဏ်ကို ချပေးတာတော့ ရှိတယ်ဗျ။ စစ်ကောင်စီ သတင်းပေး မှန် မမှန်ကတော့ လုံခြုံရေးနဲ့ ရဲ ပူးပေါင်းပြီးတော့ ဖမ်းဆီးရမိတယ်ဆိုရင် စစ်ရေးကော်မတီကို လွှဲပြောင်းပေးမှုတွေ ရှိတယ်၊ စိစစ်တဲ့ အပိုင်းကတော့ သူတို့အပိုင်း ဖြစ်သွားတာပေါ့”ဟု လားရှိုးမြို့ ရပ်ကွက်လုံခြုံရေးအဖွဲ့မှ တာဝန်ရှိသူတစ်ဦးက ပြောသည်။

လက်ရှိတွင် လားရှိုးမြို့ပေါ် ဖုန်းနှင့် အင်တာနက်လိုင်းများ ပြန်လည်ရရှိနေပြီး ယခင်က အသုံးပြုခဲ့သည့် Starlink စတားလင့် ဝိုင်ဖိုင်များကို လုံခြုံရေးအဖွဲ့များမှ သိမ်းယူသွားခဲ့ကြောင်း သိရသည်။

ထို့အပြင် နိုဝင်ဘာလမှ စတင်ပြီး လားရှိုးမြို့ပေါ် ရပ်ကွက်အတွင်းရှိ နေအိမ်များတွင် လူဦးရေစာရင်းကို ကိုးကန့်တပ်ဖွဲ့မှ ကောက်ယူခဲ့ပြီး လတ်တလောတွင် ကားနှင့် ဆိုင်ကယ်စာရင်းများကို ထပ်မံကောက်ခံနေရာ အခွန်ကောက်ခံမည်ကို စိုးရိမ်နေကြောင်း ဒေသခံများက ပြောသည်။

“လူစာရင်းလည်း ဟိုတလောက ကောက်ပြီးသွားပြီ။ အခု ဆိုင်ကယ်၊ ကားစာရင်းတွေ လိုက်ကောက်‌နေတယ်၊ အခွန်တွေ လာတော့မယ် ထင်တယ်။ ကားဆိုရင် အင်ဂျင်နံပါတ်၊ ဘောင်နံပါတ် အဲ့တာတွေရော တောင်းတာ။ မြို့ပြင်ထွက်ရင် တန့်ယန်းလမ်းခွဲနားမှာ လမ်းတံတားကြေး ၁၀၀၀ ဆောင်ရတယ်”ဟု လားရှိုးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လားရှိုးမြို့ကို MNDAA က သိမ်းပိုက်ထားသည်မှာ လေးလကျော် ကြာမြင့်လာပြီးနောက် ဒေသခံအချို့သည် လေကြောင်းအန္တရာယ် စိုးရိမ်မှုအကြား နေရပ်ပြန်ကာ စီးပွားရေး ပြန်လည်ပတ်နိုင်ရန် လုပ်ဆောင်နေပြီး လားရှိုးရေပူစမ်းကိုလည်း ဒီဇင်ဘာလ ပထမပတ်အတွင်း ပြန်လည်ဖွင့်လှစ်နေကြောင်း ဒေသခံများထံမှ သိရသည်။

တရုတ်နိုင်ငံတွင် ဆေးကုသမှုခံယူနေသည့် MNDAA ခေါင်းဆောင် ဖုန်တာရွှင်ကို တရုတ်နိုင်ငံက အကျယ်ချုပ် ဖမ်းဆီးထားကြောင်း သတင်းထွက်ပေါ်ပြီးနောက် အရှေ့မြောက်တိုင်း စစ်ဌာနချုပ် အခြေစိုက်ရာ လားရှိုးမြို့အထိ သိမ်းပိုက်ထားနိုင်သည့် ကိုးကန့်တပ်ဖွဲ့သည့် ပြည်တွင်းစစ်ရေး ပဋိပက္ခကို နိုင်ငံရေးနည်းလမ်းဖြင့် ဖြေရှင်းလိုကြောင်း ဒီဇင်ဘာလ (၃) ရက်တွင် ထပ်မံထုတ်ပြန်ထားသည်။