ကချင်ပြည် ဗန်းမော်မြို့အတွင်း တိုက်ပွဲများပြင်းထန်နေပြီး ပြည်သူများ ထောင်နှင့်ချီ ထွက်ပြေး တိမ်းရှောင် နေကြရကာ မြို့အတွင်း၌ ပိတ်မိသူများလည်းရှိနေကြောင်း စုံစမ်းသိရသည်။

ကချင်ပြည် ဗန်းမော်မြို့တွင် ပြီးခဲ့သည့် ဒီဇင်ဘာလ ၄ ရက်နေ့ မှစတင်၍ စစ်ကောင်စီတပ် နဲ့ ကချင် လွတ်မြောက်ရေး တပ်မတော် (KIA) ပူးပေါင်းတပ်တို့ တိုက်ပွဲများပြင်းထန်ခဲ့ပြီး စစ်ကောင်စီ မှ နေ့စဉ် လေကြောင်းဗုံးကြဲတိုက်ခိုက်မှုများပြုလုပ်နေကြောင်း စစ်ရေးနှင့်နီးစပ်သူတစ်ဦးက သျှမ်းသံတော်ဆင့် ကို ပြောသည်။

“စစ်ကောင်စီက အဲ့နေ့ (ဒီဇင်ဘာ၄)ရက်မှစပြီး ဒီကနေ့ထိ နေ့တိုင်းရက်ဆက် လေကြောင်းနဲ့ကို ဗုံးကြဲတိုက်ခိုက်ပါတယ်။ မနေ့ညက ပြင်းအား ဗုံးနဲ့ နှစ်ကြိမ် ကြဲတဲ့ဗျ။ အသံနဲ့တုန်ခါမှု့က နယ်စပ် လွယ်ဂျယ် မိုက်ဂျာယန်ဘက်ထိ ခံစားကြရတယ်။”ဟု စစ်ရေးနှင့် နီးစပ်သူ တစ်ဦးက ပြောသည်။

စစ်ကောင်စီတပ် နှင့် ကချင်လွတ်မြောက်ရေးတပ် (KIA) ပူးပေါင်းတပ်တို့ ဗန်းမော်မြို့အတွင်း တိုက်ပွဲစတင် ဖြစ်ပွားခဲ့သည့် ဒီဇင်ဘာလ ၄ ရက်နေ့မှစပြီး ဒေသခံများ ထောင်နှင့်ချီ အိုးအိမ်စွန့်ခွာ၍ ထွက်ပြေးတိမ်းရှောင်ခဲ့ပြီး မြို့အတွင်းပိတ်မိနေသည့် သူများလည်း ကျန်ရှိနေကြောင်း စစ်ရေးနှင့်နီးစပ်သူတစ်ဦးက ဆက်ဆိုသည်။

“မြို့ထဲမှာတော့ ပိတ်နေတာတွေ ကျန်နေသေးတယ်။ သက်ကြီးပိုင်းတွေက ပိုများပါတယ်။အချို့က ပိတ်မိနေတာမျိုးတွေ ကြောက်လို့ ပိတ်မိနေတာ ငွေကြေးခက်ခဲတွေ‌ကြောင့် ပိတ်မိနေတာ အမျိုးမျိုး ကြောင့်ပေါ့။ရဲဘော်တွေကတော့ ပြည်သူတွေ့ရင် လုံခြုံစွာနေဖို့ လေယာဥ်သံကြားရင် ခိုင်ခန့်တဲ့ အကာ အကွယ်မှာနေဖို့ ပြောပြပေးပါတယ်”ဟု ၎င်းက ပြောသည်။

ထိုဗန်းမော်မြို့ ဒေသခံအများစုသည် ‌ရွှေကူ၊မန္တလေးမြို့ နှင့် နီးစပ်ရာဆွေမျိုးများဆီသို့ ထွက်ပြေးတိမ်းရှောင် နေကြပြီး၊ စစ်ကောင်စီ၏ လက်နက်ကြီး၊ လေကြောင်းတိုက်ခိုက်မှုများကြောင့် ထိခိုက်သေဆုံးသော သူများလည်းရှိနေကြောင်း ဒေသခံများကပြောသည်။

ပြီးခဲ့သည့် ဒီဇင်ဘာ ၄ရက်က စတင်ခဲ့သည့်တိုက်ပွဲအတွင်း KIAက စစ်ကောင်စီ၏ စခန်း ခုနစ် ခုထက်မနည်းကို သိမ်းယူထားခဲ့ပြီး၊ ကွန်ပျူတာ တက္ကသိုလ်အနီးရှိ တပ်စခန်း၊ ထွေအုပ်ရုံး၊ရဲစခန်း ကာကင်းစခန်းတစ်ချို့ တို့ကို တိုက်ခိုက်သိမ်းယူခဲ့ကြောင်း သိရသည်။

ဗန်းမော်မြို့နယ်နှင့် မံစီမြို့နယ်တို့တွင် KIA နှင့် စစ်ကောင်စီတပ်တို့ တိုက်ပွဲပြင်းထန်နေချိန်
တစ်ဖက် တွင်လည်း တရုတ်အစိုးရက KIO တို့နှင့် တွေ့ဆုံရန် ဖိတ်ခေါ်ခြင်းကြောင့် ဒီဇင်ဘာ ၈ ရက် နေ့တွင် ကချင်လွတ်လပ်ရေးအစိုးရအဖွဲ့ (KIO ) ဥက္ကဌ ဗိုလ်ချူပ်ကြီးအင်ဘန်လ ဦးဆောင် သောအဖွဲ့ သည် တရုတ်နိုင်ငံကိုထွက်ခွာသွားကြောင်း သိရသည်။

ကချင်ပြည်နယ်အတွင်းရှိ တရုတ် – မြန်မာနယ်စပ်တကြော စီပွားရေးဇုံနယ်အားလုံးကို KIO/KIA က ထိန်းချူပ် ထားပြီး လက်ရှိတွင် ဗန်းမော်မြို့နှင့် မံစီမြို့နယ်တို့တွင် စစ်ကောင်စီတပ်နှင့် KIA တို့ကြား တိုက်ပွဲ ပြင်းထန်နေချိန် KIO ကို တရုတ်အစိုးရဘက်မှ တွေ့ဆုံရန် ဖိတ်ခေါ်လိုက်ရကြောင်းသိရသည်။

ဗန်းမော်တွင် စစ်ကောင်စီ၏ အမှတ်(၂၁) စစ်ဆင်ရေးကွပ်ကဲမှုဌာနချုပ် (စကခ-၂၁) ဌာနချုပ်အပါအဝင် စစ်ဖက်ရေးရာလုံခြုံရေးတပ်စု၊ ခလရ ၄၇၊ ခလရ၂၃၆၊ ခလရ ၂၃၇၊ ထပခ ၉၃၃ ထောက်ပံ့ပို့ဆောင် ရေးတပ်၊အမှတ် (၁၁) စစ်မြေပြင်ဆေးတပ်ရင်း၊ ဆက်သွယ်ရေးတပ်၊ အမတ (၃၁၄) အမြောက်တပ်၊ အမှတ် (၃၆၆)အမြောက်တပ်၊ အမှတ် (၅၀၁၄)တင့်ကားတပ်ရင်း၊ အမှတ် (၇၀၀၆) သံချပ်ကာတပ်ရင်း၊ အမှတ် (၉၁၄)စစ်အင်ဂျင်နီယာတပ်၊ အမှတ် (၉၄၄)ဆောက်လုပ်ရေးအင်ဂျင်နီယာတပ်ခွဲ၊ တပ်မ (၈၈)လက်အောက်ခံ တပ်ရင်း သုံးခုတို့ရှိကြောင်း သိရသည်။