သျှမ်းပြည် လားရှိုးနှင့် နမ္မတူမြို့အကြားရှိ အီနိုင်းတံတားကို ညီနောင်မဟာမိတ်တပ်များက ပြန်လည်ပြုပြင်ပြီးသော်လည်း ယာဉ်ကြီးများ ဖြတ်သန်းခွင့် မရသေးဘဲ ဖောင်ဆိပ်တွင် ဖြတ်သန်းခ ဈေးအဆမတန် ပေးဆောင်နေရကြောင်း စုံစမ်းသိရသည်။
ယမန်နေ့ (ဒီဇင်ဘာလ ၉ ရက်) နံနက်ပိုင်းမှ စတင်၍ လားရှိုး-နမ္မတူ လမ်းမကြီးပေါ်ရှိ အီနိုင်းတံတားကို ညီနောင်မဟာမိတ်တပ်များက ပြန်လည်ပြုပြင်ပေးပြီးနောက် နမ္မတူမြို့နှင့် မန်စံကျေးရွာအုပ်စုများဘက်မှ ယာဉ်ငယ်နှင့် ခရီးသည်များ တံတားဖြတ်ကူးနိုင်သော်လည်း ယာဉ်ကြီးများ ဖြတ်သန်းခွင့် မရသေးဘဲ ဖောင်ဆိပ်တွင် ဈေးအဆမတန် ပေးဆောင်နေရကြောင်း ခရီးသွားများက ပြောသည်။
“နမ္မတူနဲ့ မန်စံဘက်ကတော့ လားရှိုး လာလို့ရတယ်။ အသွားအလာကတော့ အရင်လို မဟုတ်တော့ဘူးပေါ့၊ လူကြဲပြီး ကားနည်းတယ်။ ယာဉ်ငယ်ကတော့ တံတားဖြတ်လို့ရတယ်။ ကုန်ကားဆိုရင် ဖောင်ဆိပ်က ဖြတ်ရတော့ ကားခ ၁ သိန်းခွဲကနေ ၂ သိန်းအထိ ပေးရတယ်။ တံတားကိုတော့ ကွန်ကရစ်လောင်းပြီး ပြန်ဆက်ထားတာ”ဟု လားရှိုး-မူဆယ် ကားသမားတစ်ဦးက သျှမ်းသံတော်ဆင့်ကို ပြောသည်။
အီနိုင်းတံတားကို ညီနောင်မဟာမိတ်တပ်များက နိုဝင်ဘာလကုန်ပိုင်းမှ စတင်ကာ ပြန်လည်ပြင်ဆင်ပေးခဲ့ပြီး ၎င်းကာလအတွင်း ဖောင်ဆိပ်တွင် ယာဉ်တစ်စီးလျှင် ကျပ်ငွေ တစ်သိန်းခွဲမှ နှစ်သိန်းအထိ၊ ဆိုင်ကယ်တစ်စီးလျှင် ၃ ထောင်ကျပ်နှင့် ခရီးသည်တစ်ဦးလျှင် တစ်ထောင်ကျပ် အသီးသီး ပေးဆောင်ရကြောင်း ခရီးသွားများထံမှ သိရသည်။
“လကုန်တုန်းကတည်းက ကိုးကန့်တပ်နေမှာ ပြန်လာလုပ်ပေးတာ။ အသွားအလာကြဲတော့ လမ်းဟောင်းလို ပြန်ဖြစ်နေတယ်။ အခုက အီနိုင်းတံတား ပြင်တယ်ဆိုပေမယ့် နမ္မတူမရောက်ခင် နားကွမ်းတံတားလည်း ကျန်သေးတယ်၊ အဲ့တာလည်း ကျိုးထားတာ မပြင်ရသေးဘူး။ လားရှိုးမြို့ရှောင်လမ်းကတော့ ပေးမဖြတ်သေးဘူး”ဟု ၎င်းကားသမားက ဆက်ပြောသည်။
ယခု ပြန်လည်ပြင်ဆင်ထားသည့် အီနိုင်းတံတားသည် ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့နှင့် (၇) မိုင်ခန့်သာ ကွာဝေးပြီး ယမန်နှစ်ကုန်ပိုင်းတွင် လားရှိုးမြို့သို့ ညီနောင်မဟာမိတ်တပ်များကို တားဆီးနိုင်ရန် စစ်ကောင်စီတပ်က ဗုံးဖောက်ခွဲဖျက်ဆီးခဲ့ရာ ထက်ပိုင်းကျိုးကျသွားခဲ့ပြီး သွားလာ၍ မရတော့ကြောင်း သိရသည်။
အလားတူ တအာင်း(ပလောင်) အမျိုးသားလွတ်မြောက်ရေးတပ်မတော် TNLA သိမ်းပိုက်ထားသည့် သီပေါမြို့နှင့် နမ္မတူအကြားရှိ မိုးတေတံတားကိုလည်း လတ်တလော ပြန်လည်ပြင်ဆင်ထားပြီး မကြာမီ အသုံးပြုနိုင်မည်ဖြစ်ကြောင်း ဒေသခံများထံမှ သိရသည်။
ပုံစာ (၁) – ယမန်နှစ်ကုန်ပိုင်းတွင် ဗုံးခွဲဖျက်ဆီးခံခဲ့ရသည့် အီနိုင်းတံတား
ပုံစာ (၂၊ ၃၊ ၄) – အီနိုင်းတံတား ပြုပြင်နေစဉ် ယာဉ်နှင့် ခရီးသည်များ ဖောင်ဖြင့် ချောင်းကူးနေစဉ်
Leave a Comments