သျှမ်းပြည်မြောက်ပိုင်း၊ ရပ်စောက်မြို့နယ် ကျောက်ဂူဒေသတွင် စစ်ကောင်စီက ဓာတုအဆိပ်ငွေ့ ဗုံးအသုံးပြုတိုက်ခိုက်တာကြောင့် ဓနုပြည်သူ့လွတ်မြောက်ရေးတပ်တော် (DPLA) တပ်သားများ အဆိပ်သင့်ခဲ့သည်ဟု DPLF ထံမှ သိရသည်။

စစ်ကောင်စီတပ်နှင့် DPLAတို့ တိုက်ပွဲဖြစ်ပွားနေသောကြောင့် အနီးနားရှိကျေးရွာများwGif စစ်ဘေးတိမ်းရှောင်နေကြရပြီး ထိခိုက်ပျက်စီးမှုများလည်း ရှိကြောင်း DPLF ၏ သတင်းနှင့် ပြန်ကြားရေးဌာနမှ ပြောသည်။

ထို့အပြင် ဒီဇင်ဘာလ (၇)ရက်နေ့ညနေ (၄)နာရီအချိန်တွင် စစ်တပ်မှ ဓာတုအဆိပ်ငွေဗုံးတိုက်ခိုက်မှုကြောင့် DPLA တပ်သား(၇) ယောက်မျှ ဓာတု အဆိပ်သင့်ပြီး မူးဝေအော့အန်ခြင်းများ ရှိခဲ့သည်။

“စစ်တပ်က ဓာတုဗုံးကြောင့် ကျနောတို့ တပ်သား (၇) ယောက်လောက် အဆိပ်သင့်ပြီး မူးကုန်တယ်။ပြီးရင် အန်တာမျိုးတွေ ကြုံရတယ်။ တိုက်ပွဲ ဖြစ်ပွားတဲ့ ရွာအနီးနားကတော့ စစ်ရှောင်ရတာမျိုးရှိတယ်။ နေအိမ်ပျက်စီးမှုလည်း ရှိတယ်။ ထိခိုက်သေဆုံးတာက မသိရှိရသေးဘူး။” ဟု DPLF ၏သတင်းနှင့် ပြန်ကြားရေးဌာနမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

ကျောက်ဂူဒေသတွင် စစ်ကောင်စီနယ်မြေခံ တပ်များဖြစ်သည့် ကျောက်ဂူ အမြောက်တပ်(အမတ ၃၄၉) ၊နောင်ဝိုးတပ် ခြေလျင်တပ်ရင်း (ခလရ ၂၉) နှင့် နောင်ချိုမြို့နယ် တောင်ခမ်းသို့ ရပ်စောက်ဘက်မှ စစ်ကူလာသည့် စစ်ကောင်စီတပ်များနှင့် ထိတွေ့တိုက်ပွဲ ဖြစ်ပွားနေသည်ဟု အဆိုပါ ထုတ်ပြန်ချက်တွင် ဖော်ပြထားသည်။

အလုပ်သင် သတင်းထောက် နန်းလရောင် ရေးသားသည်။