သျှမ်းပြည်မြို့တော် တောင်ကြီးမြို့နှင့် မြို့နယ်အများအပြားတွင် လျှပ်စစ်မီးပြတ်တောက်မှု လွန်စွာဆိုးရွားလာနေပြီး ပြည်သူအများအပြား ဒုက္ခမျိုးစုံကြုံတွေ့နေရကြောင်းစုံစမ်းသိရှိရသည်။
ပြီးခဲ့သည့် နိုဝင်ဘာလမှ စတင်ပြီး ယခု ဒီဇင်ဘာလ ပထမပတ်ထိ တောင်ကြီးမြို့နှင့် အနီးတဝိုက်မြို့များတွင် လျှပ်စစ်မီးပြတ်တောက်မှု ယခင်ကထက် ပိုဆိုးဝါးလာသည်။
အချို့ရပ်ကွက်များတွင် တရက်လျှင် ၂ နာရီခန့်သာ လျှပ်စစ်မီးရရှိသောကြောင့် လျှပ်စစ်သုံးပြီး အလုပ်လုပ်ရသည့် လုပ်ငန်းများ အခက်ကြုံနေရကြောင်း တောင်ကြီးမြို့ စဝ်စံထွန်းရပ်ကွက်တွင် နေထိုင်သည့် အမျိုးသမီးတစ်ဦးက သျှမ်းသံတော်ဆင့်သို့ပြောသည်။
“မီးကတော့ ခုဒီလထဲတော်တော်ပျက်တယ်၊ အရင်လတွေက ၄ နာရီခြားတစ်ခါပြန်လာသေးတယ်၊ ခုဆိုမနက်တည်းကပြတ်သွားတာ ညမိုးချုပ်မှ ပြန်လာပါတယ်၊ ညအိပ်ချိန်လည်းပြတ်တယ်၊ EPC ကိုမေးရင်လည်း ဘယ်ချိန်ပြန်လာမလဲ သူတို့လည်း မပြောတတ်ဘူးတဲ့” ဟု ၎င်းအမျိုးသမီးကပြောသည်။
မီးများပျက်နေသော်လည်း မီတာခများမှာ ယခင်ကထက်မြင့်တက်လာပြီး ထိုသို့ လျှပ်စစ်မီး ပြတ်တောက်မှုကြောင့် အသေးစားနှင့် အလတ်စား တနိုင်တပိုင်စီးပွားရေးလုပ်ငန်းများထိခိုက်ရုံသာမက အခြေခံ လက်လုပ်လက်စား လူတန်းများအတွက်လည်း ငွေကြေးကြပ်တည်းနေသည့် အခြေအနေဖြစ်လာကြောင်း အမျိုးသမီးက ဆက်ပြောသည်။
“မီးသာပျက်တာပါ၊ မီတာခကဈေးတွေတက် အရင်ကထက် ၂ ဆလောက်ပိုများပါတယ်၊ မီးပျက်တော့ ထမင်းချိုင့်နဲ့ အလုပ်သွားရသူတွေအတွက်က တော်တော်လေး အခက်အခဲဖြစ်သွားတယ်” ဟု ၎င်းအမျိုးသမီးက ဆက်ပြောသည်။
လျှပ်စစ်မီးပြတ်တောက်ခြင်း အပြင် မီးလာသည့်အချိန်တွင်လည်း မီးအားမနိုင်ခြင်း မီးပြန်ပျက်မည့် အချိန်အတိအကျ မသိရခြင်းတို့ကြောင့် ရေတင်စက်၊ ထမင်းပေါင်းအိုးများ ပျက်စီးမည်ကိုစိုးရိမ်နေရသောကြောင့် မီးလာသည့်အချိန်တွင် အချိန်သီးသန့်ပေး၍ စောင့်ကြည့်နေရကြောင်း ညောင်ရွှေမြို့တွင် နေထိုင်သည့် ဒေသခံအမျိုးသမီးတစ်ဦးကပြောသည်။
ထို့အပြင် တောင်ကြီး-ဆိုက်ခေါင်လမ်းမပေါ်ရှိ ညို့မီးကျေးရွာတွင်လည်း လျှပ်စစ်မီးပြတ်တောက်နေသည်မှာ ၃ ရက်ခန့် ရှိသွားပြီ ဖြစ်ကြောင်း ဒေသခံများထံမှ သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments