သျှမ်းပြည်မြောက်ပိုင်း ကျောက်မဲမြို့ပေါ် တွင် ပြီးခဲ့သည့် သျှမ်းနှစ်သစ်ကူးအကြိုနေ့တွင် စစ်ကောင်စီမှ လေကြောင်းဗုံးကြဲတိုက်ခိုက်သဖြင့် အရပ်သား ၁၁ဉီး သေဆုံးခဲ့ကြောင်း စုံစမ်းသိရသည်။

နိုဝင် ၃၀ရက် ညနေ ၆နာရီခွဲ သျှမ်းနှစ်သစ်ကူးအကြိုနေ့တွင် တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) ထိန်းချုပ်သည့် ကျောက်မဲမြို့ပေါ်ကို စစ်ကောင်စီလေကြောင်းဗုံးကြဲတိုက်ခိုက်ခဲ့ရာ အရပ်သား ၉ဦး ပွဲချင်းပြီး သေဆုံးခဲ့ပြီး၊ ယနေ့ (ဒီဇင်ဘာ ၄)ရက်တွင် အမျိုးသမီး ၂ဦးထပ်မံသေဆုံးခဲ့ရာ စုစုပေါင်း ၁၁ဦးသေဆုံခဲ့သည်။

“ဒီနေ့ကျောက်မဲဆေးရုံမှာ ဆေးကုသနေတဲ့ အမျိုးသမီး ၂ ယောက်လည်း ထပ်ဆုံးသွားတယ်။ အဓိက ဒဏ်ရာတွေပြင်းထန်တာ၊ ဆေးရုံမှာ ဆေးဝါးမလုံလောက်တာတွေကြောင့်လည်းပါတယ်။ စုစုပေါင်း ၁၁ဦးရှိသွားပြီ” ဟု နမ့်ခုံးလူမှုကူညီရေးအသင်းမှ တာဝန်ခံတစ်ဦးက ပြောသည်။

ကျောက်မဲမြို့ ဗုံးကြဲသည့်ရက်တွင် ဦးဇင်း ၁ ပါး၊ သီလရှင် ၁ ပါးနှင့် အမျိုးသမီး ၃ ဦး၊ အမျိုးသား ၄ ဦး စုစုပေါင်း ၉ ဦးသေဆုံးသွားခဲ့သည်ဟု ထိုအလောင်းများသွားရောက်သယ်ယူခဲ့သည့် လူမှုကူညီရေးအသင်းမှ သိရသည်။

သေဆုံးသူ ၉ ဦးအနက် နမ့်ခုံးလူမှုကူညီရေးအသင်း အဖွဲ့ဝင် (လင်မယား) ၂ ဦးလည်းပါဝင်ကြောင်း နမ့်ခမ်းလူမှုကူညီရေးအသင်း တာဝန်ခံတစ်ဦးက ပြောသည်။

ပြင်းထန်သည့် ဗုံးပေါက်ကွဲမှုကြောင့် ထိတ်လန့်ပြီး သေဆုံးသူရှိသလို၊ ခန္ဓာကိုယ် တစစီ ဖြစ်သွားပြီး ကောက်ယူ၍ မရသည့် အလောင်းများလည်းရှိကြောင်း ၎င်းက ဆိုသည်။

လက်ရှိ ကျောက်မဲမြို့တွင် လေကြောင်းပျံသန်းမှု ငြိမ်သက်သွားသော်လည်း မြို့အတွင်း လူသူသွားလာမှု နည်းပါးသွားကြောင်း ကျောက်မဲမြို့ဒေသခံ အမျိုးသားတစ်ဦးက ပြောသည်။

“အခုတော့ ပြန်ငြိမ်ပေမဲ့ အသွားအလာကြဲသွားတယ်။ ဖုန်းလိုင်းလည်းမရဘူး။ လျှပ်စစ်မီးတွေလည်း ပြတ်နေတယ်” ဟု ၎င်းအမျိုးသားကပြောသည်။

ထိုအခြေအနေသို့ မတိုင်ခင် တအာင်း (ပလောင်) အမျိုးသားလွတ်မြောက်ရေး တပ်မတော် TNLA သည် ပြည်သူများ၏ အကျိုးကို ငဲ့ညာထောက်ထား၍ သော်လည်းကောင်း၊ နယ်စပ်တည်ငြိမ်ရေးနှင့် တိုက်ပွဲရပ်စဲရေးအတွက် ကြားဝင်ကြိုးပမ်းဆောင်ရွက်နေသည့် တရုတ်နိုင်ငံအစိုး၏ ကြိုးပမ်းမှုကို လေးစားအသိတ်မှတ်ပြု၍ သော်လည်းကောင်း စစ်ကောင်စီနှင့် တွေ့ဆုံဆွေးနွေးရန် အဆင်သင့်ရှိကြောင်း နိုဝင်ဘာလ ၂၅ ရက်နေ့က ထုတ်ပြန်သည်။

သို့သော်လည်း စစ်ကောင်စီက ဆွေးနွေးပွဲအတွက် တုံ့ပြန်ခြင်းမရှိဘဲ လေကြောင်းတိုက်ခိုက်မှုများ ဆက်တိုက်ပြုလုပ်နေသည်။

TNLA ထိန်းချုပ်ထားသည့် သျှမ်းပြည်မြောက်ပိုင်း နောင်ချို၊ ကျောက်မဲ၊ မိုင်းငေါ့၊ ကွတ်ခိုင်နှင့် မိုးကုတ်မြို့တွင် စစ်ကောင်စီ၏ လေကြောင်းတိုက်ခိုက်မှုကြောင့် နိုဝင်ဘာလ ၁ လအတွင်း အရပ်သား ဒေသခံ ၃၈ ဦးသေဆုံးပြီး ၇၀ ဦး ဒဏ်ရာရရှိကာ၊ နေအိမ် ၁၃၀ ကျော် ပျက်စီးခဲ့ကြောင်း TNLA က ဒီဇင်ဘာလ ၂ ရက်နေ့တွင် ထုတ်ပြန်သည်။