စစ်တပ်အာဏာသိမ်းပြီးနောက် လှုမှုကွန်ရက်ပေါ်မှာ စစ်ကောင်စီကို ရေးသားဝေဖန်မှုကြောင့် ယခုနှစ် ၂၀၂၄ခုနစ် အတွင်း လူ ၃၅၀ ကျော် ဖမ်းဆီးခံရကြောင်း Data For Myanmar က ယနေ့ (ဒီဇင်ဘာ ၃ )ရက်တွင် ဖော်ပြသည်။

ထိုဖမ်းဆီးခံရသူ အများစုသည် Facebook အပြင် အခြားအွန်လိုင်းပလက်ဖောင်းများဖြစ်သည့် TikTok, Telegram နှင့် Viber မှတစ်ဆင့် စစ်ကောင်စီကို ရေးသားဝေဖန်မှုကြောင့် ဖမ်းဆီးခံရခြင်းဖြစ်ကြောင်း အစီရင်ခံစာတွင် ဖော်ပြသည်။

ထို့အပြင် လူထုလှုပ်ရှားမှုများနှင့် တော်လှန်ရေး အဖွဲ့အစည်းများကို ထောက်ခံအားပေးသည့် ရေးသားမှုများ၊ ပြောဆိုဆက်သွယ်မှုများကြောင့် ဖမ်းဆီးခံရသူများလည်း ပါဝင်သည်ဟု ဆိုသည်။

အွန်လိုင်းပေါ်မှ ရေးသားပြောဆိုမှုများကို စစ်ကောင်စီဘက်က စောင့်ကြည့်ပြီး အရေးယူမှုတွေရှိသလို မြေပြင်က လုံခြုံရေး စစ်ဆေးရေးဂိတ်တွေမှာ ဖုန်းတွေကို စစ်ဆေးပြီး ဖမ်းဆီးအရေးမှုတွေယူလည်း ရှိသည်ဟု Data For Myanmar ဖော်ပြသည်။

စစ်ကောင်စီထောက်ခံသည့် တယ်လီဂရမ်ချန်နယ်များကလည်း အွန်လိုင်းပေါ်က ပြောဆိုရေးသားမှုတွေကို စောင့်ကြည့်ပြီး ဖမ်းဆီးအရေးယူနိုင်အောင် ကိုယ်ရေးအချက်အလက်တွေ စုဆောင်းပေးပို့မှုများ၊ ဖိအားပေးတိုက်တွန်းမှုများ လုပ်ဆောင်နေသည်ဟု ဆိုသည်။

၂၀၂၂ ခုနှစ် ဖေဖော်ဝါရီလ ၁ ရက်နေ့မှ ၂၀၂၄ ခုနှစ် အောက်တိုဘာလ ၃၁ ရက်နေ့အထိ လူမှုကွန်ရက်ပေါ်မှာ စစ်ကောင်စီကို ရေးသားဝေဖန်မှုကြောင့် စုစုပေါင်း ဖမ်းဆီးခံရသူ ၁၈၄၀ ဦးအထိရှိကြောင်း Data For Myanmar က ဖော်ပြသည်။

အာဏာသိမ်းပြီးနောက် လူမှုကွန်ရက်ပေါ်မှာ ဝေဖန်ရေးသားမှုများကြောင့် ဖမ်းဆီးခံရသူအရေအတွက်၏ ၃၆ ရာခိုင်နှုန်းမှာ အမျိုးသမီးများဖြစ်ကြောင်းဆိုထားသည်။

ဖမ်းဆီးခံရသူတွေထဲမှ အများစုမှာ ရန်ကုန်တိုင်းနှင့် မန္တလေးတိုင်းက အွန်လိုင်းအသုံးပြုသူတွေဖြစ်ပြီး စုစုပေါင်း ၈၉၆ ဦး ရှိပြီး ထိုထဲတွင် နာမည်ကြီး အနုပညာရှင်များ၊ သရုပ်ဆောင်များနှင့် သတင်းသမားများလည်း ပါဝင်ခဲ့ကြောင်း အစီရင်ခံစာ၌ ဖော်ပြထားသည်။

လှုမှုကွန်ယက်မှ လှုံ့ဆော်ခြင်း၊ ဝါဒဖြန့်ခြင်း၊ ခြိမ်းခြောက်ခြင်းများ ပြုလုပ်ပါက အကြမ်းဖက်မှု တိုက်ဖျက်ရေး ဥပဒေပုဒ်မ ၅၂ (က)၊ ရာဇသတ်ကြီးပုဒ်မ ၁၂၄-က နှင့် ပုဒ်မ ၅၀၅-က၊ အီလတ်ထရောနစ် ဆက်သွယ်ရေး ဥပဒေပုဒ်မ ၃၃ (က) နှင့် တည်ဆဲဥပဒေတွေနှင့် အရေးယူခံရမည်ဟု စစ်ကောင်စီက ၂၀၂၂ ဇန်နဝါရီလ ၂၅ ရက်က ကြေညာခဲ့သည်။