သျှမ်းပြည်တောင်ပိုင်း ဆီဆိုင်မြို့နယ် နောင်ရင်းကျေးရွာတွင် စစ်ကောင်စီလက်အောက်ခံနှင့် ပအိုဝ်းပြည်သူစစ် PNO က ဒရုန်းဖြင့် ဗုံးကြဲတိုက်ခိုက်ခဲ့ရာ ကလေးငယ်နှင့် မိခင် သေဆုံးပြီး ၊ ဖခင်ဖြစ်သူက ပြင်းထန် ဒဏ်ရာ ရရှိနေကြောင်း စုံစမ်းသိရသည်။

ယမန်နေ့ (ဒီဇင်ဘာလ ၂ ရက်)နေ့ နံနက်ပိုင်း ၁၀ နာရီဝန်းကျင်တွင် နောင်ရင်းကျေးရွာတွင်နေထိုင်သည့် မိသားစု ၃ဦးသည့် ပြောင်းခြံသို့ ပြောင်းချိုးနေစဉ် စစ်ကောင်စီလက်အောက်ခံနှင့် ပအိုဝ်းပြည်သူစစ် PNO က ဒရုန်းဖြင့် ဗုံးကြဲတိုက်ခိုက်ခဲ့သည်။

ထို့နောက် အသက် ၂ နှစ်အရွယ်ရှိ ကလေးငယ်နှင့် မိခင်ဖြစ်သူ ၎င်းနေရာတွင် ပွဲချင်း သေဆုံးပြီး ဖခင်ဖြစ်သူသည် ခန္ဓာကိုယ်အနှံတွင် ဗုံးစထိမှန် ဒဏ်ရာ ရရှိကြောင်း PNLA ပြောရေးဆိုခွင့် ရှိသူ ခွန်းရိန်းယံက သျှမ်းသံတော်ဆင့်ကို ပြောသည်။

“မနေ့က မနက်ပိုင်းအချိန် ၁၀နာရီဝန်းကျင်လောက်ပေါ့ ပြောင်းသွားချို့းတဲ့ သားမိသုံးယောက်က ဗုံးထိသွားတယ်။ ကလေးနဲ့ မိခင်တော့ ဆုံးသွားတယ် အဖေဖြစ်သူက ဒဏ်ရာပြင်းထန်တယ်။ စစ်တပ်နဲ့ PNO ပြည်သူစစ်တွေက အနောက်ဘက်ကနေ ဒရုန်းနဲ့ ပစ်တာ။ ခုချိန်ထိ စစ်တပ်နဲ့ PNO တပ်တွေက စစ်ကြောင်းထိုးပြီး ပြည်သူရဲ့နေအိမ် မီးရှို့တယ် သတ်ဖြတ်တဲ့လုပ်ရက်က အင်မတန်ယုတ်မာတဲ့ လုပ်ရက်တွေဖြစ်တယ်”ဟု ၎င်းက ပြောသည်။

ထို့ကျေးရွာအနီးတဝိုက်တွင် ပြောင်းခြံလုပ်ငန်းကိုသာ မှီခိုလုပ်စားနေရသည့် ပြည်သူအများစုသည် စစ်ကောင်စီပူပေါင်းတပ်တို့ ဗုံးကြဲတိုက်ခိုက်ခဲ့တာကြောင့် ပြောင်းဖူးနှင့် မြေပဲ လုပ်ငန်းကို ရပ်ဆိုင်းထား ရသည်ဟု သိရသည်။

စစ်ကောင်စီတပ်နှင့် ပူပေါင်းတပ် PNO ပအိုဝ်းပြည်သူစစ်သည် လွိုင်ကော်မြို့ဘက်ခြမ်းတွင် နေ့စဉ် စစ်အင်အားများ ဖြည့်နေပြီး တိုက်ပွဲအကြီးအကျယ်ဖြစ်လာမည်ကို စိုးရိမ်နေကြောင်း ဒေသခံ အမျိုးသမီးတစ်ဦး က ပြောသည်။

“အခုဆို ဘယ်သူမှတောင် ပြောင်းခြံမသွားရဲတော့ဘူး။ ရွာအနီးမှာနေတဲ့သူဆို ကြောက်ကုန်ပြီ‌လေ သူတို့ ဘယ်ချိန်လာပစ်မှာကို မသိရတော့ ပိုကြောက်ရတယ်။ ဈေးသည်တွေလည်း အဲဘက်ကို မသွားရဲတော့ဘူး။ အခုထိသွားတဲ့ ကလေးအဖေလေ သူ့အကိုလည်း အရင်လက ပြောင်းခြံထဲမှာ မပေါက်ကွဲတဲ့ ဗုံးတွေ့လို့ ကောက်လာတာ အိမ်ရောက်တော့ ပေါက်ကြဲမှုဖြစ်ပြီး သေသွားတယ်လေ ခုလည်း သူတို့မိသားစုကို ထပ်ရှုံးရပြန်တယ်”ဟု ၎င်းက ပြောသည်။

အလားတူ နိုဝင်ဘာလ (၂၀)ရက်မှ (၂၇)ရက်အတွင်း သျှမ်းပြည်တောင်ပိုင်း မောက်မယ်မြို့နယ် ဟိုနမ့် ကျေးရွာဘက်တွင် ပအိုဝ်းအမျိုးသားလွတ်မြောက်ရေး တပ်မတော်(PNLA) တပ်စခန်းကို စစ်ကောင်စီလက်အောက်ခံ PNO ပြည်သူ့စစ်တို့က ဝင်ရောက်တိုက်ခိုက်ခဲ့ကြောင်း ဒေသခံများထံမှ သိရသည်။

လက်ရှိတွင် စစ်ကောင်စီတပ်မှ ဖယ်ခုံ၊ လွိုင်ကော်နှင့် မိုးဗြဲဘက်သို့ စစ်အင်အား အလုံးအရင်းဖြင့် တိုးချဲ့အင်အားဖြည့်တင်းပြီးနောက် ကရင်နီတော်လှန်ရေးတပ်ပေါင်းစုတို့နှင့် တင်မာမှုများရှိနေကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။​