သျှမ်းပြည် တောင်ပိုင်း ဖယ်ခုံမြို့နယ် ပြည်သူအိမ်မောကျချိန် စစ်ကောင်စီတပ်ဖွဲ့သည် လေကြောင်းဖြင့် ဗုံးကြဲများကြဲချ တိုက်ခိုက် ခဲ့ကြောင်း သိရသည်။

ယနေ့ (ဒီဇင်ဘာလ ၃ ရက်) မနက် ၃ နာရီဝန်းကျင်တွင် ဖယ်ခုံမြို့အနောက်ခြမ်း ၊ ဆိုင်ခွန်ကျေးရွာကို စစ်ကောင်စီက လေကြောင်းဖြင့် ကင်းထောက်လေယာဥ် နှင့် ဂျက်ဖိုက်တာ တို့ကို အသုံးပြု၍ ဗုံးများ ကြဲချခဲ့ကြောင်း ဖယ်ခုံမြို့နယ်တွင် စစ်ဘေးရှောင်နေသည့် အမျိုးသမီးတစ်ဦးက သျှမ်းသံတော်ဆင့် ကိုပြောသည်။

“ဒီမနက်မှာပဲ ဗုံးလာကြဲသွားတာ ဟုတ်ပါတယ်။ ကျမ သိရသလောက်တော့ အလုံး ၃၀ နီးပါးရှိတယ်။ ဖယ်ခုံမြို့နယ်ထဲက ကျေးရွာတစ်ရွာပါ။ လောလောဆယ်တော့ ကြဲခံရတဲ့ ရွာက အပြောင်းအ‌ရွှေ့တော့ လုပ်နေကြတယ် ထပ်လာကြဲမှာကို ဒေသခံတွေကလည်း စိုးရိမ်နေရတယ်လေ။”ဟု ၎င်းက ပြောသည်။

ထိုဖယ်ခုံမြို့အနောက်ခြမ်း ဆိုင်ခွန်ကျေးရွာကို ယနေ့ (ဒီဇင်ဘာ ၃) မနက် ၃ နာရီ ၃ မိနစ် မှ ၄၁ မိနစ်အထိ စစ်ကောင်စီက လေကြောင်းဖြင့် ဗုံးအလုံးရေ ၃၀ ကျော် ကြဲချကြောင်း ဒေသခံများက သျှမ်းသံတော်ဆင့်ကိုပြောသည်။

ထိုဗုံးကြဲခံရသည် ဆိုင်ခွန်ကျေးရွာနေ ဒေသခံများ၏ ထိခိုက်သေဆုံးမှု ထိခိုက်ပျက်စီးမှုကို သျှမ်းသံတော်ဆင့်မှ ဆက်လက်စုံစမ်း နေသည်။

အလားတူ ဖယ်ခုံမြို့ အရှေ့ဘက်ခြမ်းကျေးရွာများ တွင်လည်း စစ်ကောင်စီ၏ လက်နက်ကြီး ပစ်ခတ်မှု နှင့် လေကြောင်းတိုက်ခိုက်မှုကို ဒေသခံများ စိုးရိမ်းနေရကြောင်းဒေသခံများက ပြောသည်။

လက်ရှိတွင် စစ်ကောင်စီတပ်မှ ဖယ်ခုံ၊ လွိုင်ကော်နှင့် မိုးဗြဲဘက်သို့ စစ်အင်အား အလုံးအရင်းဖြင့် တိုးချဲ့အင်အားဖြည့်တင်းပြီးနောက် ကရင်နီတော်လှန်ရေးတပ်ပေါင်းစုတို့နှင့် တင်မာမှုများရှိနေကြောင်း သိရသည်။