သျှမ်းပြည်တောင်ပိုင်း၊ ဟိုပုံးမြို့နှင့် အနီးတဝိုက်ကျေးရွာများမှာ စစ်ကောင်စီနှင့် ပအိုဝ်း ပြည်သူ့စစ် (PNO) သည် ပြည်သူများကို ရက်ပိုင်းမျှသာ သင်တန်းပေးပြီး ရှေ့တန်းသို့ပို့နေကြောင်း ဒေသခံများထံမှ သိရသည်။
ပြီးခဲ့သည့် နိုဝင်ဘာလ နောက်ဆုံးပတ်မှ စပြီး စစ်ကောင်စီ နှင့် PNO တို့သည် ဟိုပုံးမြို့နှင့် အနီးတဝိုက် ကျေးရွာအုပ်စုရှိ ပြည်သူများကို ဖိအားပေးကာ စစ်သင်တန်း (၃)ရက်တက်ခိုင်းပြီး ရှေ့တန်းသို့ ပို့ခဲ့သည်။
ထိုသို့ စစ်သင်တန်း သုံးရက်ပြီးလျှင် ခန္ဓာကိုယ် ကြံ့ခိုင်သည့် အမျိုးသားများကို ရွေးချယ်ပြီး ကျိုင်းတုံဖက်သို့ စစ်သင်တန်း သုံးလတက်ရန်ပို့ဆောင်ပြီး သင်တန်းပြီးလျှင် ရှေ့တန်းသို့ ချက်ချင်း ပို့ခံနေရကြောင်း သတင်းရင်းမြစ်များထံမှ သိရသည်။
“အစပိုင်းကတော့ ဒီတိုင်း ရပ်ရွာကာကွယ်ဖို့ပြောတာပဲ။ ပြီးတော့ လူရွေးပြီး ကျိုင်းတုံကိုပို့လိုက်တယ်။ သုံးလ သင်တန်းတက်ခိုင်းပြီး ရှေ့တန်းချက်ချင်းပို့တာ။ တစ်ချို့ဆို သူတို့တော်တယ်လို့ သတ်မှတ်ခံရရင် သုံးလ သင်တန်းမပေးတော့ပဲ ရက်ပိုင်းနဲ့ ရှေ့တန်းပို့တာ။” ဟု ဟိုပုံးမြို့ခံ တစ်ဦးကသျှမ်းသံတော် ဆင့်ကို ပြောသည်။
စစ်မှုထမ်း အမှတ်စဉ် (၇) အတွက် ကျေးရွာအုပ်စု တစ်ခုလျှင် လူနှစ်ယောက်နှုန်းဖြင့် စုဆောင်းနေပြီး ကြားကာလတွင် အတင်းအဓမ္မ စုဆောင်းခံရသူ အပါဝင် လူဦးရေ စုစုပေါင်းပေါင်း (၄၀၀) နီးပါးမျှ စစ်သားစုဆောင်းခံနေရကြောင်း ၎င်းအမျိုးသားက ထပ်လောင်းပြောသည်။
ထိုကဲ့သို့ ရှေ့တန်းစစ်မြေပြင်ပို့ဆောင်ရန် ရွေးချယ်ခံရသူများမှာ အသက် (၂၃)နှစ်မှ (၅၀) ကြားအမျိုးသားများပါဝင်နေပြီး အများစုမှာ မိသားစုနှင့် အဆက်သွယ်မရကြဘဲ ကျိုင်းတုံဘက်သို့ပို့ဆောင်ခံရသည်ဟု သတင်းရင်းမြစ်များက ပြောသည်။
ယခုလက်ရှိ ဟိုပုံးမြို့နယ်တွင် စစ်ရေးအရငြိမ်သက်နေသော်လည်း သွားလာမှု စစ်ဆေးတင်းကြပ်နေပြီး စားသောက်ကုန်စည်များကို လိုအပ်သည်ထက် ပိုသယ်ခွင့်မရဘဲ တင်းကြပ်စွာ စစ်ဆေးမှုများ ပြုလုပ်နေကြသည်ဟု မြို့ခံများထံမှ သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments