သျှမ်းပြည် နမ့်ခမ်းမြို့ရှိ တအာင်း(ပလောင်) အမျိုးသားလွတ်မြောက်ရေး တပ်မတော် TNLA ထိန်းချုပ်ထားသည့် ရဲစခန်းရှေ့တွင် ပိုင်ရှင်မဲ့အလောင်းတစ်ခု တွေ့ရှိခဲ့ကြောင်း စုံစမ်းသိရသည်။
ယမန်နေ့ (ဒီဇင်ဘာလ ၁ ရက်) နေ့လယ် ၂ နာရီခန့်တွင် TNLA တပ်ဖွဲ့ ထိန်းချုပ်ထားသည့် နမ့်ခမ်းမြို့ ရဲစခန်းရှေ့တွင် အသက် (၅၀) ကျော်အရွယ် အမည်မသိ အမျိုးသားတစ်ဦး သေဆုံးခဲ့ပြီး မြို့ပေါ်ရှိ ပရဟိတအဖွဲ့မှ သယ်ဆောင်ကာ သုဿာန်တွင် မီးသင်္ဂြိုဟ်ပေးခဲ့ကြောင်း နမ့်ခမ်းဒေသခံများက ပြောသည်။
“အပြင်မှာတော့ ဘယ်သူမှ မသိလိုက်ဘူး။ ဘာကြောင့် သေတယ်၊ ဘယ်ဇာတိလည်း ဆိုတာ မသိလိုက်ရဘူး။ ပရဟိတအဖွဲ့ကပဲ သယ်သွားပေးတာဆိုတော့ ရပ်ကွက်ထဲ မသိလိုက်ဘူး။ ပုံမှန်ဆိုရင် ရဲစခန်းထဲ လူနေတာလည်း မရှိတော့ တိုက်ပွဲတွေ ဖြစ်ပြီး အဲ့ဘက်အသွားအလာ နည်းတယ်”ဟု နမ့်ခမ်းဒေသခံ အသက် (၃၀) ကျော်အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
နမ့်ခမ်းမြို့တွင် ယခုကဲ့သို့ ပိုင်ရှင်မဲ့အလောင်း တွေ့ရှိခြင်းမှာ ပထမဆုံးအကြိမ်ဖြစ်ပြီး သေဆုံးသည့် အကြောင်းရင်းကို မသိရှိရသေးကြောင်း ၎င်းအမျိုးသားက ဆက်ပြောသည်။
ပြီးခဲ့သည့် နိုဝင်ဘာလ (၁၉) ရက်တွင်လည်း နမ့်ခမ်းမြို့ မန်ခမ်းရပ်ကွက်တွင် အမျိုးသားတစ်ဦးသည် ယာမဆေးကြောင်ပြီး ဇနီးဖြစ်သူကို နေအိမ်တွင် ဓားထိုးမှု ဖြစ်ပွားခဲ့ရာ အမျိုးသမီးဖြစ်သူ သေဆုံးသွားခဲ့ပြီး ကျူးလွန်သူကို ရပ်ကွက်နေပြည်သူများနှင့် TNLA မှဝိုင်းဝန်းဖမ်းဆီးနိုင်ခဲ့ကြောင်း နမ့်ခမ်းဒေသခံများထံမှ သိရသည်။
နမ့်ခမ်းမြို့ကို TNLA ထိန်းချုပ်ထားသော်လည်း လက်ရှိအချိန်ထိ ယာမဆေးပြား ကဲ့သို့ မူးယစ်ဆေးဝါးများသည် လျော့ကျမှု မရှိသကဲ့သို့ KTV နှင့် ဘား (အရက်)ဆိုင်များလည်း ပိုများလာကြောင်း နမ့်ခမ်းဒေသခံများ ပြောဆိုသည်။
အလားတူ စစ်ကောင်စီတပ် ထိန်းချုပ်ထားဆဲဖြစ်သည့် မူဆယ်မြို့ပေါ်နှင့် ရွှေလီမြစ် အနီးတဝိုက်တွင် နိုဝင်ဘာလအတွင်း ပိုင်ရှင်မဲ့အလောင်း (၁၀) လောင်းထက်မနည်း တွေ့ရှိခဲ့ပြီး ၎င်းတို့ကို မီးသင်္ဂြိုဟ်ပေးခဲ့ရကြောင်း လူမှုကူညီရေးအသင်းများထံမှ သိရသည်။
Leave a Comments