ထိုင်းနိုင်ငံ၊ မဲဟောင်ဆောင်ခရိုင်၊ သံလွင်မြစ်ကြောင်းတစ်လျှောက်တွင် ကျွန်းသစ်လုံး ၆၀ မှ ၇၀ ခန့် ပါဝင်သည့် သစ်ဖောင်ကြီးတစ်ခုမျောလာပြီး ထိုင်းအာဏာပိုင်များမှ နယ်စပ်ဖြတ်ကျော် သစ်မှောင်ခိုကူးမှုများကို စုံစမ်းနေကြောင်း The Nation Thailand သတင်းတွင် ဖော်ပြသည်။

ဩဂုတ်လ ၂၆ ရက်က ထိုင်းရဲတပ်ဖွဲ့များမှ မြစ်ကြောင်းအတိုင်း ကင်းလှည့်စဉ် မယ်စာရီယန် (Mae Sariang) မြို့နယ်၊ မယ်ယွမ် (Mae Yuam) တိုက်နယ်၊ ဘန်းမယ်ဝမ် (Ban Mae Waen) ကျေးရွာအနီး မြစ်ကမ်းဘေး၌ စုစည်းချည်နှောင်ထားသည့် သစ်ဖောင်ကြီးတစ်ခု မျောလာကြောင်းတွေ့ရှိခဲ့သည်။ သစ်ဖောင်ပေါ်ရှိ သစ်အများစုမှာ သစ်ဟောင်းများဖြစ်သော်လည်း လတ်တလော ခုတ်ထွင်ထားသည့် ကျွန်းသစ်လုံး ၁၀ လုံးခန့် ပါဝင်နေသည်ကို စိစစ်တွေ့ရှိခဲ့ရသည်။

ထိုသစ်လုံးများကို မြစ်၏ တဘက်ခြမ်း ကရင်ပြည်နယ်ဘက်ခြမ်းရှိ ကရင်အမျိုးသားအစည်းအရုံး (KNU) ဆက်စပ်ဒေသဖြစ်သော ဘန်းကိုကဲ (Ban Ko Ke) ကျေးရွာဘက်မှ မျောချလာခြင်းဖြစ်နိုင်ကြောင်း ထိုင်းအာဏာပိုင်များက ယူဆထားသည်။ ထိုသစ်ဖောင်ဖြင့် ထိုင်းနိုင်ငံဘက်သို့ တရားမဝင် မှောင်ခိုသွင်းရန် သို့မဟုတ် မြစ်ကြောင်းအတိုင်း ဆက်လက်သယ်ဆောင်ရန် ပြင်ဆင်ထားခြင်းဖြစ်နိုင်ကြောင်း သံသယရှိနေသည်။

ထိုင်းသယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဆူချာတ် (Suchart Chomklin) က အဆိုပါသစ်များကို အမျိုးသားဥယျာဉ်၊ တောရိုင်းတိရစ္ဆာန်နှင့် သစ်တောထိန်းသိမ်းရေးဦးစီးဌာန (DNP)၊ လုံခြုံရေး၊ ပြည်သူ့စစ်တပ်ဖွဲ့များ ပူးပေါင်း၍ သိမ်းဆည်းရမိသော ကျွန်းသစ်များကို ထိန်းသိမ်း ထားရန်ညွှန်ကြားထားသည်။

လက်ရှိတွင် Salawin အမျိုးသားဥယျာဉ် အရာရှိများက သစ်ဖောင်ကို လုံခြုံသည့်နေရာသို့ ရွှေ့ပြောင်းကာ သစ်ထုထည် တိုင်းတာခြင်းနှင့် တရားဝင် သိမ်းဆည်းမှု မှတ်တမ်းများ ပြင်ဆင်လျက်ရှိသည်။

ထို့အပြင် နယ်စပ်ဒေသရှိ လုံခြုံရေးအဖွဲ့များနှင့် စစ်တပ်စခန်းများက သစ်ခုတ်ယူခဲ့သည့် နေရာမှစ၍ သစ်ဖောင်ပြုလုပ်သူနှင့် လက်ခံမည့်သူ နောက်ကွယ်မှ သစ်မှောင်ခိုကွန်ရက်တစ်ခုလုံးကို ဖော်ထုတ်နိုင်ရန် စုံစမ်းစစ်ဆေးလျက်ရှိပြီး သံလွင်မြစ်ကြောင်းတစ်လျှောက် ကင်းလှည့်မှုများကိုလည်း ပိုမိုတိုးမြှင့်ထားကြောင်း သိရသည်။

ကိုးကား – The Nation Thailand