သျှမ်းပြည်မြို့တော်၊ တောင်ကြီးမြို့ရှိ စီးပွားရေးလုပ်ငန်းရှင်များထံ တော်လှန်ရေးတပ်ဖွဲ့အမည်ခံအဖွဲ့တစ်ဖွဲ့မှ ခြိမ်းခြောက်စာပို့၍ ငွေတောင်းခံမှုများရှိနေကြောင်း စုံစမ်းသိရှိရသည်။

နိုဝင်ဘာလ ၂၀ ရက်နောက်ပိုင်း တောင်ကြီးမြို့ပေါ်ရှိ စီးပွားရေးလုပ်ငန်းရှင်များထံ Local Attack Army ပကဖ တောင်ကြီး ရန်ပုံငွေရှာဖွေရေးကော်မတီအမည်ဖြင့် တော်လှန်ရေးရန်ပုံငွေ ထည့်သွင်းရန်အကြောင်းကြားစာ ပေးပို့မှုများရှိနေကြောင်း မြို့ခံ သတင်းရင်းမြစ် တစ်ဦးက သျှမ်းသံတော်ဆင့်သို့ပြောသည်။

“တန်ဆောင်တိုင်ပွဲပြီးတည်းက တောင်ကြီးက လုပ်ငန်းရှင်တွေဆီ တောင်ကြီး ပကဖကပါဆိုပြီး ခြိမ်းခြောက်ငွေတောင်းတာတွေရှိတယ်၊ ဖုန်းနံပါတ်၊ လူနာမည်၊ ဆိုင်နာမည်အတိအကျနဲ့ Viber ၊ telegram၊ messenger ကနေ တောင်ကြီးအတွက် ထောက်ပို့ဖို့ ပြောတယ်” ဟု ပြောသည်။

အထက်ပါ ငွေတောင်းခံခြိမ်းခြောက်မှုများမှာ စစ်ကောင်စီမှ ဦးစီးကျင်းပသည့် တန်ဆောင်တိုင် မီးပုံပျံပွဲတော် ပြီးသည့် အချိန်မှစတင်ပြီး ဆက်တိုက်ဖြစ်ပေါ်နေကြောင်း သိရသည်။ ထိုသို့ ငွေကြေးကောက်ခံမှုများနှင့် ပတ်သတ်၍ သျှမ်းသံတော်ဆင့်မှ အသေးစိတ်သိရရန် ထပ်မံစုံစမ်းနေဆဲဖြစ်သည်။

ထိုသို့ငွေကြေးကောက်ခံရာတွင် ကောက်ခံသည့်ငွေကြေးပမာဏအတိုင်းထည့်သွင်းရန်နှင့် လုပ်ငန်းရှင်များကိုလည်း အမြဲမပြတ်စောင့်ကြည့်နေကြောင်း တောင်းခံသည့်ငွေကြေးထည့်ဝင်ခြင်းမရှိခြင်းနှင့် ပေါက်ကြားမှုရှိလာပါက ပြင်းပြင်းထန်ထန် အရေးယူမည့်အကြောင်း ဖော်ပြထားကြောင်း သိရသည်။

“တောင်ကြီးက လွတ်မြောက်နယ်မြေထဲလည်း မပါဘူး၊ အဲ့လို ပကဖ အနေနဲ့ သုံးရအောင် အညာဒေသမြို့တွေလည်း မဟုတ်တော့ အဲ့လိုတွေ ခြိမ်းခြောက်ငွေညစ်ခံရရင် ပေးစရာမလိုပါဘူး၊ ကြောက်စရာမလိုဘူး၊ ပို့လာခဲ့ရင် တန်းပြီး block ကြပါ” ဟု တော်လှန်ရေးတပ်ဖွဲ့များနှင့် နီးစပ်သူတစ်ဦးကပြောသည်။

ထို့အပြင် ပြီးခဲ့သည့် ရက်သတ္တပတ်အတွင်း တောင်ကြီးမြို့ပေါ်ရပ်ကွက်အချို့တွင် စစ်ကောင်စီခန့် ရပ်ကွက်အုပ်ချုပ်ရေးမှူးများနှင့် ရာအိမ်မှူး၊ ဆယ်အိမ်မှူးများမှာ အိမ်ဌားနေသောပြည်သူများအား စစ်မှုထမ်းကြေးအကြောင်းပြကာ ငွေကြေးကောက်ခံမှုများရှိခဲ့ပြီး ထည့်ဝင်ခြင်းမရှိပါက ဧည့်စာရင်းနှင့် ရပ်ကွက်ထောက်ခံစာများ ပြုလုပ်ခွင့်မပေးကြောင်း မြို့ခံ အိမ်ရှင်တစ်ဦးက သျှမ်းသံတော်ဆင့်သို့ပြောသည်။

“အိမ်က အိမ်ထောင်စုစာရင်းမှာက မိန်းကလေးတွေပဲရှိတာ၊ အိမ်ငှားလာနေတဲ့ သူတွေအတွက်ဆိုပြီး ထည့်ပေးရတယ် အိမ်ကလူမဟုတ်ဘဲ သုံးသောင်းထည့်ပေးရတယ်၊ သူတို့က မန်းလေးကလာနေတာ၊ မန်းလေးမှာကျန်ခဲ့တဲ့သူတို့ အိမ်က လူတွေကလည်း သူတို့အတွက်ထည့်ပေးရတယ်၊ နှစ်နေရာလုံးမှာ ထည့်ရတာ” ဟု မြို့ခံတစ်ဦးမှ သျှမ်းသံတော်ဆင့်သို့ပြောသည်။

ပြီးခဲ့သည့် နိုဝင်ဘာလ ၉ ရက်မှစပြီး နိုဝင်ဘာ ၁၅ ရက်နေ့အထိ စစ်ကောင်စီမှ တောင်ကြီးမြို့ တန်ဆောင်တိုင်ပွဲအား ဖိအားပေးကျင်းပခဲ့ပြီး ပွဲဖြစ်မြောက်ရန်အတွက် ပြည်သူများ စားဝတ်နေရေး ကြပ်တည်းနေသည့်ကြားမှ ငွေကောက်ခံ ကျင်းပခဲ့သည်။

တန်ဆောင်တိုင်မီးပုံပျံပွဲသည် တောင်ကြီးမြို့၏ အစဉ်အလာကြီးမားသော ပွဲတော်တစ်ခုဖြစ်သော်လည်း လက်ရှိနိုင်ငံ၏ နိုင်ငံရေး၊ စစ်ရေးအခြေအနေများကြောင့် မြို့ခံလူထုမှ ကျင်းပလိုခြင်းမရှိသော်လည်း စစ်ကောင်စီမှ ဖိအားပေးကျင်းပခဲ့ခြင်းဖြစ်သည်။

အလုပ်သင် သတင်းထောက် ယူဂျင်း ရေးသားသည်။